الأربعاء، 30 أبريل، 2008

ولسه الكهرباء والموية بتقطع...بالتقطع راسك يا عمر البشكير؟؟

مكتبة هشام هباني ولسه الكهرباء والموية بتقطع...بالتقطع راسك يا عمر البشكير؟؟
07-05-2006, 02:06 ص المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1199770587&rn=0


--------------------------------------------------------------------------------
مداخلة: #1
العنوان: ولسه الكهرباء والموية بتقطع...بالتقطع راسك يا عمر البشكير؟؟
الكاتب: هشام هباني
التاريخ: 07-05-2006, 02:06 ص


بالامس اتصلت بالسودان ووجدت الوالدة في حالة قـــــــــرف شديد....
ـ مالك يا حاجة نعل ما في عوجة....؟؟
ـ والله العوج يا ولدي لسة حاصل؟؟
في شنو يا حاجة؟
ـ يومين يا ولدي البيت ما عندنا موية والماسورة مرة تشخشخ ومرة تنقط....وكمان الكتاحة والحر والفلس والغلاء والقرف....
ـ لكن يا والدة بعد سبعتاشر سنة وكل البترول العندنا ده وباسعارو الفوق دي وبتخش ملايين الدولارات يوميا في خزينة الدولة وتجي هسه تقولي لي الكهرباء قاطعة والموية قاطعة؟؟
ـ ده الحاصل يا ولدي مصيبتنا مصيبة وشكيناهم علي الله..
ـ لكن يا امي الله ما شايف البحصل ده وعارف كل حاجة...
ـ هي لكن نسوي ليهم شنو كان السياسيين الكبار واهل الفهم الكنا عشمانين فيهم بقوا ناس معايش ساكت وكنا ستاشر سنة عشمانين فيهم اجونا من برة اشيلوا مننا الغمة دي...اهامما جو الكنكش ليهو في وزارة لبد وسكت والعصروا ليهو سردب وسكت والحال يا هو ذاتو الحال..
ـ والحل شنو يا امي؟؟
ـ شكيناهم علي الله...
ـ لكن يا امي الله عارف وشايف..
اها اهايا ولدي ودعتك الله الموية دايرة تجي سامعاها تشخشخ..
ـ وان شاء الله ازياركم مليانة موية؟؟
والله يا ولدي تنقح عدمانة الجغمة
ـ ولسه بتشربو يمة بالكوز؟؟
ـ اي لسه بنشرب بالكوز؟؟
ـ ولسه اللواري عندكم بربطوا ليها الكوز؟؟
ـ اي يا ولدي اللواري لسه بربطوا ليهاالكوز؟؟
ـ ولسة البلد رابطين ليها كوز؟؟
ـ ات قاصد شنو يا ولدي؟؟

ده يمة المغتس حجركم لي هسه قاطع منكم الموية والكهرباء والرزق ومنشفها عليكم؟؟
هو شنو يا ولدي ما توضح كلامك..؟؟

الكوووووووووووووووووووووووووووووووووووووووز يمة ؟







--------------------------------------------------------------------------------
مداخلة: #2
العنوان: Re: ولسه الكهرباء والموية بتقطع...بالتقطع راسك يا عمر البشكير؟؟
الكاتب: saif massad ali
التاريخ: 07-05-2006, 02:09 ص
Parent: #1


الناظر

ربي يخفف عليهم

لابد من التغير لابد من التغير

--------------------------------------------------------------------------------
مداخلة: #3
العنوان: Re: ولسه الكهرباء والموية بتقطع...بالتقطع راسك يا عمر البشكير؟؟
الكاتب: هشام هباني
التاريخ: 07-05-2006, 02:13 ص
Parent: #2


ود مساعد اخوي



التطهير التطهير واجـــــــــــــــــب وطني....فرعوني ظااااطو؟؟

--------------------------------------------------------------------------------
مداخلة: #4
العنوان: Re: ولسه الكهرباء والموية بتقطع...بالتقطع راسك يا عمر البشكير؟؟
الكاتب: ABDELMAGID ABDELMAGID
التاريخ: 07-05-2006, 10:01 م
Parent: #3


Quote: بالتقطع راسك يا عمر البشكير؟؟

3
يا كافى البلا ... لا طيارة تقع !!! و لا عربيتن تصدم ؟؟؟
عبدالماجد

--------------------------------------------------------------------------------
مداخلة: #5
العنوان: Re: ولسه الكهرباء والموية بتقطع...بالتقطع راسك يا عمر البشكير؟؟
الكاتب: قلقو
التاريخ: 08-05-2006, 03:48 ص
Parent: #4


الأخ هبانى
على ما أذكر قبل حوالى الأسبوع او العشرة ايام كنت قد انزلت موضوعا فى هذا البورد واسميته(جمرة الماء الخبيثة) وفيه بينت ان الهيئة القومية للمياه واسوة بالهيئة القومية للكهرباء تريد ادخال عدادات الدفع المقدم للمياه ولسان حالهم يقول (اشمعنى ناس الكهربا وهم احسن مننا فى شنو ؟).
وطببعا تبريراتهم للموضوع دة جاهزة..فهم بيقولوا انو الأيرادات عندما تزيد سيقابل ذلك خدمة دائمة ومتطورة..وطبعا دى كلمة حق يراد بها باطل لأنه الديون المتراكمة على الحكومة هى اضعاف اضعاف ما هى على المواطنين حيث ان فرق القطع تقوم وبكل همة ونشاط و(تشفى) بالقطع الفورى للمياه من المواطن الذى يعجز عن الدفع بوصفه(الحيطة القصيرة)..اما متأخرات المياه على المصالح الحكومية ومنسوبيها المحظوظين فلا يطالها سيف القطع ولا هم يحزنون.
وبعد هذا وذاك هل ياترى انتظمت خدمات الكهرباء بعد ادخال الجمرة الخبيثة كما كانت تدعى الهيئة القومية للكهرباء ؟ مرور سريع على الخرطوم كفيل بالرد على هذا السؤآل عندا ترى الجنريترات وهى تملأنا صخبا وتلوثا .
هذا هو حال الكهرباء التى يمكن ان نعيش بدونها فكيف بالله عليك بالماء الذى سيصير فقط لمن يملك المقابل المادى .
هل هناك ابشع من هذه الحكومة التى تريد ان تخصخص حتى قطاع الماء وتجعله تجاريا لصالح طبقة من التجار والمستثمرين من منسوبيها الذين لا يمانعون من الأثراء حتى ولو على جثث هذا الشعب ؟
اذا لم ننتفض ونتظاهر بل ونحمل السلاح فى قلب الخرطوم ضد هذا العبث,فمتى ياترى سنفعل ؟
مع تحياتى

--------------------------------------------------------------------------------
مداخلة: #6
العنوان: Re: ولسه الكهرباء والموية بتقطع...بالتقطع راسك يا عمر البشكير؟؟
الكاتب: doma
التاريخ: 08-05-2006, 04:08 ص
Parent: #5


Quote: اذا لم ننتفض ونتظاهر بل ونحمل السلاح فى قلب الخرطوم ضد هذا العبث,فمتى ياترى سنفعل ؟
مع تحياتى


انت عارف ياقلقو بقيت والله محتاره في الشعب السوداني دا بقي جبان للدرجه دي؟؟؟ ولا الحاصل شنو ؟؟ ما معقول الي متي يستكينون المويه هي الفرق بين الحياه والموت . بعد دا الا يعملوا ليهم الهواء بالعداد المقدم الدفع



--------------------------------------------------------------------------------

ليست هناك تعليقات:

إرسال تعليق