مكتبة هشام هباني التكاسي هباني ماخد زمبة كبيرة قبل يومين في 77 دولارا!!
22-11-2006, 11:29 ص المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1199946416&rn=0
--------------------------------------------------------------------------------
مداخلة: #1
العنوان: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 22-11-2006, 11:29 ص
قبل يومين وبينما كعادتي اليومية وانا بالمنزل منهمك في النت رن جرس (الموبايل) واذا بمحدثي وقد كان زبونا سابقااعطيته رقم هاتفي قبل اكثر من شهرين وهو من ابناء الخالة( الامريكان السود) وقد طلب مني خدمة ان اوصله لمكان مشهور للتسوق بمدينة دالاس.... (وطبعا ده مشوار بن كلب.. اخوكم علي طول فرتق من الانترنت وما كملت الكماجة الكانت بين وبين ناس الحيكومةاليومية وقصة تعرصتهم وتمنعهم مع الامريكان والشرعية الدولية مرة بالكوندوم ومرة من غير كوندوم وجهجهوا كوفي عنان ظاااطو وجهجهو المجتمع الدولي....بس بقو زي حمارة شايع قدام الطاحونة... تفنجط وترفس.. وضرب وجهاد شديد في حنك المسكين لمن قرب اتكسر....المهم في النهاية اكلت البرسيم المعلوم!!)
وصلت بالتاكسي امام منطقة سكن الزبون وهو مجمع سكني محترم.. وخرج ( ود الخالة) يترنح كعادته في مشيته و(سرواله الناصل) يحمل (كيسا) راقيا للهدايا في يده وهو في اوائل العشرينيات من العمر.. فحياني وحييته وادرت محركاتي منتشيا(سداري)...ووصلت المكان المعلوم... وترك (الكيس) في المقعد الخلفي للتاكسي واخبرني ان انتطره وسيعود بعد عشر دقائق.. وبالطبع سيكون( العداد جاريا) اي يتنزل دولارات والتاكسي في محله.. وفعلا بعد عشر دقائق اتي يحمل كيسا اخر.. وحياني وحييته وطلب مني الذهاب الي مكان اخر للتسوق وهو ايضا مكان محترم..وبالفعل اوصلته لذات المكان المقصود وترك ايضا الكيسين هذه المرة في السيارة و( العداد) حينها تجاوز الخمسين دولارا !! وفعلا اتي الشاب بعد عشردقائق بالتقريب واخبرني بانه قد نسي هاتفه الجوال في مكان التسوق الاول.. وفعلا انتشيت جدا وقد قلت في نفسي هلا هلا الليلة احمد ونضال حيعضوا عضة بت كلب) وفعلا وصلت مكان التسوق الاول حيث نسي زبوني هاتفه الجوال وترك ( الكيسين) وسالني ان كنت ساقبل( كريدت كارد ولا كاش) بالطبع (الكاش) هو سيد الدفع!!
( اها علي الطلاق اخوكم واقف قريب ساعتين والعداد وصل 77 دولار والزول ده لي هسع ما جاء.. وقمت قلت في نفسي ولا اهمك يا ابو احمد المال تلتو ولا كتلتو طالما معاي الكيسين المحملين بالهدايا.. ورفعت الكيسين من المقعد الخلفي.. وحشرت راسي جوووه الكيس الاول.. لقيت فيهو منديل قديم وسخان وحزام كمان قديم بتاع جيش.. قلت اللهم اجعلو خير نشوف الكيس التاني... طلع الكيس التاني فيهوبنطلون قديم مقطع!!
يعني اخوكم انضرب زمبة من الشافع ده... مضيع زمن ساعتين وبنزين وجهد واعصاب.. وعلي طول طرشق علينا ليلة السبت ما في ليها نفسيات للشغل بعد ده... ورجع هباني التكاسي للبيت زي ديجانقو في افلام الكاوبوي.. شايل سرجو في ايدو وهرب منو الحصان... وانا انعل دين ام الانقاذ وكلاب الانقاذ ودين الفاسدين والمفسدين الخلونا نزازي المزازاة السجمانة دي في الرزق من زقاق لزقاق ومن بار لبار ومن كباريه لكباريه.. وهم اولاد الهرمة نهبوا مال البلد واستمتعوا بخيرات البلد والناس الشرفاء اولاد البلد مجهجهين الجهجهة الشينة دي.... خلي الامريكان ان شاء الله الدور ده اجوكم من غير كوندوم!!)
هباني
--------------------------------------------------------------------------------
مداخلة: #2
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: Moawia Mohammed
التاريخ: 22-11-2006, 12:07 م
Parent: #1
ولا يهمك يا أبو الزمل الجاتك في مالك سامحتك والحمد لله البقت في القروش وبقيت سالم انت.
أخوك بشتغل بالليل بس نظام تيم لييس وكدا نعمنو الواحد الصباح بمشي المدرسه وطبعا انت سيد العارفين شغل الليل خطر شي سكاري وشي بص الكاسينو بتاع القمار وشى ناس وهم كدا ما تعرف بالليل دا ماشين وين , قبل اسبوع كدا ركبوا معاي تلاته من أولاد الخاله , اها يا أخوانا أدونا العنوان قالوا لي أمشي ونحن بنوريك ولافين بي زي المروحه أتاريهم بيفتشوا لحته مضلمه واحد فيهم شابكني ليك يمين شمال يمين شمال وأخوه التاني بيملي فيهو بالراحه لكن أنا سامعوا لمن جينا في حته كدا ككو حايم فيها مافي وقام قال لي بس هنا , وانا قلت الليله وقعت وما سميت ضرب وقلع قروش الليله يا كاتل يا مكتول بس وقفت ليك التاكسي ومديت يدي أولع النور أسمع ليك كب كرب التلاته سوا وفي لحظه واحده عملوا ليك شتات وقاموا جارين علي اليمين الكشيف حسن منو وموسي جوده منو حيث لا أثر لهم وبقيت أضحك براي علي أولاد الخاله والحاله الوصلوا ليها والخيابه البقت عليهم , غايتو اتعوضت الله في الفير وطبعا لا بوليس لا حاجه يجيك بعد ربع ساعه ويشبكك سين و جيم وزمنك ظاطو يضيع ساكت , الله يكون في العون ساي يا فرده.
--------------------------------------------------------------------------------
مداخلة: #3
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 22-11-2006, 01:19 م
Parent: #2
ازيك يا معاوية يا فردة!!
والله حمدا لله طلع عندنا زميل تكاسي تاني غير التكاسي الوسيم سيف جبريل
اولا حمدا لله علي السلامة... الجات في القريشات.. والروح سليمة..
عارف انا مقرر في اليومين الجايات ديل انزل بوست بتاع ارشادات و نصائح
لاخوانا عموم التكاسة البرالمة,,, بخصوص التحوطات الامنية في حال وقوع متل هذه المطبات
والزنقات الخطرة والتي تعرض ارواحهم فيها للخطر.
عموما اهلا بيك وتحياتي
لكل الزملاء التكاسة عندكم
هباني ظااااااطو
--------------------------------------------------------------------------------
مداخلة: #4
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: Moawia Mohammed
التاريخ: 22-11-2006, 01:37 م
Parent: #1
شكرا يا زعيم
ونحن هنا في دنفر التكاسه كتار شديد لكن أخوك لسه جديد يادوب سته شهور
فعليك الله يا هشام أعمل البوست سريع وأدينا فيهو كل الارشادات التأمينيه
وبرضو ارشادات كيف تعمل قروش في أقل زمن ممكن مع مراعاة الفروقات بين
مدينة والتانيه , ونحن في انتظارك.
--------------------------------------------------------------------------------
مداخلة: #5
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 22-11-2006, 08:18 م
Parent: #4
معاوية
سلامات
معليش الليلة الشغل سجمان ودي ياهاالجية !! و(thanksgiving) ده عندنا بكتل الشغل
والامريكان بركلسوا فيهو في بيوتهم زي عيد الضحية عندنا... غايتو بكرة ديوك الروم في اكبر مجزرة( هولوكوست) عديل ومعاهو الشربوت الامريكي ( النبيذ)!
تحياتي لتكاسة كلورادو,,, و الغريبة قالوا دنفر دي كلها ناس كوستي... بالله سلم علي ناس بحر ابيض ناس كوستي اهلناواولاد الاتحاديين الطيبين هاشم حسب الرسول وابراهيم وحسن الطويل وسلامي للاستاذ صديقي بشار الكتبي وكل الدنافرة!!
ان شاء الله البوست بتاع الارشادات بنزل في اليومين الجايين ديل..
محبتي واحترامي
هباني
--------------------------------------------------------------------------------
مداخلة: #6
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: عواطف ادريس اسماعيل
التاريخ: 22-11-2006, 11:32 م
Parent: #1
صباح الخير ياهشام
معليش تعيش وتاخد غيرها والجاتك في مالك سامحتك وبعدين كونه المقلب جاء من ود الخالة دي
ذاتها بتخفف شوية لكن لو كانت من عيون زرق كان المغسة كتلتنا الهم دير بالك على حالك فهذه
المهنة بها الكثير من المخاطر والمقالب وإنشاء الله يكون آخر مقلب .
--------------------------------------------------------------------------------
مداخلة: #7
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 23-11-2006, 00:59 ص
Parent: #6
اختنا العزيزة عواطف
سلامات
Quote: معليش تعيش وتاخد غيرها والجاتك في مالك سامحتك وبعدين كونه المقلب جاء من ود الخالة دي
ذاتها بتخفف شوية لكن لو كانت من عيون زرق كان المغسة كتلتنا الهم دير بالك على حالك فهذه
المهنة بها الكثير من المخاطر والمقالب وإنشاء الله يكون آخر مقلب
اهو الحمد لله جات علي القريشات... الله اهديهم اولاد الخالة اهو ده طلع برضو ود ناس مؤدب جدا ما مرق المسدس الصاقط وختاهو في عنقرة المسكين هباني.. كان هسع يتم احمد ونضال شان حبة دولارات...يعني مهنة بت مليون كلب!! لكن برضو اهون من حال اهلنا الفي البلد هناك في الوطن.. مشكلتهم ما مع الرباطين والنشالين الغلبانين الجعانين..الرباط هناك هو الدولة ظااااااااطها... تتلب عليك في بيتك نص الليالي.. اجيبوا اجلك وان كانوا خلاص اولاد ناس بقعدوك في قزازة الكوكاكولا.... وان رحموك خلاص فتيل ( ابو فاس)
قدر المقاس!!
الا رحم الله شعب السودان وجعل مثواه الجنة!
محبتي واحترامي
هباني
--------------------------------------------------------------------------------
مداخلة: #8
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: Amin Hamad
التاريخ: 23-11-2006, 01:08 ص
Parent: #1
الفاضل هشام
وضيوفه الكرام
امتهنتها لمدة عامين أقرنين أملحين، وشفت الويل وسهر الليل، واعمل علي اتجاوز منطقتها في ذاكرتي
قدر المستطاع، وكلو كوم وايام البرد والجليد كوم اخر فكنت حين اعود حوالي الرابعة صباحاً بعد
عمل لمدة 12 ساعة متواصلة تستغرق عملية طرح وتفكيك اطرافي المختلفة ساعة كاملة
تكون زوجتي خلالها تنعل في سنسبيل الكان السبب، واستمر بعد ذلك في اطلاق اصوات انينية
مختلفة النغمات لمدة ساعة اخري وبعدها انتقل الي معاناة الكوابيس والمسدسات ورغم ذلك
كنت امناً مطمئناً، الي ان جاءني يوم ان شاء الله ما يشوفو تكاسي بعد كده، كنت الاول في
الصف وعيني مفنقلات علي بوابة الكازينو في انتظار زبائن ما بعد الثانية صباحاً والمشاوير
الطويلة والبقشيش الما خمج، وفجاءة يفتح الباب الخلفي مباشرة واذ بجسمين يضغطان علي كليتي
الاثنين من الخلف، علماً بأن سيارتي كراون فيكتوريا واسعة وبرحة، وهالني المنظر حين اردت
استطلاع الامر، فوجدت رأساً ضخمة محنية للأمام بسبب قصر سقف العربية رغم ارتفاعه، فاستدركت ان الذي
بكليتي هما ركبتي ذلك الكائن البشري الاستثنائي، ويا لهول صوته عندما امرني بالتحرك،
صدقني عزيزي توقف مركز التفكير عندي حتي انني لم استطع قفل الطاقة الزجاجية التي تفصل بيننا
وامتثلت لتعليماته وانا متيقن من هلاكي، ولتاكيد احساسي امرني بدخول احد الازقة الاكثر ظلاماً فتوقفت
فقال"انت خائف" فقلت لا اخاف من شنو" وكان صوتي زي صوت واحد عندو اب كباس، لا اطيل
عليك توكلت علي الحي الذي لا يموت ودخلت زقاق المدق وانا ارثي لحالي فنهايتي حتماً هنا وبايدي
ابن الخالة الذي لا يعرف مدي تعاطفي معهم عموما قلت في نفسي كترت البتابت عيب، وسبحان الذي
يحي العظام وهي رميم فقد عبرنا الي الشارع العام واوقفني امام بناية محترمة وبدأ في عملية الخروج
وهو يسألني "انت مسلم" فأجبت بصوت جهوري "نعم" فقال "السلام عليكم" فقلت"سلمك البلاء
اليخمك" دي تقولها من البداية عشان احس بالسلام في وجود أمثالك يا بعشوم، نلقاها منك ولا من الكيزان
أبقي عشرة وأحمد يتعشي ان شاء الله في وطنه
أمين حمد
--------------------------------------------------------------------------------
مداخلة: #9
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 23-11-2006, 09:29 ص
Parent: #8
الجميل امين
سلامات يا فردة اهو واحد طلع قرايبنا تكاسي
يا خي انت زول تكاسي حكاي شديد ممتع في التصوير
بالله مد لينا البوست ده بحكاويك من النوع ده
وطبعا قبالك في الفردة سيف جبريل برضو من النوع الخطير
في سرد التفاصيل والتصوير..لمن احكي ليك عن سان فرانسيسكو
انت كانك قدام شاشة تلفزيون( ما شاء الله) واهو ظهر كمان معاوية
من دنفر ولسه هو برلوم.. ما اخد ليهو زمبة من الزمبات الصعبة ديك.
شكرا يا امين علي المساهمة الممتعة.
ومن هنا اناشد التكاسة بالبورد ان يمدونا بمساهماتهم
المفيدة والممتعة من خلال معايشاتهم اليومية لمهنة التاكسي.
لي قــــــــــدام
سندة نسينا ندي الحكومة بت الكلب حقها...حرامية اولاد كلب مجرمين
وقتلة وسفلة ان شاء الله الامريكان وكوفي عنان اجوكم الدور ده من غير كوندوم!!)
--------------------------------------------------------------------------------
مداخلة: #10
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: Moawia Mohammed
التاريخ: 23-11-2006, 10:43 ص
Parent: #1
تعرف يا فرده وأنا جديد كدا قاموا الجماعه الخبره أدوني ليك سلك قالوا لي المطار هابي شديد طوالي شتت ليك المطار وقفت ليك العربيه في الصف وجهزت التوكين بتاع المخارجه من القيت واديتا ليك كوتشينه بت كلب لمن دوري جا دورت يا حبه طوالي علي التيرمنال جاتني ليك وليه كدا قالت لي انا جايه من المانيا وعندي اجتماع بكره الصباح وحاجزه في فندق شنو كدا ما عارف وأدتني العنوان تقريبا كدا أربعين ميل من المطار يعني مشوار جامد , قلت ليها ما عندك عوجه تب وصلتي وشديت سلك لود خالي التكاسي الخبره وهاك يا عربي تقيل لمن المره خافت , قريبي قال لي ما تخاف يا فرده طالما عندك هديدهthere is no awaja at all بس ركز معاي وأخوك شد ليك الهاي وي دا زي المافي حاجه وبعاين لل exit القالو لي , بس في نص السكه القي ليك حادث كبير والبوليس قافل الشارع لكن في حته صغيره ما مقفوله , أنقر أنا اشتغلت ليك بالبوليس طوالي خرمته ليك بالفرقه وشتت وباقي العربات مرقت من الهاي وي الا أنا , يا زول بعد مسافه كدا القي الحادث والبوليس مولع لي البطاريه وقفني ليك وقايل انت ماشي وين أرجع بدربك دا زاتو , قلت ليهو أرجع عكس الشارع يعني , نهرني ليك وقال لي ايوا أرجع عكس الشارع هو في زول غيرك دخل هنا وقام طوالي ضرب للعسكري التاني الخرمته منو , قلت الليله المشوار راح في حق الله تكت تكت , وحاتك وقف العربات وخارجني بدون أي حاجه لكن أمشي وين ما عارف واتضح لي انو تاني مافي حته قريبه تخش بيها الهاي وي ودي السكه الوحيده للفندق , بس طوالي التلفون لقريبي صاحبنا زاتو غلبوا يخارجني من ورطتي , وقال لي خليك معاي في الخط أنا حادخل فلان معانا , وأول سوأل سالني ليهو قال انت ماشي شمال ولا جنوب قلت يا مان انا كان عارف بسألكم ويلا قعدوا ينظروا لي لمن الواطه قربت تصبح والوليه أتجرست وقعدت تبكي وشبكتني ليك أنا عندي اجتماع الصباح ولازم أمشي أنوم , قلت ليها يعني أعمل ليك شنو ودي ما غلطتي , قالت لي أضرب البوليس قول ليهم نحن رايحين , ضربت البوليس قعدوا يوصفوا لي كدا وصف ما فهمتوا شبكوني ليك أمشي الهاي وي الفلاني وأطلع بالفرتكاني وأنزل بوين كدا ما عارف , وكل مره أقول ليهم دقيقه خليك معاي قامت قفلت الخط في وشي نظام ما فاضيه لي وكدا , طوالي يا معلم وقفت ليك التاكسي برا الشارع وولعت ليك النور وطلعت كتاب الخرائط , وبعد تلتله لقيت ليك في الخرط طريقه أرجع بيها للهاي وي بعد مكان الحادث
ولمن وصلتها ليك كان الساعه 2 صباحا والعداد عامل 177 دولار , قامت قالت لي أنا جيت نفس الفندق السنه الفاتت بي 80 دولار قلت ليها ما مشكله بس المهم أتخارج منها , وقالت لي كاش مافي كركدي ينفع قلت ليها كركدي آبري دكوه أي حاجه بس خارجينا ونزلتها ليك واتخارجت ومن اليوم داك اقتنعت ليك بس تفتح الخريطه وتشوف لا تلفون لا حاجه , أو تشيل معاك اللابتوب وكمان كان مقتدر تشتريGPS وتدعك.
--------------------------------------------------------------------------------
مداخلة: #11
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: السر عبدالله
التاريخ: 23-11-2006, 10:56 ص
Parent: #10
يا هشام هبانى اولا حمدالله على السلامة واحمد الله انك حى لغاية هسع.. يعنى ود الخالة ده كان رحيم جدا بيك وما قتلك وشال قروشك والحمد لله خلاك حى ومشى .. وبعدين انت بدل ما تسب لناس الحكومة كان تسب اولاد الخالات ديل بالاول .. وبعدين انت الجابرك شنو هسع اذا انت رجعت السودان مش ممكن تشتغل قاضى قدر الدنيا!!!! ونحن سمعنا ان اى زول بيرجع السودان من المغتربين والمهاجرين بيشغلوه فى نفس وظيفته وبيعدوا ليه السنوات الكان مغترب فيها يعنى انت يا هشام اذا رجعت حتشتغل رئيس القضاء اذا فرضنا انك مغترب او مهاجر ليك 15 سنة
--------------------------------------------------------------------------------
مداخلة: #12
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 23-11-2006, 11:03 ص
Parent: #10
معاوية الجميل
سلامات يا فردة يا حكاي
اولا خليني اسوي المعلوم في شتم حكومة الخرطوم
حكومة حرامية و فاسدين ومشوهين طلعت دين البلد وعرضت الوطن للتقسيم
والاحتلال واهو تتمنع مرة ضد القوات ومرة مع القوات.. في النهاية
لا بد من سنجة والرنجة وان طال التمنع!!
المهم في الموضوع طلعت زول تفتيحة وبتتصرف صاح
لكن الخواجية تكون ندهت ليك كل اولياء الله الالمانيين والاوروبيين
لكن يبدو ان الفقراء والجبارة حقتنا قوية!!
بجيك صادي...عندي مشوار
هباني
--------------------------------------------------------------------------------
مداخلة: #13
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 23-11-2006, 02:21 م
Parent: #12
..............................
--------------------------------------------------------------------------------
مداخلة: #14
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: SAdo7
التاريخ: 23-11-2006, 02:24 م
Parent: #12
اخونا ابواحمد
يااخى اهلنا بقولوا الجاتك فى مالك سامحتك
ويا زول ان شاء الله ربنا ابعد بيها منك كل شر
ربنا اعوضك احسن منها
وان شاء الله ربنا اديك العافيه لابوحميد والاخت نضال
--------------------------------------------------------------------------------
مداخلة: #15
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 23-11-2006, 04:38 م
Parent: #14
شكرا يا سيد لا اراكم الله مكروها في حياتكم
--------------------------------------------------------------------------------
مداخلة: #16
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: ABDELMAGID ABDELMAGID
التاريخ: 24-11-2006, 00:08 ص
Parent: #15
Quote: SAdo7
هشام ود هبانى احوى ...
جنس المنافق الكضاب الجبان الفوق ده خايف اقول اسمو العديل ...
دحين ما تضيع زمنك معاو ... الكلب ...
عبدالماجد
--------------------------------------------------------------------------------
مداخلة: #20
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 24-11-2006, 07:52 ص
Parent: #16
العمدة عبد الماجداخوي
حبابك عشرة.. فارس الحوبة
يا زول مالك ومال المارغوت مووجع راسك
خلينا فوق مع الفيل ظاااااااطو.
محبتي
هباني
--------------------------------------------------------------------------------
مداخلة: #17
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: محمد مكى محمد
التاريخ: 24-11-2006, 03:38 ص
Parent: #1
هشام
سلام يا حبيب
تعيش وتاخد غيرها، اولاد الخالة برضو فيهم (جرادل). استنى الملك فاروق بعد ما يتولى السلطة يمكن يعينك وزير مواصلات .
وبي مناسبة وزارة المواصلات دى ،بلاضافة الى الاسكان ووزارة الثروة الحيوانية ،دائماً كانوا من نصيب الاخوة الجنوبين ،لانها ايضاً وزارات مهمشة.التهمش لاحق حتى الوزارات.
تحياتى
--------------------------------------------------------------------------------
مداخلة: #18
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: SAdo7
التاريخ: 24-11-2006, 05:18 ص
Parent: #17
Quote: åÔÇãهشام ود هبانى احوى ...
جنس المنافق الكضاب الجبان الفوق ده خايف اقول اسمو العديل ...
دحين ما تضيع زمنك معاو ... الكلب ...
عبدالماجد
نعمه التربيه والله
كتر خيرهم اهلك عرفوا اربوك كويس
ربنا اكتب ليهم حسن التربيه دى
فى موازينهم
.
.
.
فى فرق بين هاشم هبانى كمناضل
او مدعى النضال وبين هاشم هبانى رب اسره
كمناضل زيرو كبير ما بعرف حاجه اسمها نضال
ولكن كرب اسره نحترمه كما نحترم اخواننا
والموضوع هنا يتعلق به كرب اسره مكافح
وليس كمناضل لذلك ردى كان
بما يليق بالمقال ولكن الفهم قسم وانت
شكلك اهلك عرفوا بس اربوك كويس لكن الفهم
ده قسمه من الله
وصراحه ياعبدالماجد كفايه عليك حسن التربيه
الفهم ده خلى لى غيرك
وبعدين اول مره اشوف لى راجل بقول انا خايف
طبعا ده لو كنت راجل لانو احتمال تكون بنت
وبتكتب باسم راجل
عالم جبانه.
--------------------------------------------------------------------------------
مداخلة: #19
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: abuguta
التاريخ: 24-11-2006, 06:46 ص
Parent: #18
Quote: وانا انعل دين ام الانقاذ وكلاب الانقاذ ودين الفاسدين والمفسدين الخلونا نزازي المزازاة السجمانة دي في الرزق من زقاق لزقاق ومن بار لبار ومن كباريه لكباريه..
.. الليل امسى والبل ححرنو مشيهن
عقبن موية والجبل اب قرود راجيهن
دا الخلانى فرض الخمسة ما مقضهين
رزق الدنيا والمحن البصارع فيهمن
الرواى
ود شورانى
الليل امسى.. ود هبانى سائق التاكسى..
بين بوستن ودلص ..وضواحى .. نيوجرسى...
السبب الخلانا نهاجر ونركب المتقسى....
جربوع البلد....كل لحظة فيها يفسى...
الرواى
ود ابقوتة
--------------------------------------------------------------------------------
مداخلة: #22
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 24-11-2006, 10:39 ص
Parent: #19
ود عمي ابو قوتة
سلامات وعوافي
Quote:
الليل امسى.. ود هبانى سائق التاكسى..
بين بوستن ودلص ..وضواحى .. نيوجرسى...
السبب الخلانا نهاجر ونركب المتقسى....
جربوع البلد....كل لحظة فيها يفسى...
الرواى
ود ابقوتة
علي الحرام شاعرا فحل...لكن اول مرة اعرف انو ابوالجربوع بيفسي!!
يعني حتى ابو الجربوع جهجهوه..اللهم لا اعتراض علي حكمك يا الله!!
--------------------------------------------------------------------------------
مداخلة: #21
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: الفاتح يوسف جبرا
التاريخ: 24-11-2006, 09:44 ص
Parent: #1
Quote: لكن برضو اهون من حال اهلنا الفي البلد هناك في الوطن.. مشكلتهم ما مع الرباطين والنشالين الغلبانين الجعانين..الرباط هناك هو الدولة ظااااااااطها.
على بالحرام يا هبانى ياخوى لو شالو (التكسى) ذاتو (مش ملحوك فى القريشات ديل)برضك بتكون (مرطب) وأحسن مننا ...هنا عندنا (جفاف) خليهو سااااكت .. (ماء غريب) ما بعمل فيهو حاجة !!! يا زول خليها على الله ساكت !!! وخلى الطابق مستور !!!
--------------------------------------------------------------------------------
مداخلة: #23
العنوان: Re: التكاسي هباني ماخد زمبة كبيرة قبل يومين في 77 دولارا!!
الكاتب: هشام هباني
التاريخ: 24-11-2006, 10:47 ص
Parent: #21
استاذي الفاتح
سلامات
Quote: على بالحرام يا هبانى ياخوى لو شالو (التكسى) ذاتو (مش ملحوك فى القريشات ديل)برضك بتكون (مرطب) وأحسن مننا ...هنا عندنا (جفاف) خليهو سااااكت .. (ماء غريب) ما بعمل فيهو حاجة !!! يا زول خليها على الله ساكت !!! وخلى الطابق مستور !!!
الله اعينكم يا الفاتح اخوي من الوزة والحالة المستفزة واديكم الصحة والعزة واطلع الوزة!!
--------------------------------------------------------------------------------
الاشتراك في:
تعليقات الرسالة (Atom)
ليست هناك تعليقات:
إرسال تعليق