أليـس أكـل ( المــرارة) السودانية ضربا من الارهـاب يدخلنا غوانتانامـو؟؟

مكتبة هشام هباني أليـس أكـل ( المــرارة) السودانية ضربا من الارهـاب يدخلنا غوانتانامـو؟؟
26-11-2005, 11:21 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1200202164&rn=0


--------------------------------------------------------------------------------
مداخلة: #1
العنوان: أليـس أكـل ( المــرارة) السودانية ضربا من الارهـاب يدخلنا غوانتانامـو؟؟
الكاتب: هشام هباني
التاريخ: 26-11-2005, 11:21 م


احيانا كثيرا ما تغوص بك الذاكرة وانت بعيدا عن الوطن وانت في صفاء ذهني افضل حالا من مواطن مسحوق هائم في داخل الوطن لا يملك وقتا ليحك رأسه في هذا اللهاث الرهيب من اجل رزق تتخطفه ضباع الحكم والمتمكنون وتتاح لك اثناء غوصك و( فياقتك)ان تتأمل بعضا من تفاصيل ثقافتنا المحلية وهي مكون اساسي لنسيج الهوية السودانية واحيانا اثناء غوصك قد تتوقف في محطات تستوقفك بعض التفاصيل قد تجد اجنة هي السبب في ازمات وظواهر راهنة كثيرا ما نجهل جذورها واساسها ولكننا نتعامل معها كمحصلات ونتائج من غير الغوص في جذورها ومسبباتها...

استوقفتني الذاكرة عند ثقافتنا الغذائية وذهبت بعيدا حتى وصلت صحن المرارة وتأملت مكوناتها( فشفاش فاقع الحمرة عبثت به يد غير معقمة وفم غير معقم نفخ فيه هواء غير معقم واضاف اليه سائلا من مصران غير معقم اسمه ( ابو غازي)+ كبدة+ ضنب+ طوحال+ حلقوم+كرشة+(بول) ولكنه ليس بولا بل عصارة صفرارية هاضمة+ شطة حمراء+ ملح+ ليمون والجميع مخلوط في اناء واحد جاهز للاكل من غير طهــــــــــــــــي؟؟

اذا وصفت هذه الوصفة لاي كائن بشري واخبرته بانه طبق شائع في ثقافة السودانيين ونحن ناكله غير مطبوخ؟؟ حتما سيصاب بالغثيان وسيتهمك بانك من اكلة لحوم البشر.... وبعدها سيتهمك بالارهاب وربما بعد ذلك سيبلغ عنك الى المباحث الفيدرالية خاصة اذا كنت مقيما في الولايات المتحدة وبالطبع سوف ترسل الى غوانتاناموبجريرة هذه ( المرارة) اللعينة.
فهذه الحواشي التي هي المشكل الحقيقي لصحن المرارة الشهير في بلادنا هنا في بلاد العم سام لا تصلح ابد للاكل الادمي لتعرضها للتلوث الجرثومي ولذلك كثيرا ما يقذفونها بعد ذبح الحيوان او يستخدمونها ربما في استخدامات اخرى والله اعلم.
ما دعاني لفتح هذا البوست هو ان صديقا لي يعمل في شركة ما كان كالعادة يتناول وجبة الغداء اثناء فترة الاستراحة خلال عمله اليومي وفي يوم من الايام طلب من زوجته ان ( تظبط) له الغداء حتى يمارس شيئا من ( البوبار) السوداني المشهور امام زملائه في العمل وهم يتناولون جميعا غداءهم في مائدة واحدة والكل يستعرض اكله وطبخ زوجته اي ثقافته الوطنية الغذائية..الزوجة الطيبة (ظبطت) الشنطة بما لذ وطاب وكان الصحن الاساسي( الكبدة المحمرة بت العز) وهو اكل الطبقات الموسرة في بلادنا....في حجرة الاستراحة حيث الجميع يتناول وجبة الغداء صديقي كان منفوخا وهو يفتح شنطته امام زملائه وهو معلنا انه اليوم سيبهرهم ويبزهم باعظم الاطباق السودانية على الاطلاق.... ما ان فتح شنطته ( منفوخا) واخرج اناء الكبدة المحمرة.... وسألهم ان كانوا يعرفون هذا النوع من الطعام
فكان الجميع يبحلقون بعيونهم في هذا الطبق ..اهي لحمة ام غير لحمة.. فضحك صديقي وهو يزداد نفخة.. وقد سألوه اي طعام هذا .... فأخبرهم انهاالكبــــــــدة ..اعظم واغلى الاطباق السودانية على الاطلاق....ردة الفعل كانت عكس ما كان يحلم صديقي.... احدهم تقيأ في الحال امام المائدة والباقون هرولوا الى الحمام.... واحدهم ظل مندهشا من الصدمة قائلا : معقولة تاكلوا الكبدةعوووووووووووووع؟
ضاقت الارض بصديقي وانحشر بين انامله من الخجل فقد خذلته الكبدة بنت العز في بلاد العم سام وهو لا يدري انها لا تصلح حتى لاكل الكلاب .... ولذا يحصل عليها بعض الوافدين مجانا من السلخانات بزعم انها لكلابهم ولكنهم يبيعونها لشعوبهم الوافدة الى بلاد العم سام بأرخص الاسعار حيث الكبدة ارخص الاشياء....
قلت لصديقي : ومال لو شلت ليهم مرارتنا مصحوبة بشريط فيديو يشرح عملية صنع المرارة وقلت كده ظمطت ليك كضم مرارة.. تقرقش في الحلقوم والدم بتاع ابو الدمام سايل من خشمك والفشافيش مالية خشمك... حتتوقع شنو؟؟

اجابني: علي بالطلاق غوانتـنامــــــــــــــــو تـــــوش.. ده لو ما لقيت ليك كاوبوي اداك رصاصة في نص راسك؟

اها يا اخوانا القاعدين في امريكا او في استراليا او في اوروبا الراجل فيكم امشي اعمل ليهو مرارة تاني وابوبر قدام الخواجات.........والله حقو راح.

عشــان كده انا بعتبر اكل المرارة هو بداية بذرة الارهاب في التراب السوداني فاجتنبوه.....المصيبة نحن حكامنا فاقعين مرارتنا عديل والبشير بجضـــومو الكبار ديل
ضرب جنس مرارة في حياتو .... والله بغتس حجرو السفاح السجمان....

--------------------------------------------------------------------------------
مداخلة: #2
العنوان: Re: أليـس أكـل ( المــرارة) السودانية ضربا من الارهـاب يدخلنا غوانتانامـو؟؟
الكاتب: محمد أبوجودة
التاريخ: 26-11-2005, 11:54 م
Parent: #1


الاخ هشام هباني

لكَ التحية ،، وفيكَ الخير يا خي .. الدنيا قبائل اضحى وذبائح ! مالك علينا ؟ دار تجنّنا من أهمّ زولة في العيد ؟ ..

هيَ بس وقفتْ علىْ المرارة دي ؟ ما العالمين دي بي برّة قالو بقت تاكل شيتاً كُتُر ! ..
طيِّب إيه رأيك في الرّبيت والملوحة واللآزمنّو والفسيخ وأكلات ماها بعيدة شديد عن تراكيب الزرنيخ!

لكين بيني وبينك كدا ، شغلانيّة المرارة ، وجب الإنفطام عنها ! لأنّ الزمن تغيّر والتلوُّث
بلغ الحلقوم بعد ان باض وافرخ بمرارة الخروف ! وغمر سِنّ البَرِكْ ! ..والحمل الكان زمان ياكلو قشـّة طاعمة وفيتريتة ناعمة ؛ أصبحت مأكولاته في معظمها مُعالجة هرمونيّا ! هذا بالإضافة لأكياس البلاستيك والورق ! وقد تتضمّن بواقي سندويتشات ماكدونالدز! ومرارة زي الخروف دا ، بِتفَقـِّع وللبطون بتوجـِّع ، وفي قول : لي قوانتانامو بتسرِّع ، إن كان شقي الحال دا مقيم ببلاد العم سام ..

وإذن فاسمح لي بأن اضمّ صوتي لصوتك ونعلنها - ليست داوية شديد !! - خُذوا حِذَرََكم من المرارة الملوّثة ..



مع التحية ،،

--------------------------------------------------------------------------------
مداخلة: #3
العنوان: Re: أليـس أكـل ( المــرارة) السودانية ضربا من الارهـاب يدخلنا غوانتانامـو؟؟
الكاتب: هشام هباني
التاريخ: 27-11-2005, 07:39 ص
Parent: #2


العزيز/ ابو جودة

كل العام وانت والوطن بالف خير

انت عارف يا محمد اخوي اخوك والله اخوك كان مدمن اكل مرارة من صغير يعني لمن ارسلوني ( الجزر) اي السوق وشايل ليك سبت البلاستيك المشبك داك ومرسال السوق كلو ما بتعدى (الطرادة ) والزمن السمح داك المرارة بخمسة قروش فقط يعني( شلن) اخوك بعد ما يرجع البيت ( امطق) قدام الحاجة وهي شغالة ليك في عمل المرارة وجنبي كلبناجرقاس الولح في ضنبو ضاحك برضو قاعد (امطق) كان القي ليهو ( كضم) مرارة من الوالدة والكديسة بتاعتنا اخر ملق ومحلسة تحت كرعين الوالدة كمان بتدور ليها ( كضم) وبعد ما اختوا الفطور اخوك تلقاهو متوهط في نص الكبار ضرب شديد يعني مرارة بالشطة لحد ما حبوبتي الله اديها العافية تنهرني : قوم المجنون المسنوح ده المرارة دي بتضرك بتسويلك الدسنطارياوارد عليها: والله كان تكتلني ما بخليها؟؟

لكن يا خوي الليلة لمن بديت اتذكرها في العوالم النضيفة دي وانت شايف قدامك اي زول شغال في اي مطعم بسوي في الاكل خاتي ليهو في يدينو (gloves) يعني النضافة مهمة وبعدين يا خي لو مصرين عليها بس نجضـــــــــــــوها... محبتي واحترامي

--------------------------------------------------------------------------------
مداخلة: #4
العنوان: Re: أليـس أكـل ( المــرارة) السودانية ضربا من الارهـاب يدخلنا غوانتانامـو؟؟
الكاتب: othman mohmmadien
التاريخ: 27-11-2005, 07:53 ص
Parent: #3


أخوة هشام/ محمد
تحية طيبة مباركة
بمناسبة الملوحة او التركين مش عارف واحد أخونا أتي حامل كرتونته التي يبدو أنها غير معدة إعداد جيد من حيث التربيط أو أن معاملة مطار الخرطوم للعفش الحقت الكرتونة بحال صاحبهاالغلبان ومما يؤسف له انالعبوة أنفجرت بمطار صنعاء الدولي ففاحت تلكم الروائح اولها ثاني اوكسيد العفنون الذي ازكم الأنوف
وزاد الجو كتمة خاصة وأن البلد تعاني من نقص الأوكسجين ويبدو أن العبوة أنفجرت في الصالة حارمة صاحبها من التلذذ بها فترة إقامته للعمل بالتدريس والتخمة صارت نقمة الغريب في الأمر أن سلطات الصالة سعت لمعرفة من هو صاحب الكرتونة
وماذا يوجد بداخلها والكل يتعجب ويهرب منها
حتى السودانيين ونحن منهم أنكرنا الحديث عنها ومحتوياتها
أما صاحبها
أجبن من يمشي على الأرض
أكيد كوز
لم يقل بغم
سبحان الله
بالله يا هشام لو إنفجرت عندكم في امريكا كان سيحصل إيه
أبو يمن بطيبته المعهودة
تخلص من الحطام والركام بكل صمت

--------------------------------------------------------------------------------
مداخلة: #5
العنوان: Re: أليـس أكـل ( المــرارة) السودانية ضربا من الارهـاب يدخلنا غوانتانامـو؟؟
الكاتب: هشام هباني
التاريخ: 27-11-2005, 08:10 ص
Parent: #4


العزيز الجميل/عثمان


والله دي حلوة يا عثمان.......... طبعا صاحبها قطع شك كـــــــــوز؟؟

انت عارف شغلانية زي دي لو حصلت هنا في المطارات الامريكية خاصة بعد 11 سبتمبر
سوف تعلن حالة الاستنفار القصوى والكمبيوترات تتخابت والمعامل تشتغل عشر ورديات في اليوم وفي النهاية سيثبتون ان ثاني اكسيد (العفنون) هو نوع من السموم المصنوعة في السودان من السمك ( الاستشهادي) الفسيخ المعد لمحاربة الكفرة الفجرةالاميريكان والسودان اصلا مصنف بلد ارهابي... وبالتالي سيضعون كل السودانيين في القائمة السوداء وربما ستنطلق طائرات من قواعدها خارج الاراضي الامريكية لضرب ( ملجة الموردة وسكي الموردة)... وعندها سيولول الرئيس البشير وسيختبيء جميع الكيزان في جحورهم يحسبون ان الشغلانية انتهت ولا يدركون ان المستهدف كان سمك بلادي التعيس؟؟
محبتي واحترامي


سندة: تحية لكل شباب صنعاء

--------------------------------------------------------------------------------
مداخلة: #6
العنوان: Re: أليـس أكـل ( المــرارة) السودانية ضربا من الارهـاب يدخلنا غوانتانامـو؟؟
الكاتب: dalihabboub
التاريخ: 27-11-2005, 08:40 ص
Parent: #1


يا خوي مالك ومال مرارتنتا خليها في حالة والعندو فيها راي
ما ياكلها. وبعدين المرارة ذاتها ما بتسوي حاجة إلا
للجماعة البتكلموا عن التلوث والكلوسترول وغيرو
لكن ناسنا الغبش ديك على اليمين كانو أكلو لحم زول ما تجيهم حاجة.

يعني اسه انت خلاص بطلت تاكل مرارة ؟

إذا كان دا صحيح إذا جيتنا في مسقط حا نضبح ليك ديك بدل خروف
وذنبك على جنبك

مع خالص المودة يا رفيق الأيام الجميلة التي خلت.

دالــي

--------------------------------------------------------------------------------
مداخلة: #7
العنوان: Re: أليـس أكـل ( المــرارة) السودانية ضربا من الارهـاب يدخلنا غوانتانامـو؟؟
الكاتب: هشام هباني
التاريخ: 27-11-2005, 08:57 ص
Parent: #6


اخـوي دالي

انت عارف انا لسه ما اتخذت اي قرار نهائي للاقلاع عن معشوقتي (المرارة)
لكن قبل ما اخليها اول حاجة خلينا نفقع مرارة الكيزان زي ما فقعوا مرارة الوطن العظيم ونحن نعيش المرارات والظلم والحرمان..... اما بخصوص الديك بتاعكم ده ...اول حاجة ورونا ان كان ديكا جبهجيا وجب اكله حلالا وما اكثر الديوك في بلادي وعلى راسهم الحاكم الديك امير المؤمنين عمر الديك.......... وبمناسبة الديوك وبما انك عشت في كوستي وبمناسبة الديك شنو قصة ( جامع الديك ابو حبل) محبتي واحترامي


--------------------------------------------------------------------------------