الاثنين، 28 أبريل، 2008

سودانـية يهـودية في ضيافة تاكـسي هبـاني ظاااااطو؟؟

مكتبة هشام هباني سودانـية يهـودية في ضيافة تاكـسي هبـاني ظاااااطو؟؟
28-04-2006, 09:10 ص المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1155303562&rn=0


--------------------------------------------------------------------------------
مداخلة: #1
العنوان: سودانـية يهـودية في ضيافة تاكـسي هبـاني ظاااااطو؟؟
الكاتب: هشام هباني
التاريخ: 28-04-2006, 09:10 ص


كانت حوالي الساعة السادسة صباحا من ذات سبت من الاسبات وجاءت الرسالة المنبعثة من جهاز كمبيوتر التاكسي وهي اشبه بصوت ( سوسيو) سوداني يبحث عن امه وهي تجول بين باحات البيت السوداني وتبحث عن رزق لصغارها في زمن ضن فيه الرزق علي البشروالانعام... وكانت الاشارة الصوتيةهذه المرة تشير الي حي راق من احياء مدينة دالاس الامريكية حيث كان اسم الزبونة(ميري)..كعادتي انطلقت الي ذلك الحي الثري وفي البال مشوار طويل وبقشيش طيب..
وصلت ووقفت امام بيت جميل ولكنه ليس بالمنيف كباقي بيوت او قصور ذلكم الحي الراقي... وضغطت علي ذر الكمبيوتر وهو ذر النداء للزبون عبر القمر الصناعي ومنه لهاتف الزبون...خرجت فارعة في اخريات الاربعين من عمرها ترتدي ملابس سوداء وقبعة سوداء ايضا وتكسو الوجه سمرة وملامح سامية ولكنها حيتني بانجليزية بلسان امريكي مبين وحييتها بلسان انجليزي لكين....حالما خبرت بان صاحبه ليس من اهل مكة.... وسرعان ما سالتني من اي بلاد انا...فأجبتها بعزة سودانية في زمن الذل والهوان العظيم باني من السودان..
فردت علي من وراء مقعدي وهي تربت علي كتفي بادب وهي تقول بلسان سوداني لكين ازيك يا زول كيف حالك)؟؟
هنا كادت يدي ان تفلت من المقود من شدة الصدمة..ولكني تماسكت اعصابي..وسالتها وفي بالي انها من شوام المهجر او قبطية مصرية.... وقلت لها: من وين الاخت.........فاجابت:
انا سودانية من السودان..........وانا خرجت من السودان في العام 1968 بعد الحرب العربية الاسرائيلية..........وفي الحال ادركت انها يهودية سودانية..فقلت لها : الاخت يهودية سودانية..........فأجابت: نعم انا يهودية سودانية بل انا ابنة السيد حبيب كوهين رئيس الطائفة اليهودية في السودان...وولدت في السودان وهاجرنا من السودان بعد الحرب بسبب الاجواء السياسية... ولكني احب السودان واحب اهل السودان لاني سودانية وامنيتي ان ارجع السودان واقابل اصدقاء الطفولة هناك وكذلك اسرتي الي الان تحتفظ بعلاقاتها مع بعض الاسر السودانية في اوروبا وفي امريكاواعطتني نماذج من اسماء اسر شهيرة في السودان تربطهم بها علاقات وطيدة... واخبرتني بان والدها قد توفي قبل سنوات... وقبل ان اكمل حديثي معها كانت قد وصلت المكان المقصود وقد كان معبدا يهوديا ذاهبة اليه لاداء الصلوات وكان اليوم يوم عيد يهودي معروف... ونزلت وهي تودعني قائلة: كل عام وانتم بخير واجبتها: وانت بخير.......وهنا قلت في نفسي ما اعظمك ايها الوطن الجميل وطن التسامح والحب والاخاء مسلمون واقباط ويهود ولا دينيون... كلنا من هذا التراب الجميل وكلنا من ادم وادم من التراب والتراب اسود ولذلك جئنا نحن السودانيين من اديم الارض فنحن مبتدأ الحياة ومنتهاها... واحب السودان العظيم...

هباني ظاااطو

--------------------------------------------------------------------------------
مداخلة: #2
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: mohamed osman bakry
التاريخ: 28-04-2006, 09:23 ص
Parent: #1


الـ Tip كان كيف يا هباني?
نفسي أعرف
اليهودي السوداني,جلدة برضو?

--------------------------------------------------------------------------------
مداخلة: #5
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: AMNA MUKHTAR
التاريخ: 28-04-2006, 01:42 م
Parent: #2


Quote: ما اعظمك ايها الوطن الجميل وطن التسامح والحب والاخاء مسلمون واقباط ويهود ولا دينيون... كلنا من هذا التراب الجميل وكلنا من ادم وادم من التراب والتراب اسود ولذلك جئنا نحن السودانيين من اديم الارض فنحن مبتدأ الحياة ومنتهاها





يقال أن بنيامين نتنياهو من أصل سودانى

هل هذا الكلام صحيح ؟

--------------------------------------------------------------------------------
مداخلة: #9
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: Mohamed Elgadi
التاريخ: 28-04-2006, 03:45 م
Parent: #2


Quote: نفسي أعرف
اليهودي السوداني,جلدة برضو?



آأمل دي زلة لسان أو نكتة but not a stereotyping!

regards
Mohamed Elgadi

--------------------------------------------------------------------------------
مداخلة: #3
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: Mannan
التاريخ: 28-04-2006, 09:40 ص
Parent: #1


يا سلام عليك يا هشام ايها الهبانى الجميل وانت تنثر هذه الافكار والقفشات الخفيفة والظريفةفى زمن التجهم والتجبه (من الجبهة) والتوجه (الإحتضارى).. نحن نقرأ لك يا ود هبانى باعجاب فواصل السلخ بالقلم ...

نورالدين منان

--------------------------------------------------------------------------------
مداخلة: #4
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: عاصم ابوبكر حامد
التاريخ: 28-04-2006, 10:28 ص
Parent: #1


الاخ هبانى
لك التحية


والله اخى هكذا هو السودان الذى نحلم به دوما وابدا

وطن حدادى مدادى ...

ربنا يوفقكم اخى ...

تسلموا

--------------------------------------------------------------------------------
مداخلة: #6
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: ناذر محمد الخليفة
التاريخ: 28-04-2006, 02:42 م
Parent: #1


هباني أأأ أخوي !!! ..

ما عارف اقول ليك شنو !! بس خليها بالــ (نية) !!

صنفرة :

ناذر (ظاااااطو) !!!!!!!!!!

--------------------------------------------------------------------------------
مداخلة: #7
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: Saifeldin Gibreel
التاريخ: 28-04-2006, 02:58 م
Parent: #6


الرفيق ابوالزمل اخو الطريق ودهبانى اوع تكون جرجتها

--------------------------------------------------------------------------------
مداخلة: #8
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: عزيز عيسى
التاريخ: 28-04-2006, 03:26 م
Parent: #1


الاخ هشام هباني التكاسي ظاطو،

تصدق يا مؤمن قبل حوالي ثمانية سنوات إلتقيت بواحدة عن طريق الصدفة
في هيوستن تحمل نفس الأوصاف التي ذكرتها أنت.. وسألتني من أي بلد..
قلت ليها أنا من السودان.. الست دي من شدة الفرح لمان قربت تطير..
ونفس الشيء سلمت علي باللهجة السودانية.. وقالت لي أنا سودانية مولودة
في السودان ولي فترة طويلة عايشة في امريكا.
ونظرا لأني كنت على موعد ضروري وطبعا متأخر وجاري
لكن الظروف ما سمحت إني أتحدث معاها لفترة أطول وأحصل على عنوانها
أو حتى رقم تلفونها علشان إتصل بيها..
أديتها رقم تلفوني علشان تتصل بي..
ومن تلك اللحظة ولغاية الآن ما إتصلت ولا حتى إلتقيت بيها..
تفتكر تكون ياها هي (ظاطا)..

تحويلة:
يا هشام بتأخذ تاكسي طلب على هيوستن؟..

--------------------------------------------------------------------------------
مداخلة: #10
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: محمد احمد ابراهيم
التاريخ: 28-04-2006, 05:23 م
Parent: #1


الاخ العزيز/ هشام هبانى
الذى يعرفك يعرف السودان و لو كان عابر طريق
فناهيك اذ كانت سودانيه
فمرحب بها و دارنا ترحب بها
وطن حبيبنا

--------------------------------------------------------------------------------
مداخلة: #11
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: يازولyazoalيازول
التاريخ: 29-04-2006, 04:02 ص
Parent: #10


كل مرة يزداد إعجابى بك يا هبانى السودانى

تحياتى

--------------------------------------------------------------------------------
مداخلة: #12
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: برير اسماعيل يوسف
التاريخ: 29-04-2006, 04:20 ص
Parent: #11


Quote: وهنا قلت في نفسي ما اعظمك ايها الوطن الجميل وطن التسامح والحب والاخاء مسلمون واقباط ويهود ولا دينيون... كلنا من هذا التراب الجميل وكلنا من ادم وادم من التراب والتراب اسود ولذلك جئنا نحن السودانيين من اديم الارض فنحن مبتدأ الحياة ومنتهاها... واحب السودان العظيم...




هبة ود هباني في كيزان هذا الزمان الفاني.

سلام و تحايا لنضال و احمد و اخلاص و تقبل سلام مني و بلسم و بسمة... و الله يا ود هباني زمان كنا بنقول القدم ليه رافع... هسع بقينا نقول الخشم ليه رافع... شوف جنس المحن دي ... و الله متلومين معاكم تب ... انت و الاسرة.

--------------------------------------------------------------------------------
مداخلة: #13
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: ودقاسم
التاريخ: 29-04-2006, 04:30 ص
Parent: #1


هشام
شكرا ،، فأنت دائما تذكرنا بالزمن الجميل ، وليت السودان يعود من جديد وطنا للكل ومساحة للتعايش الديني ..

--------------------------------------------------------------------------------
مداخلة: #14
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: كوليل
التاريخ: 29-04-2006, 06:00 ص
Parent: #1


انت عارف ياهبانى

قاعد اقراء لى فى كتاب اسمو اليهود فى السودان (مكى أبوقرجة)

بجيب ليك خبر اليهودالسودانين الفى امريكا ديل

النروق شوية كدا

--------------------------------------------------------------------------------
مداخلة: #15
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: هشام هباني
التاريخ: 29-04-2006, 07:19 ص
Parent: #14


الاعزاء/ امنة,القاضي,محمد عثمان,منا,عاصم,ناذر,سيف,عزيز,محمداحمد,يازول,برير,ودقاسم وكوليل
لكم التحايا والحب الاعزاز

نعم انه السودان الذي نريد سودان التسامح والاخاء والمحبة والسلام والمساواةوالعدالة والديموقراطية....نريد لمثل هذه السودانية اليهودية المشردة بل كل يهود السودان ان يعودوا لبلادهم ولكل اقباط السودان الذين طاردهم الخونة و( طلعوا صليبهم) وقسروهم علي هجرة الوطن ان يعودوا لبلادهم وايضا نريد لكل السودانيين المسلمين الذين شردهم القتلة والاوغاد و ( طلّعوا دينهم) ان يعودوا للوطن..فيوم النصر ات قريب وسيبقي السودان مبتدأ الحياة ومنتهاها وانا لله والي السودان ايضا راجعون.. محبتي واحترامي


هباني ظاااطو

--------------------------------------------------------------------------------
مداخلة: #16
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: هشام هباني
التاريخ: 29-04-2006, 09:06 ص
Parent: #15


الاخ كوليل

تحياتي

والله ياريت لو زودتنا بمعلومات عن كتاب الاستاذ ابو قرجة عن يهود السودان
فهذا مهم جدا جداوخاصة انهم ظلوا جزءا من النسيج الاجتماعي والسياسي السوداني لفترات طويلة وقد ساهم منهم نفر في الحركة الوطنية من اليهود السودانيين الذين اسلموا لاحقا وعلي ما اذكر السيد المرحوم ابراهيم اسرائيل والذي قد كان عضوا فاعلا في حركة مؤتمر الخريجين وهو علي ما اظن خال للسيدة الاستاذة فاطمة احمد ابراهيم وشقيقهاالشاعر المناضل صلاح احمد ابراهيم ومرتضي احمد ابراهيم وهنالك من الاسرالسودانية الحالية من اصول يهودية وهم وطنيون لا يشق لهم غبار وقد تناول الامر في هذا المنبر الاخ عضو المنبر(ملك نبتة)في بوست خاص حول يهود السودان وهو يجمع معلومات عنهم ويبدو انه يعد لموضوع عنهم.... والعبد لله ايضالدي اهتمامات بهذا الامر حيث اني متخصص في اللغة العبرية وايضاافكر في جمع معلومات لتناول تاريخ يهود السودان ودورهم الوطني والثقافي والاجتماعي وايضاشقيقي الاصغرالصادق هباني هو استاذ اللغة العبرية الوحيد المتخصص فيهابعد بروفيسورابراهيم الحاردلو في السودان وهو الان يعد في اطروحة الماجستير في اللغة العبرية من جامعة القاهرة بمصر حيث اوفد من قبل (جامعة شندي) باعتباره رئيس قسم اللغة العبرية بجامعة شندي... والذي افتتح لاكثر من ثمانية اعوام بتوصية من نائب الرئيس الاسبق الزبير محمد صالح ...يعني تخيل اللغة العبرية في السودان تدرس في جامعة شندي وعلى ما اظن لا زالت تدرس في جامعة الخرطوم كلية الاداب حيث كان استاذها الاوحد البروفسور ابراهيم الحردلو متعه الله بالصحة وليست كلغة تخصص بل في سياق دراسة مقارنة مع العربية باعتبارها من اللغات السامية....

اخي عزيز عيسى
ربما تكون التي التقيتهاانت في مدينة هيوستون هي ذات السيدة التي التقيتها بنت السيد حبيب كوهين حيث تقيم طائفة يهودية شرقية كبيرة بمدينة هيوستن....

الاخ برير

والله مشتاقين.............تحياتي للمدام والعروستين


يازول يا سمح

تسلم يا عزيز وليك محبة


دكتور القاضي

لك التحايا والاحترام ايها الوطني الهميم


امنة مختار

الجسورة النبيلة........دوما كما تعودنا انك في المقدمة ولي قدام

ناذر الخليفة

تحياتي ولك الود وقووووووووووووووول العندك ما تخجل؟

منان يا جميل

كيف ناس واشنطون.........كما عهدناك جميلا واضحا شجاعا.........كن بخير

صديقي التكاسي ود جبريل

احب الطاكسي يا جميل واحب سواقو ود جبريل....واصل حكاويك يا جميل...


الحبيب محمد احمد
كيفنك والاسرةوالقاهرة ايها المناضل الجميل ولك الود والاحترام

الرائع ود قاسم

كيفنك يا ود عمي .....والله اديك العافية والمنبر دوما بخير طالما فيه امثالكم الشرفاء
والبركة في الجميع في فقيد الوطن بن الزعيم الازهري وعشت بخير وتحياتي لمعتوق والطوال والقنابيل وكمبو الفضل وكل اهلنا العركيين..

الجميل عاصم ابو بكر

سلمت ايها الرائع النبيل ودوما كما عهدتك اصيلا

محمد عثمان بكري

ظريف التعليقات ( نص الكم)

السيدة حلفت طلاق تدفع وانا حلفت طلاق ما تدفع والتاكسي ظاااطو حلف طلاق انو نحن الاتنين ضيوفو اها رايك شنو...شوف لي حسن الترابي احلها لينا؟؟

محبتي واحترامي

--------------------------------------------------------------------------------
مداخلة: #17
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: sari_alail
التاريخ: 29-04-2006, 03:13 م
Parent: #1


فردتنا ودهباني...
ورد اسم حبيب كوهين في كتاب يهود السودان لمؤلفه الياهو سولومون ملكا...مطبوعات جامعة سراكيوز1997
عليك بالكتاب يا فردة...
وتسلم

--------------------------------------------------------------------------------
مداخلة: #18
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: ابوعسل السيد احمد
التاريخ: 29-04-2006, 03:30 م
Parent: #17


ما أعرفه أن هناك يهود آثروا البقاء في سودانهم برغم جرائر المحن التي تسببت بها لهم حروب السودان العروبية و مواقفه إلى جانب الدول العربية و برغم رعبهم اليومي من المشروع الاستعلائي الحضاري الإقصائي المستعرب المتأسلم. هؤلاء أشخاص مثلهم مثلنا فيهم الأصفر و القمحي و الأسمر و الأبيض و لذا فقد أخفوا هويتهم اليهودية ليظلوا عائشين في وطن لم يعرفوا وطنا غيره، و بعضهم ما زال الناس يعتقدون أنه من الإخوة الأقباط لبياض لونه. كما أن هناك أسرا بحالها و قد أثرت الحياة السياسية و الثقافية و الفنية في السودان و هم يهود منصهرون تماما في نسيجنا و هويتنا السودانيين، حتى أن أسماءهم هي أسماء لا تستوقف أحدا عندها مثل يوسف و إسحق و جميل.. و كم هو جميل السودان المتسامح بتعدديته التي أصبحنا نفتقدها منذ دهور.

--------------------------------------------------------------------------------
مداخلة: #19
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: Balla Musa
التاريخ: 29-04-2006, 07:14 م
Parent: #18


ياهو دا السودان
قدح كسره
مسيد وكنيس
ومعبد دين
تلاوة لوح
جرد اوراد
درس انجيل
وناس بى هناك تسب الدين
وكل زول حر وبت حره
سبت واحد
رنين اجراس
وصوت آذان
وجون وجمال
وعشه وميرى
متآخين
وكلنا كنا فد اسره
تشوف ميشيل مشى المولد
واحمد هنا ميخائيل
وعشان نتقاسم الحلومر
حنا يشابى لى رمضان
ياهبانى دا الماضى
والحاضر صبح حسره
حليلك انت ياسودان
حليلك لما كنت زمان.

--------------------------------------------------------------------------------
مداخلة: #20
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: هشام هباني
التاريخ: 29-04-2006, 08:22 م
Parent: #19


العزيز/ ساري الليل

لك عاطر التحايا

تشكر علي المعلومة القيمة وبالتاكيد ده مرجع قيم جدا بساعد في اي دراسة حول يهود السودان ودمت بخير مع تمنياتي لكم بالنجاح والتوفيق يا( فردة) مع محبتي واحترامي



الجميل العسل ابو عسل

كتر خيرك علي التوضيح المفيد وبالتاكيد سيعود ذلكم السودان الحلم الجميل كما كان بعد انقشاع حجب الظلام والتعتيم ليعود وطنا للاخاء والتسامح والمحبة والسلام بمسلميه ومسيحييه ويهوده وكجوره وبقية كريم المعتقدات ودم بخير


الشاعر الفحل دكتور بلة

يبدو اننا بحق امام تفتق شاعرية ثرة تجمع ما بين المبضع ولسان البادية الجميل
في اشيائكم المشعورة وهي تنم عن مناهلكم الاصيلة المتشربة بتفاصيل الوطن الجميل وهي مستودع القيم والتراث الجميل....ولا عدمنا هذا الاحساس الوطني الجميل...


لكم محبتي واحترامي


--------------------------------------------------------------------------------
مداخلة: #21
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: ABDELMAGID ABDELMAGID
التاريخ: 29-04-2006, 08:58 م
Parent: #20


ود هيانى هشام
مساك الله بالخير
ات نعم اللخو ..
ات دحين اليهودى ده ماهو مؤمن بالله و أخو نسب و دين ؟؟؟
و كمان نحن مسلمين ...
و بنتدين بديانة نبينا محمد الأمين ...
الذى تزوج باليهودية صفية بنت حى بن أخطب لتكون أم المؤمنين ...
فتحن كلنا أصحاب عقيدة و ʻن كره الأصوليين ...
عبدالماجد

--------------------------------------------------------------------------------
مداخلة: #22
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: هشام هباني
التاريخ: 29-04-2006, 09:32 م
Parent: #21


عبد الماجد اخوي


هو البهايم دي كان عندهم طايوق كان الحصل حصل....ديل مش المشكلة اليهود والمسيحيين في السودان هم البعانوا منهم ديل ضيعوا المسلمين و( طلعوا دينم وعينم)؟؟؟
هباني

--------------------------------------------------------------------------------
مداخلة: #23
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: Mamoun Ahmed
التاريخ: 29-04-2006, 11:06 م
Parent: #1


الامير
هشام ود هباني

كيفك يالحبيب؟

الموضوع مهمززونحنا لا يمكن ان نخسر شيمنا في الضيافة
عشان قضايا اصلا اهلها باعوها

لو تذكر ياهشام ونحن صغار قبل ماندخل المدرسه
مايعد ثورة اكتوبر اظن...
في الدويم طردو تجار وقفلو محل كبير
ربما بدعوى انهم بهود او عملا
نسيت اسماهم لكن القصة ماسكة في راسي


لك التجلة والتحية
بعدين جيب لينا البوست بتاع دويم شات وينو؟

--------------------------------------------------------------------------------
مداخلة: #24
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: هشام هباني
التاريخ: 30-04-2006, 02:26 ص
Parent: #23


مامون الجميل

(عارف يا مامون ما شاء الله عليك ذاكرتك سنينة)....فعلا كان هنالك تاجر يهودي في دكان حسن محمد علي الحمادابي الواقع غرب جامع الدويم الكبير مباشرة وغرب محل العجلاتي (حسن متنك) واليهودي ده كان تاجر اقمشة واسمه الغريبة ( مجاهد) وانا اتذكر جيدا بعد حرب حزيران 1967 ان سرت اشاعة ان مجاهد اليهودي كان يعمل جاسوسا لدى اسرائيل وكان يسرب اخبار مجلس الدويم الريفي وبعض مغامرات الضباط الاداريين في الدويم الي اذاعة اسرائيل( طبعا اشاعة مخستكة وساذجة)وفعلا اتذكر انه قامت مظاهرة متشنجة جدا من سوق الدويم واتجهت الي دكان اليهودي مجاهد وكان بعض المتشنجين يحملون جالونات مليئة بالبنزين كادوا ان يحرقوا الدكان لو لا تدخل البوليس ولكن خربوا الدكان... وبقية التفاصيل التي سمعت بها ان مجاهد لاذ هربا مستجيرا من الغاضبين بعمنا المرحوم الناظر ادريس هباني في منزله بالدويم والواقع شمال دكان مجاهد وفعلا حماه الناظر ادريس هباني ومنع الناس من ايذاء هذا الرجل المواطن البريء..وفعلا بعدها مجاهد سافر وترك مدينة الدويم وخرجت شائعة بانه ذهب مهاجرا لاسرائيل.......ولكن في سنوات الجامعة علمت بان مجاهد لم يهاجر بل ظل مقيما بالخرطوم ولديه متجر للاقمشة بالقرب من استوديو محمدين بشارع الجمهورية ويديره هو وابنته وان بعضا من اهل الدويم ظلوا علي تواصل بمجاهدواستمروا زبائن دائمين له.........
وايضا كان بالدويم بعض اهلنا النقادة الاقباط ومنهم زميل الدراسة ( جودت) لو تتذكره يا مامون حيث يعمل والده تاجر اقمشة في سوق الدويم بالقرب من استوديو الشواف.. وبنك النيلين...

خليناك بعافية يا مامون وتحياتي لصديقي مجدي الوسيلة وكل اولاد الدويم الحلوين

--------------------------------------------------------------------------------
مداخلة: #25
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: صديق الموج
التاريخ: 30-04-2006, 02:57 ص
Parent: #1


هبانى لا تزال بعض العائلات اليهودية تقطن السودان وكثير منهم رجع بعد
ان هاجر ولا زالوا يؤملون خيرا فى السودان..متى يصبح حلمهم حقيقة؟؟
تحيات مكان ليك يازول يا كيك،،،

--------------------------------------------------------------------------------
مداخلة: #26
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: هشام هباني
التاريخ: 02-05-2006, 10:01 ص
Parent: #25


الفنجري ود الموج

لك التحايا ومشتاقين

نعم لا زالت كثير من الاسر اليهودية السودانية تقيم بالسودان والي وقت قريب بعيد الانتفاضة حيث كان هنالك المعبد اليهودي الكبير والمشهور غرب سينما كلوزيوم بشارع القصر الجمهوري ويبدو انه تمت ازالته بمؤامرة تم بموجبها شراؤه من قبل بعض اثرياء(الجبهة الاسلامية) انذاك وبعد ان تم البيع تمت ازالته... وعلي ما اعلم ان الطائفة اليهودية بالخرطوم رفعت دعوى قضائية انذاك بسبب تلكم الحادثة ولا اعرف....ماذا تم فيها..عموما يهود السودان طيلة تواجدهم ببلادهم السودان لم يشهد لهم بمواقف عدائية تجاه شعبهم ووطنهم ... بل ظل الكثيرون منهم رغم تلكم الهجرة من السودان بعيد حرب حزيران 1967 يحتفظون بعلاقاتهم ببعض اصدقائهم من اسر السودان كما بينت ذلك ( الزبونة) السيدة ميري حبيب كوهين.....ودم بخير يا صديقي.

هباني

--------------------------------------------------------------------------------
مداخلة: #27
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: Marouf Sanad
التاريخ: 02-05-2006, 11:17 ص
Parent: #26


الصديق هباني

كان في حلتنا في واحد يهودي اظن ان اسمه "حنا" وقد كان يشغل وظيفة محترمة ولكنه رغم ذلك كان يبيع اللبن قدام بيتو في الامسيات , وقد هاجر واسرته فجأة في بداية التسعينات .

--------------------------------------------------------------------------------
مداخلة: #28
العنوان: Re: سودانـية يهـودية في ضيافة تاكـسي هبـاني ظاااااطو؟؟
الكاتب: هشام هباني
التاريخ: 04-05-2006, 12:21 م
Parent: #27


معروف

كيفنك

كويس انو لحد التسعينيات انو في يهود سودانيين موجودين وبالتاكيد انهم كثر ولكن لدواعي امنية فهم لا زالوا يعيشون متسترين بدينهم في هذا الزمن السوداني الرديء والذي ( طلع دين) المسلمين ظااااطمممم ما بالك في البقية....عشت

هباني


--------------------------------------------------------------------------------

ليست هناك تعليقات:

إرسال تعليق