سبحان الذي اسرى بعبده الطكاسي هباني من دالاس الى نعيمة؟؟

مكتبة هشام هباني سبحان الذي اسرى بعبده الطكاسي هباني من دالاس الى نعيمة؟؟
12-05-2006, 01:40 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1199947139&rn=0


--------------------------------------------------------------------------------
مداخلة: #1
العنوان: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 12-05-2006, 01:40 م


بالامس وانا مستلق وفي جو ربيعي تكساسي تحت شجرة البيت وارفة الظل وكان البصر شاخصا تجاه حائط البيت الذي يسكنه ( الجاك) هباني وجاره (مستر جاك الانجلو ساكسوني) يعني
( جعلي امريكاني) وغفوت ثوان معلومات...وغصت في الذاكرة المشروخة....واسرت اللحظة بعبدها هباني من دالاس الامريكية الي نعيمة السودانية المدفونة في فيافي بحر ابيض الحنين في رمالنا الحبيبة محفوفة باشجار نيمها ومسكيتها الحبيبة وبعض من نباتات العشر والعوير فتحول الحائط بقدرة قادر الي حيطة ذات شرمة من الشرمات السودانيات او النفاجات...ورايت امي الحاجة امنة عند ذات الشرمة في ذات الحائط المشترك تسامر خالتي بت المهدي حول مناسبة ختان بن خالتي القادم وتحدثتا عن كيفية التجهيزات وصناعة الشربوت وعواسة الكسرة و( كفاية الضيوف) القادمين لهذا الختان الكبير ...وتذكرت طقوس الختان.. البطان والدلوكة والشتم والذهاب في سيرة العريس الي الشفخانة لحضور طقس عملية الطهورة.. وكيف جدتي (بت عسمة) سوف تحمل القطعة المختونة وتلبسهاالسوط.. وتهز به في الهواء تعبيرا عن الفرح وانتهاء العملية وتحيي بها اهل السيرة وحفيدها المختون وهي تهديه اغنية للحماسة مليئة بالماثر الجميلة في تعلم الشجاعة والصمود والكرم والشهامة و وتذكرت كيف اننا نحن الصغار سنستمتع برفقة بن خالتي العريس المختون في زياراته الي بيوت القرية بسيفه وسوطه وهلاله وضريرته وممسكا بطرف جلبابه قبالة الجرح موضع الختان ماشيا مشيته المعهودة اي ( الكجولة) وهو يتفادي اي احتكاك بين الجرح وطرف الجلباب او غالبا ما يكون ( عراقي ) وفي اثناء تجواله بالبيوت يهدونه الهدايا والنقود والحلوى وغالبا ما يهدونه ديكا او دجاجة ونحن حوله نصيح في اهل البيوت ( العادة ديك ولا جدادة).... وتذكرت كيف انه في ايام الختان سنستمتع بعادة السرقة وهي عادة كانت جزءا اصيلا من طقوس الختان حيث كان الصبية اصدقاء العريس المختون يذهبون الي بيوت القرية خلسة ويسرقون بعض الاشياء مثل ( عنقريب او كرسي او تربيزة) وياتون بها الي بيت العريس المختون ..وبالتاكيد اهل المفقودات يعلمون تماما بمكان مفقوداتهم طالما هنالك ختان ( طهور) اي هنالك طقس السرقة.. فسرعان ما يذهبون الي بيت المناسبة ويدفعون هدية للعريس مقابل الحصول علي اشيائهم المسروقة في جو مفعم بالفرح والضحك والحبور .....وانتهي السمر بين امي وخالتي بتبادل الطعام... وقفزت انا الشقي احمل طعام امي عبر ( الشرمة) الحبيبة وهي تنحني الي كي اعبر من خلالها الي بيت خالتي حاملا طعام امي واتيا بطعام خالتي في ذلك الزمن الجميل ...حيث كانت حتى الاشياء ومنها الحيطان تتفاعل مع الناس ا جتماعيا وهي تسهل هذا الحوار الجميل بين الاهل والجيران عبر (الشرمات والنفاجات) وتنحني الحيطان العالية( بشرماتها) للاطفال الصغار لتسهيل التواصل فيما بينهم في ذلك الزمان الجميل....وفجأة صحوت من وسني الجميل..وعدت خائبا الي تكساس والى بيتي لاجد بيني وبين جاري مستر جاك الانجلوساكسوني ممرا اي زقاقا اي لكل حائطه ولكل مياهه الاقليمية..ولكل حاجزه الثقافي...ولكل مزاجه والكل محكوم بقانون يحترم الحرية الشخصية...ولكنك تكتشف من صندوق بريد بيتك ان حريتك الشخصية مهدرة وتحت اعين عتيد ورقيب خطير .. فكل البنوك تعرف اسمك وعنوانك ..ولونك وعمرك وكل الشركات ترصد حساباتك في البنوك وتقدم بناء علي المعلومة المتاحة.. عروضها واحابيلها....ورجعت مرة اخرى متمعنا في الحائط الذي بين امي وخالتي والشرمة التي بيننا وقلت في نفسي: لمن هذا الحائط وهذه الشرمة..التي بين بيتينا منذ ان ولدنا في ذلك الزمن الجميل؟؟..........ويتطور السؤال وانا اقول لنفسي : لمن هذا الوطن الذي نبعد عن الاف الفراسخ ...في هذه المنافي اللئيمة ونحن الاحياء الاموات وفي داخله اصبح اهلنا غرباء ... وهم فيه يستجيرون بالغريب من القريب و ظلم ذوي القربى اشد علي النفس من وقع الحسام المهند.........الا رحم الله الوطن الجميل.........امين



هباني

--------------------------------------------------------------------------------
مداخلة: #2
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 13-05-2006, 06:32 ص
Parent: #1


الا رحم الله الوطن الجميل......................امين

--------------------------------------------------------------------------------
مداخلة: #27
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 24-06-2006, 01:50 م
Parent: #2


........................

--------------------------------------------------------------------------------
مداخلة: #3
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: JAD
التاريخ: 13-05-2006, 07:25 ص
Parent: #1


سلام إلى هشام هباني "الجميل" ..


بعتبر نفسي أيضاً ركبت طرحة أثيرية مجانية ..

ومدنكلة بي ونسة تكاسي من ناس زمان ..



جاد

--------------------------------------------------------------------------------
مداخلة: #4
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 13-05-2006, 08:53 ص
Parent: #3


جــــــــــاد

كيفنك

تشكر علي المرور لكن حكاية مجانا دي فيها كلام!!!

نحن في زمن الجمرة الخبيثة موية وكهرباء والكلام حيبقى بالقروش؟؟

سلام

هباني

--------------------------------------------------------------------------------
مداخلة: #5
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: ABDELMAGID ABDELMAGID
التاريخ: 13-05-2006, 09:50 م
Parent: #4


ود هبانى ... عووووووك ...
راجل ( الختوه !!! ) و ( الفزعه !!! ) تلحقنا و ( تنقذنا !!!!!!!!!!!!!! ) من عمر ( ذو الإثنين ) ...
عبدالماجد

--------------------------------------------------------------------------------
مداخلة: #6
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: Elawad Eltayeb
التاريخ: 14-05-2006, 03:56 ص
Parent: #5


الا رحم الله هشام هباني الجميل......................آآآآآآآمين

--------------------------------------------------------------------------------
مداخلة: #7
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: إسماعيل وراق
التاريخ: 14-05-2006, 04:06 ص
Parent: #6


ود هباني
سلام
قرأت قبل أربع أيام بصحيفة السوداني أن النفط سوف يتدفق في قرية نعيمة وذلك اثر إكتشاف كميات كبيرة بالمنطقة خاصة المربع رقم9
هذا الخبر جعلني أحسن علاقتي مع إبن العم جمال هباني عسى ولعل يصير كفيل لنا بعد الأوبة للوطن..

--------------------------------------------------------------------------------
مداخلة: #11
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: عبد المنعم عمر عثمان
التاريخ: 14-05-2006, 06:30 ص
Parent: #7


Quote: هذا الخبر جعلني أحسن علاقتي مع إبن العم جمال هباني عسى ولعل يصير كفيل لنا بعد الأوبة للوطن..



يا ود يا سمعة التحية لك والاخ هشام ،،،، وبمناسبة ذكرك لجمال هبانى ، قابلته صدفة بالرياض _ السعودية قبل إسبوعين وعندما عرفت أنه هبانى وأنه حفيد جدنا الشيخ عبدالمولى ودعتيبه حرصت على معرفته وقبل أن ندخل فى أى تعارف كانت الطامة الكبرى بأن أعطانى كرته التعريفى و مكتوب عليه أنه مدير سيئة الذكر شركة المهاجر فانسحبت تكتكيا وقلت فى نفسى أنه هبانى تقليد و مضروب ذو مابقولو .

--------------------------------------------------------------------------------
مداخلة: #8
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: ودقاسم
التاريخ: 14-05-2006, 04:56 ص
Parent: #1


ابن العم هشام هباني
تحيات
لا أعلم كم سنة غبت أنت عن نعيمة ، لكني منذ أربعة سنوات لم أرها . وقد اعتدت أن أسافر بطريق النيل الأبيض حتى أبوحبيرة ومنها إلى معتوق ، وطبعا المرور بنعيمة يسعدني كثيرا ، ودائما أذكر أولادي بأن هذه بلدة الهبانية ، ومسقط رأس المناضل العم عمر نوا الدائم يرحمه الله ... وأتذكر المغني وهو يردد :
في نعيمة أبيت النزول
شفت سفرك داير يطول
سبت عملي نسيت الفصول
أصلو حسنك ينسي العقول
ونعيمة في الخريف خضرة وجمال ممتد ، والمياه من حولها ، والذرة مزروعة في الحقول ( البلدات ) والمطاعم في المحطة على الطريق تبيع اللحم الطازج ...
اللهم أعدنا إلى بلادنا ، وأعد بلادنا إلينا كما نحبها ...

--------------------------------------------------------------------------------
مداخلة: #9
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: willeim andrea
التاريخ: 14-05-2006, 05:24 ص
Parent: #1


ياربي في الزمن داك كان بتسافروا بالبص السريع والا بص فلان الفلان الحده القطينه ياسلام زمن اخضر وجميل

--------------------------------------------------------------------------------
مداخلة: #10
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 14-05-2006, 05:58 ص
Parent: #9


عبد الماجد اخوي

تفزعنا انت يا شيخنا المبين بغادي في غوانتانامو.....تحياتي للدكتورة والعصابة
الرباطين الصغار




العوض ود الطيب

سلام يا زول يا سمح والله مشتاقين



ودعمي الفنجري ودوراق

دحين بتدور ودعمك من هسع اشتري عبايتو وعقالاتو وافرتق هسع من امريكا
عشان حنكون شيوخ نفط يا ربي!!!......لكن بيني وبينك ود الجاز ده علي بالطلاق خايف بكرة نلقى ناس نعيمة......... ارحلوهم رحيلة اهلنا ناس حلفا ولا اهلنا المناصير
الناس ديل مو سعرانين....غايتو اهلك ناس بحر ابيض حقو من هسع اسوو ليهم حركة
سياسية لحماية نفطهم وثروتهم من عصابات ود الجاز ونحن ناس نعيمة ديل عمرنا كلو مهمشين وساكنين دافنانا الرمال فوق القيزان....يعني بالواضح تب ما بنلعب في نفطنا ده....جانا من الله هدية .... وتحياتي للشيخ النفطي بن اختي الامير جمال الدين ال هباني!!


ودعمي الكلس ود قاسم

حبابك الف يا زول يا سمح.... والله يا ود عمي اخوك ليهو سبعتاشر سنة من نعيمة
والشوق هبطرش للاهل وللقيزان والتمام والطندب واللعوت والمسكيت والنيم والطير والارنب
وارنبنا سمعنا اهلنا عرب القنابيل من زمان بجونا من جهة معتوق باللواري في زمن الحصاد بكلابهم قالو هسع كملوها كلها تب .. مع تحياتي للاهل في معتوق وعندنا اهل وقرايب في كمبو الفضل .. وسلام لاهلنا في كرتوب والطوال وبقية النجوع الجميلة....... وبخصوص كلمات الاغنية دي لشاعرنا الاستاذ المرحوم حسن عبد الله سليمان اكرت وقد عمل استاذا للغة الانجليزية وهو فنان وشاعر وقد عمل معلما بنعيمة لفترات طويلة وهو من مواليد حي الموردة امدرمان من اسرة اكرت المشهورة.... وللاغنية قصة مشهورة..وهي اغنية (ظبية البص السريع) تحياتي للاسرة الكريمة


وليم اندرية

ازيك يا زول يا خفي وينك من زمان جيت ناقرتني... بالدويم وهسع ناقرتني بالبص السريع
قطع شك تكون زولا من حلالنا القريبة دي واكان ما اخاف الكضب تكون من القطينة... لكنك يا زول اتفلهمت وبقيت تعرف وليم اندرية..........محبتي



هباني

--------------------------------------------------------------------------------
مداخلة: #12
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: إسماعيل وراق
التاريخ: 14-05-2006, 11:15 م
Parent: #10


Quote: يا ود يا سمعة التحية لك والاخ هشام ،،،، وبمناسبة ذكرك لجمال هبانى ، قابلته صدفة بالرياض _ السعودية قبل إسبوعين وعندما عرفت أنه هبانى وأنه حفيد جدنا الشيخ عبدالمولى ودعتيبه حرصت على معرفته وقبل أن ندخل فى أى تعارف كانت الطامة الكبرى بأن أعطانى كرته التعريفى و مكتوب عليه أنه مدير سيئة الذكر شركة المهاجر فانسحبت تكتكيا وقلت فى نفسى أنه هبانى تقليد و مضروب ذو مابقولو


الحبيب عبد المنعم
سلام..
أنت قابلت فاروق خوجلي هباني، فهو رجل ونعم الرجل ولكني أقصد جمال محمد إدريس هباني وهو مقيم معنا بالرياض..
أعلم أنك خبير ومهتم بالأنساب وأتمنى في المرات القادمة أن تحدثنا عن علاقة أهلناالحلاويين بالحسانية.



إبن العم هشام هباني
الخبر صحيح ومؤكد وأخوك عمل إتصالاته.. أقول ليك كلام بمناسبة الثورة دي... في شباب كتيرين متململين من الشيئ الحاصل دا بس دايرين قولت عووووك.

--------------------------------------------------------------------------------
مداخلة: #13
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: قلقو
التاريخ: 15-05-2006, 03:38 ص
Parent: #12


الأخ هشام
ياخوى الموضوع طالما فيه بترول وكدة فأنا لدى صديق من نعيمة يدعى ادريس التوم نورالائم,عامل لينا زحمة شديدة خلاس.ياادريس ماشى وين ؟ماشى نعيمة.جاى من وين ياادريس؟جاى من نعيمة.غايتو فلقنا بى نعيمة دى جنس فلقة اصلو ما معقول.
لكن بعد كدة ان شاء الله حأعتذر لحبيبنا ونور عينا ادريس وابوس ليه راسو واعزمو على سندوتش فول (انا عارفواصلو فجعان).حتى يجد لنا موطئ قدم بنعيمة..
رأيك شنو ؟
مع تحياتى

--------------------------------------------------------------------------------
مداخلة: #14
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: إسماعيل وراق
التاريخ: 15-05-2006, 04:04 ص
Parent: #13


Quote: أنا لدى صديق من نعيمة يدعى ادريس التوم نورالائم,عامل لينا زحمة شديدة خلاس.ياادريس ماشى وين ؟ماشى نعيمة.جاى من وين ياادريس؟جاى من نعيمة.غايتو فلقنا بى نعيمة دى جنس فلقة اصلو ما معقول.


قلقو
سلام
الرجل دا مهندس أمسك فيه بالعشرة والله بعدين تفتش ليك كفيل ما تلقاهو.. وصدقني البترول دا لو طلع جد جد أنا عارف ناسنا كويس... بس قول آمين وإن شاء الله يرى النور..
.
.
تحياتي لإدريس التوم ولأسرته الكريمة

--------------------------------------------------------------------------------
مداخلة: #15
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 15-05-2006, 06:22 ص
Parent: #14


العزيز قلقو

صباحاتك خير


يا زول اعمل حسابك من هسع لازم تقول (شيخ ادريس) بعد حكاية النفط دي وتظبط علاقاتك بيهو والزول ده النفط ظاااطو لقوهو في حوش بيتهم.... ونعيمة دي حتكون احسن من الظهران بتاعة السعودية ظااااطها... وارجوك ثم ارجوك تاني لمن تخاطبني ما تقولها حافة كدة: الاخ هشام
قول شيخ هشام او الامير هشام لانو النفط نفطنا ونحن اسيادو وبمشيئة الله حقك في الاقامة محفوظ والكفيل بن عمي جاهز ونحن لا بنعرف عوض الجاز ولا بنزين مع تحياتي لاخي شيخ ادريس...ولك المحبة والود الكبير



شيخ هباني



ود وراق الجميل

تحياتي وشكرا علي المرور مع تحياتي لكل الاهل بالمملكة وبالمناسبة قررنا انك تتعاقد لينا مع مصانع العقالات السعودية اصمموا لينا عقالات تتناسب مع صناقيرنا العجيبة دي
لانو النفط ده لازم نظبط المظهر بتاعنا من هسع.... وبعدين ممكن تفتحوا مكاتب لجلب العمالة السعودية لارسالها لحقول النفط بنعيمة بالسودان..وظبط الكفالات وبالتاكيد امورك بتظبط.محبتي واحترامي


شيخ هباني

--------------------------------------------------------------------------------
مداخلة: #16
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: Aisha Hommaida
التاريخ: 15-05-2006, 06:29 ص
Parent: #1


Quote: عقالات تتناسب مع صناقيرنا العجيبة دي



وعبايات وبراقع تتناسب مع جونا المسخن داك

بت حميد

--------------------------------------------------------------------------------
مداخلة: #17
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 15-05-2006, 06:36 ص
Parent: #16


العزيزة بت حميد


سلامات يا زولة يا اصيلة

والله ذكرتيني حكاية البراقع والجبب الحريمي.... ممكن نشوف لينا مستورد ليها لكن اماتنا وخالاتنا وبناتنا تب ما برضن بغير توبن السمح ده... لكن التوب ظاااااطو ممكن اتصمم بالمواصفات العالمية التي تناسب شيخات وسيدات النفط.... والموضوع ده ممكن نكلفك بيهو هناك عندكم في لندن وتبقي لينا اكبر المستوردين للثياب الحريمي النفطية
وحتضربي عبد الصمد ظااااااااطو....محبتي واحترامي

ظااااااطو

سندة: في انتظار هاتف اخي د. موسى المحمول

--------------------------------------------------------------------------------
مداخلة: #18
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: عبدالمحمود محمد عبدالرحمن
التاريخ: 15-05-2006, 07:03 ص
Parent: #17


العزيز هشام هباني

ربنا يحقق الآمال ...
لكن بصراحة طفت إلى ذهني القصة المشهورة من أيام المدرسة الأولية والخاصة بالرجل صاحب جرة السمن، ولا أدري لماذا:

>>>>
... رجل فقير يريد أن يتزوج، يحلم بالمال والغنى، فكر: غداً أذهب السوق وأبيع هذه الجرة، وأشتري دجاجاً وبطاً وأوزاً، وبعد ذلك أغناماً، وبهائم وعجولاً، ثم أكون أكبر تاجر في البلد، والفلوس تكثر معي، أبني قصراً منيفاً الكل يتمنى أن يدخله، أي امرأة تتمناني، ثم أذهب وأتزوج أحسن امرأة، وبعد ذلك أنجب ولداً جميلاً، وأعلمه الأدب، ولا أرضى بالحال المائل، إذا عصاني أضرب هكذا، فأخذ العصا فضرب فكسر الجرة.
وفاق الرجل من حلمه على السمن الذي سقط عليه.

>>>

أرجو أن نكون اسعد حالاً من رجل الجرة!

--------------------------------------------------------------------------------
مداخلة: #19
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 18-05-2006, 09:40 ص
Parent: #18


اخي عبد المحمود


من حقنا ان نحلم ولا اظن انه سياتي زمن غير هذا يصادر فيه الحلم كما يحصل في السودان الان حيث تصادر احلامنا وطموحاتنا وامالنا في خطابات الغيب الهويسة!1!

سلامي
هباني




--------------------------------------------------------------------------------
مداخلة: #20
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: عبدالمحمود محمد عبدالرحمن
التاريخ: 18-05-2006, 10:27 ص
Parent: #19


العزيز هشام
بالطبع من حقنا أن نحلم ولن يصادر أحد ذلك الحق
بس لا تكسر الجرة وتفرط في التكس ـ ابقى عليهو عشرة حسع

محبتي لك

--------------------------------------------------------------------------------
مداخلة: #21
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: عبدالمحمود محمد عبدالرحمن
التاريخ: 18-05-2006, 01:47 م
Parent: #20


هشام
أسمح لي أن أقفل راجعاً لاستمحيك العذر إن بدوت مُحْبَطاً ومُحَبِطأ فأنا من جيل تداعت عليه خيبات الأمل فأصبح يتشاءم ببوادر التفاؤل
أرجو أن لا تكترث
واصل أحلامك العذبة وأشركنا إياها لو سمحت

يطول عمرك

--------------------------------------------------------------------------------
مداخلة: #22
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: عمر ادريس محمد
التاريخ: 19-05-2006, 08:30 ص
Parent: #1


اشياء صغيرة

جمهورية نعيمة الحرة

امل هباني




خبر صغير أورده زميلي وقريبي عوض ابو المعالي في صحيفة «الوطن»، مفاده اكتشاف النفط في منطقة نعيمة (قريتنا) في النيل الابيض..
ومن شدة سعادتي بهذا الخبر بدأت الاتصال بأبناء عمومتي حتى ننسق فيما بيننا، وكان السؤال هو ننسق لماذا؟ ننسق لأننا اصبحنا منطقة بترولية في ظل غياب دولة «مؤسسية» ووجود حكومة «فقرية» «نشفانة» و«سجمانة».. ولا تهتم بالتنمية.. وفي ظل هذا الواقع لا بد من التحرك السريع حتى لا يدخل علينا البترول بالساحق والماحق والبلا المتلاحق، كما حدث لجميع الشعب السوداني، الذي يعيش منذ اكتشاف البترول في حال سئ، ومنذ استخراجه في أسوأ حال، وأمامنا عدة خيارات، إما أن نركب الموجة ونعلن التمرد المسلَّح ونطالب بحقنا في الثروة والسلطة وتضطر الحكومة ان تجلس معنا في مفاوضات تحت ضغوط المجتمع الدولي واميركا، وهذا خيار مستبعد ولا يشبهنا نحن «ناس بحر أبيض» وناس نعيمة بصفة خاصة، فنحن لا نحب الحرب والعنف حتى سار علينا المثل «الناس في شنو والحسانية في شنو»، لان حملات الدفتردار الانتقامية في العهد التركي عندما وصلتنا وجدتنا في قمة بهجتنا وفرحنا وهذا ترفعاً منا لا خوفاً وإلا لكنا فعلنا كما فعل المك نمر.. كما أننا ناس نمتلئ بإحساس القومية، معظمنا موقن ان مشاكل السودن لا بد أن تُحل على مستوى «السودان» وليس على مستوى العرقيات والجهويات الموجودة فيه، لذلك أفنى والدي عمره -وهو مهندس ري- يخطط في مشاريع الري والتنمية من قناة جونقلي الى مياه بورتسودان الى مشروع مليط الى مشاريع النيل الابيض الى كل خور ونهر وبركة في هذا السودان، ودون أن يحقق أيَّاً من تلك المشاريع، وقد حفيت قدماه وانحنى ظهره وأضاع كل امواله ليقنع السادة المسؤولين بجدوى هذه المشاريع من دون «جدوى».. وبعد ان نستخرج بترولنا لن يحتاج الى هذه اللفة الطويلة.
والمرحوم د. عمر نور الدائم كان رمزاً قومياً في ادائه الحزبي وفي علاقاته السياسية، وعشرات غيره في وظائف عليا ومواقع قيادية ما عينوا فيها أهلهم او اقرباءهم على حساب بقية المواطنين ولسنا مهمشين ولا مضطهدين برغم ظروف الفقر، بل على العكس كانت منطقة حياة «كل النيل الابيض» وتعليم وثقافة «كان هناك تلفون في نعيمة في ثلاثينات القرن الماضي».
مشكلتنا أننا لا نستطيع ان نستأمن هذه الحكومة على بترولنا بالرغم من انها اكتشفته لان هذه الحكومة بها من الأمراض والعاهات ما بها.. ونحن لدينا مقدرة على تشكيل حكومة في المنطقة أقوى وأصلح منها، ليس لمنطقتنا فقط بل لكل السودان.. طبعاً لن نطالب بالانفصال، ببساطة نحن سنؤسس في منطقتنا وبثروتنا وسلطتنا من دون الحكومة المركزية الدولة المفقودة، ويمكن مبدئياً أن تمتد من القطينة حتى الدويم وستقوم اساساً على مبدأي العلم والحرية.. ولن تمتلئ بلدتنا بكل من هبَّ ودبَّ من الخواجات والأفارقة ليحلوا مشاكلنا برؤاهم وضغوطهم لأننا لن نحتاج لهم ولا لمنحهم إلا في حدود المعرفة والعلم والتنمية وليس الشحذة وإراقة ماء الوجه.. بعدها سيشعر كل مواطن سوداني بالغيرة من حالنا والتأسي لحاله، ولن يكون امامه إلا ان يتحرَّك ليغير حكومته او ينضم الى حكومتنا في جمهورية نعيمة الحرة.. فالتغيير ليس صعباً.. لكن من يجروء؟

_____

ياطويل العمر

شيخ هشام

وكمان المطار(هيك)
فركة قدم من
مملكـة
نعيمـة

تحياتى



--------------------------------------------------------------------------------
مداخلة: #23
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 19-05-2006, 08:37 ص
Parent: #22


حياك الله يا طويل العمر الشيخ عمر


وقد منحناك التابعية لجمهورية نعيمة الحرة...ودم في هناء وبحبوحة والله المستعان!!


الشيخ هباني

--------------------------------------------------------------------------------
مداخلة: #24
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: ابي عزالدين البشري
التاريخ: 01-06-2006, 01:42 ص
Parent: #1


أخوي هشام
تحياتي ولك حبي
قدر ما حاولت اتصل بيك فشلت وحاولت المستحيل من خلال الأخ المهندس الرائع أمين سيد والخال الموسيقار أزهري نور الهدى (دريشة)وما فضل لي إلا طوب الأرض، وما لقيب ليك عنوان بريد في ملفك.
تحية إكبار لي بوستك الرائع الدويم شات. وبعد أرشفة سودانيز اون لاين فقدت الرابط الدويم شات. للتعليق والمشاركة بالجديد . طلبتك بالله توريني طريقة إتصال. ولك كل حبي وتقديرى.

--------------------------------------------------------------------------------
مداخلة: #25
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: Hassan M Saeed
التاريخ: 01-06-2006, 01:37 م
Parent: #1


up

--------------------------------------------------------------------------------
مداخلة: #26
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 12-06-2006, 08:20 م
Parent: #25


الحبيب ود الدويم ابي عز الدبن


سلامات با مبدع واهلا بيك

اسف يا عزيزي للتاخر في الرد بسبب السفر

وحمدا لله وصلنا بخير

اما بخصوص سؤالك عن بوست الدويم شات فقريبا سنعيده
مع خالص حبي واحترامي وسلامي لكل الاهل.

هشام هباني

--------------------------------------------------------------------------------
مداخلة: #28
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: Zongiya
التاريخ: 24-06-2006, 04:23 م
Parent: #1


نحن ايضا من القري..
بنت عمتي لا تعرف شئ كثير عن حضاره المدن و التكنولوجي و الخ من رفاهيه المعيشه
اتخطبت و عقدت و اتزوجت في مده قصيره جدا..
وجا مواعيد السفر الي ((هولندا))..حيث استقرار العريس هناك
قريبتنا التي علمت بهذا الموضوع موخرا..علقت ..بالله اتزوجت (ه.) و من القريه لهولندا؟؟والله قفزه كبيره! انشاالله اعصابا قويه

تحياتي يا هباني و خلاص البترول و طلع!!

--------------------------------------------------------------------------------
مداخلة: #29
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: هشام هباني
التاريخ: 04-11-2006, 09:56 ص
Parent: #28


..........................

--------------------------------------------------------------------------------
مداخلة: #30
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: فيصل محمد خليل
التاريخ: 04-11-2006, 10:25 ص
Parent: #29


نحن برضو طلع لينا بترول يا حمام.

عقالي جاهز

--------------------------------------------------------------------------------
مداخلة: #31
العنوان: Re: سبحان الذي اسرى بعبده الطكاسي هباني من دالاس الى نعيمة؟؟
الكاتب: عصام أحمد
التاريخ: 05-11-2006, 08:16 م
Parent: #1


.


--------------------------------------------------------------------------------