احذروا هذا الرجل الطهّارة ..العصيدة السودانية تتعرض لخفاض فرعونى مفضوح

مكتبة هشام هباني احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
29-09-2006, 09:15 ص المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1200026712&rn=0


--------------------------------------------------------------------------------
مداخلة: #1
العنوان: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 29-09-2006, 09:15 ص


مضطر كل مرة ان اخرج عن (أصفادي) وانا احسن هذه الايام رغم ابتعادي عن المنبر
( المتاوقة) في الموقع تارة وفي تلفاز السودان الخيبان تارة اخرى...
وما استفزني جدا جدا من جملة الاستفزازات اليومية المعتادة وانا اشاهد( الترابية) السودانية وليست الفضائية ان ارى ( طهارة) فرعونية اسمها ( الشيف اسامة السيد) اعتدت ان اراها في القنوات العربية النفطية( تسوط وتخمج في الثريد والعجج والشاورمات والمقبلات والبقلاوات وكل الطيبات) مما يتناسب وجيوب اهل تلكم الفضاءات الثرية الباذخة!!
لكن ان اراه في فضائية السودان (المكعكع الجوعان السجمان الغلبان المرضان .. النحلان الجربان الفقران الحزنان!!) لهو امر عجيب ومحير..ان ترى هذا ( الطاؤوس) الفرعوني الباذخ ..يختال في بلادنا الفقيرة ( البوبارة) في فضائية بلد قيل عنها هذه الايام انها ( نفطية) حيث كلما ازداد نفطها ازداد سعره في بلاده وامتلات جيوب حكامه الرساليين الاتقياءالراشدين وبالمقابل يزداد فقرها وشقاؤها وجوعها وماسي اهلها الصابرين الطيبين!!
ويا للمفاجأة والكارثة ان هذا ( الاسامة السيد وليس اسامة عبد الله) قد اكمل واعتصر كل خبراته في فنون الطهي حتى صار علمامطبخيا.. ولكن ان يتجاسر هذا ( الشيف) الطهارة على اخر معاقل الكرامة والهوية والذات السودانية واخر ما تبقى لنا بعد كل هذا الخراب والتبخر من ( مساكة) تدلل على اننا شعب كان هنا في هذه الرقعة اللامباركة اسمه شعب السودان ..حيث كان ( الطهارة) شيف اسامه يتلاعب بالسيدة السودانية بنت الشعب السوداني بقبله الاربعة السيدة ام الفقراء والمساكين ومائدة المستضعفين ( العصيدة) امام جمع من نساء ( نقاوة) من بلادي ادناهن تاكل العصيدة عند اللزوم لزوم اثبات الذات على مضض !! وكان الشيف اسامة يتبدى لي في مخيلتي مثل( طهارة فرعونية) تمارس خفاضا فرعونيا جائرا علي عصيدتنا الطيبة البريئة حيث خفض قامتهاالمرموقة حتى باتت ارضاصفصفا وهو احيانايلونها وتارة يحشوها دجاجا و تارة اخرى يوزعها علي صحون صغيرة تكرس الفردية والانانية وتبعيض ايادينا وانفسنا بعد ان كنا ناكل في صحن او قدح واحد حيث تتشابك وتتلاقي ايادينا في اكل تكثر بركته كلما كثرت فيه الايادي .. وتبدو انها عملية قذرة في سياق المخطط العام لتجزئة الوطن وتقسيمه اهله وايضا حيث لم تسلم اشياؤه ومنها ( امناالعصيدة ) وخفاض بعض اراضيه مثل ارضنا المخفوضة فرعونيا( حلايب)!!

انتبهوا ايها السودانيون الغافلون اخاف ان نجد بعد غد في مطاعم الفراعنة وفي قائمة الاكل وفي مدونات التاريخ ان العصيدة السودانية هي( عصيدة نوبية مصرية) حيث تتحول عصيدتنا السودانية (بت القبايل) بعد هذا الخفاض البائس الى تراث نوبي فرعوني !! فالطوفان يبتلعكم وانتم لا تشعرون ولله في خلقه شئون!!

سندة( ساعود الى أصفادي..ولكني احسن المتاوقة واعود عند اللزوم.. صوما مقبولا وافطارا شهيا).

هباني ظاااااااطو

--------------------------------------------------------------------------------
مداخلة: #2
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: عبد المنعم سليمان
التاريخ: 29-09-2006, 09:26 ص
Parent: #1


اخي هشام ..

رمضان كريم وكل الاسره ..


والحمد لله الذي طهرك وفك صفدك ثم رفع لك .... ..



Quote: ( الاسامة السيد وليس اسامة عبد الله)




يا اخوي التاني ده عارفنو شيف بس الحكومه عامله فيها ما شايفه .


والله يرحم محمد طه محمد احمد .

--------------------------------------------------------------------------------
مداخلة: #3
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 29-09-2006, 09:55 ص
Parent: #2


العزيز عبد المنعم

رمضان كريم

يبدو ان حالة الخفاض الفرعوني اخذت مداها في كل الاصعدة في بلادنا المنكوبة بحكامها واتقيائها اللصوص برضائهم لانهم ببساطة عبيد الفرعون وسدنته!!
دم انت والوطن بخير ...صوما مقبولا وذنبا مغفورا وافطارا شهيا.
مع تحياتي للاسرة

هباني

--------------------------------------------------------------------------------
مداخلة: #4
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: Tragie Mustafa
التاريخ: 29-09-2006, 09:58 ص
Parent: #3




هباني حمد لله على سلامتك وفاقدنك

وكنت جايبه سيرتك في بوست ثاني منذ قليل

اتمنى وجودك هنا ومعا لاطلاق سراح ابو القاسم

معذره لم اقرأ بوستك بعد ساعود له الآن دعونا

ننقفذ هذا الرجل قبل ما يلحقوه محمد طه محمد احمد.

اطلقوا سراح المهندس ابو القاسم احمد ابو القاسم واخيه زكريا....


تراجي.

--------------------------------------------------------------------------------
مداخلة: #5
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: Mustafa Mahmoud
التاريخ: 29-09-2006, 10:06 ص
Parent: #4



أيا وطني: جعلوك مسلْسلَ رُعْبٍ

نتابع أحداثهُ في المساءْ.

فكيف نراك إذا قطعوا الكهْرُباءْ؟؟

--------------------------------------------------------------------------------
مداخلة: #6
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 29-09-2006, 01:36 م
Parent: #5


الاعزاء/ تراجي,منعم ومصطفي

( والله دي الفضلت..اخوانا الفراعنة ديل جابوا لينا الطهورة الفرعونية وماتن حبوباتنا واماتنا واخواتنا وسامحناهم وجابوا لينا الاستعمار التركي سامحناهم وجابوا لينا المستعمرالانجليزى وسامحناهم وخانوا علي عبد اللطيف وسامحناهم..وساعدوا النميرى.وسامحناهم....وصالحوا البشير وطردوا المعارضة واخدوا حلايب..وما سالناهم.... وشالوا غنا شرحبيل ووردي وقالوا ده تراث نوبي مصري وما سالناهم.... وكتلوا اهلنا في ميدان مصطفي محمود وما سالناهم وخليناهم لي الله !!!اها الحكاية الليلة طقت في عصيدتنا كمان عاوزين الونوها واجهجهوها واطهروها..والله ده الفضل انا خايف بكرة اقولوا( الكول) بتاع اهلنا في دارفور ده اقولوا(كول فرعوني) والفراعنة اول من اكل( الكول)!! وحينها لا املك الا ان اقول لهم بلسان دارفوري فصيح (كـــــــــــــــولات)!!

هباني

--------------------------------------------------------------------------------
مداخلة: #7
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: ABDELMAGID ABDELMAGID
التاريخ: 30-09-2006, 01:07 ص
Parent: #6


ود هبانى اخوى ...
ات العصيده دى زمان كان ( بطهروا !!! ) اوبس ( بعوسوا !!! ) و ( اكردوا !!! ) بالملود !!! و اظبطوا و اهندسوا ب ( الكنش !!! ) هسع بقت ( ملاعق ؟؟؟ ) ... الله اجازيم اولاد بمبا !!!
كسره :
زمان حبوبتى لما ادخل ( التكل !!! ) غفلة و اختف لى حتة ( شيطة !!! ) تسكنى و تصيح فينى ... كتلت لى النار قبيل ! و داير تهتك لى ( الدوكه !!! ) هسع ؟؟؟؟... اتا ( أب لغود !!! ) تتجازى و اطهروك ( بالملود !!! )
مش القزازه ( السنينه !!! ) ديك ! يا ودهبانى !!!!!!
عبدالماجد

--------------------------------------------------------------------------------
مداخلة: #15
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 05-10-2006, 03:35 ص
Parent: #2


؟؟؟؟؟؟؟؟؟؟؟؟؟؟؟؟

--------------------------------------------------------------------------------
مداخلة: #8
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: عوض حمزة
التاريخ: 30-09-2006, 01:54 ص
Parent: #1


سلامات هشام

ورمضان كريم


Quote: دارفوري فصيح (كـــــــــــــــولات)!!




شكيت محنك .. ماكنت فاكر ان الواحد ممكن

يضحك قدر ده

ان ارادوا ان ينسبوا لهم حتى (الكول او الكولات )

فلهم ذلك طواعيه

--------------------------------------------------------------------------------
مداخلة: #9
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 30-09-2006, 11:08 ص
Parent: #8


عوض حمزة

سلامات

نحن شعب ياكل( الكول) فلا خوف عليه... ولكننا لسنا من اكلي لحوم البشر!!

كل العام وانتم بخير

هباني

--------------------------------------------------------------------------------
مداخلة: #10
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 01-10-2006, 03:15 ص
Parent: #9


والشيء بالشيء يذكر.... وفي ذات السياق المشوه لذاتنا وهويتنا
كنت قبل فترة اشاهد شريط فيديو لمناسبة سودانية في ريفنا وفي قريتنابالتحديد...كنت اشاهد زواجا لاقربائي.. واكثر ما استفزني ملابس العروسة وزينتها و( مكياجها) وزفتها وكلها اشيامصرية حتى الطفلتين الصغيرتين كانتا تحملان ثوب العروس في ارض ترابية والخلفية حائط طيني سوداني( مذبل) وعلي سقف البيت تتدلى ( سبلوقة) سودانية وهي احيانا تصلح وكر زوجية ( لود ابرق وعشوشة)
واكثر ما استفزني الزفة المصرية بلسان مصري غير فصيح لمجموعة من الشباب السودانيين المستاجرين من العاصمة لاداء هذه الزفة المصرية
( والله زرق عديل وما خايل فيهم الغنا المصري ولا قريبتنا خايل فيها الزفاف المصري... وكمان الاولاد الشباب الحاضرين لابسين جلاليب اندونيسية وطواقي ماليزية ولبسات نيجيرية....واختفت العمة والطاقية السودانية الحمراء والعراقي السوداني والمركوب السوداني والسكين السودانية والسراويل السودانية....يا جماعة نحن ماشين وين!!) الهذا الحد نحن شعب ضعيف سهل التاثير عليه ويسهل عليه ان يتنازل عن هويته وحاجاته.. وهي من باب المقدسات عند بعض الشعوب تتباهي بها ولا تتنازل عنها مهما كانت الاسباب والدوافع...اصحوا يا سودانيون يا نائمون؟؟

--------------------------------------------------------------------------------
مداخلة: #11
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 01-10-2006, 03:07 م
Parent: #10


؟؟؟؟؟؟؟؟؟؟؟؟؟ظ

--------------------------------------------------------------------------------
مداخلة: #12
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: جمال هباني
التاريخ: 01-10-2006, 03:55 م
Parent: #11


العم هشام

كل عام انت والاسرة بخير وعافية وتصوموا وتفطروا على خير

ولنذيدنك من الشعر بيتا فلقد وصفوا الجلابية السودانية بانها نوبية واصبحوا يجلبون بعض النوبيين في فرقهم الموسيقية واغاني الافلام ويلبسونهم الجلابية والسروال والعراقي لياخذ بعدا نوبيا

ولك كل الود

--------------------------------------------------------------------------------
مداخلة: #13
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 02-10-2006, 11:21 م
Parent: #12


العزيز جمال هباني

سلامات

Quote: ولنذيدنك من الشعر بيتا فلقد وصفوا الجلابية السودانية بانها نوبية واصبحوا يجلبون بعض النوبيين في فرقهم الموسيقية واغاني الافلام ويلبسونهم الجلابية والسروال والعراقي لياخذ بعدا نوبيا





عليك الله تاني بعد ما بقوا ( اولاد بمبة) العبوا ب( عصيدتنا) وقطعوها وختوها زي الرز باللبن في الصحانة الصغيرة ولونوها ودلعوها تاني نحن القاعدين ليها شنو يا جمال... ما قيامتنا قامت!!
كل العام وانتم بخير
والتحايا لكل ( ام سعين).

عمك هشام

--------------------------------------------------------------------------------
مداخلة: #14
العنوان: Re: احذروا هذا الرجل الطهّارة ..العصيدة السودانية تتعرض لخفاض فرعونى مفضوح!!
الكاتب: هشام هباني
التاريخ: 05-10-2006, 03:34 ص
Parent: #1


؟؟؟؟؟؟؟؟؟؟؟؟؟؟؟؟


--------------------------------------------------------------------------------