واكتشفت بالامس انني عنصــري اسـود حـقير

مكتبة هشام هباني واكتشفت بالامس انني عنصــري اسـود حـقير!!
24-06-2006, 11:18 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1164940632&rn=0


--------------------------------------------------------------------------------
مداخلة: #1
العنوان: واكتشفت بالامس انني عنصــري اسـود حـقير!!
الكاتب: هشام هباني
التاريخ: 24-06-2006, 11:18 م


كعادة غالبيتهم الزبائن( ابناء الخالة) الاميريكان الافارقة بعد نهاية كل رحلة تاكسي عندما تحين ساعة الدفع والحساب وانت يدك تغازل العداد هنا تبدأ ( الخرخرة والجرسة والمغالطة وكب الزوغة) ولذلك غالبا ما استخدم مع غالبيتهم عندما تساورني الشكوك والريبة في تصرفات بعضهم المبدأ السوداني الشائع يا زبون العربون!!
فبالامس زبوني الامريكي الافريقي اي( ود الخالة) بعد منتصف الليل وانا اقله لمشوار بعيد ولمنطقة من المناطق الخطرة جدا والتي كثيرا ما نتحاشاها حتى لو كانت الرحلة نهارا وذلك لارتفاع معدل الجريمة بها وهي اخطر المصائد لسائقي التاكسي كاهداف متحركة
وسهلة لطالبيها من المجرمين العتاة المتخصصين في اصطيادهم!!
وعندما وصلت للنقطة التي يقصدها بدأ مسلسل( مكنة الخرخرة والجرسة) وحينها كان المؤشر اي العداد يشير لمبلغ فاق الاربعين دولارا وهنا فتح الزبون باب السيارة كانه يهم باخراج المبلغ وفجأة لاذ بالفرار وتبخر في جوف الليل الظليم تاركا التعيس ود هباني ( يفكفك لام عبيد اميريكا ولاميريكا وللبشير ولكل كلاب الانقاذ)!! وضاع علي احمد ونضال و جدتهم الضائعة بالوطن الضائع الحاجة امنه مبلغ محترم من المال يفعل الكثير والكثير
في هذا الزمن اللئيم ورجعت اجرجر اذيال الاحباط والضيم اللئيم وانا ابحث عن رزق اخر
وحظ اخر فيما تبقي من ذلك الليل البهيم!!
وفي طريق العودة كنت بعقل كامل استعيد عرض شريط الحادثة... الفعل ورد الفعل ..واكتشفت ان الفاعل بفعلته اي ( ابن الخالة)معذور فهو ضحية هذا الظلم والحيف الطويل منذ مئات السنين منذ سبوهم واسترقوهم وشوهوا وجداناتهم بهذا الحقد الدفين فما عادوا يميزون بيننا نحن ( الرقيق الاممي) المقنن بالمواثيق والاتفاقيات والقادم طوعا متعديا علي بلادهم ومضيقا عليهم فرص العمل والحياة وبين اسيادنا واسيادهم واسياد العالم الجديد والذين سبوهم واسترقوهم في رحلات مراكب العبيد واسترقونا بمواثيق حقوق الانسان واللجوء !!
فعندما استعدت الذاكرة لتحليل ردة الفعل بدات اتفرس ملامح غريمي وانا قد عيرته بالعبد والعبودية في بلادي ارتبطت بلون البشرة وملامح الوجه لا بالسلوك والمفاهيم..وفي الحقيقة وجدته انعم بشرة مني وافتح لونا مني واوسم ملامح مني..بالاضافة الي انه امريكي من العالم الاول وانا سوداني لاجيء مضطهد ات من قاع الدنيا!!
وغاصت بي الذاكرة ايضا في تقصي هذه النفسية العنصرية التي تركبني من حين لحين رغم كل تراكمات الوعي الجديد ولكنها عند اللزوم ( تتاورني كوجع الضرس الاليم)وذهبت الي احياء قريتي القصية في الريف البعيد استدعي ذلك الماضي الاليم حيث الاحياء الفقيرة واسماء اهلهاواهلي الطيبين المفعمة بالعبودية والاستلاب ( تام زينو..عجب سيدو..الكريم مهال..خادم الله مستورة..الكريم ادي..قسم السيد..) وهي ادانات دامغة من تاريخنا العنصري البغيض.. وكل ما اعرفه عن هؤلاء الطيبين انهم خالاتي واعمامي واخواتي واخواني..فما كنت اوسم منهم ولا افتح بشرة من غالبهم ولا اذكى من غالبهم ناكل ونلعب معهم وننام في بيوتهم ولكن عند ساعة الجد ولحظات الفصل تقول لي القرية وارثها العنصري البغيض انهم ( عبيد جدي وسراريه وخدمه)!! لا نتزوج منهم ولا يتطاولون للزاوج منا وهو اسوأ انواع الاستلاب والاسترقاق ان يتوطن الخنوع والانكسار في نفسية الانسان وذهنيته وهو يقبله امرا واقعا لا مناص منه رغم كل مواثيق حقوق الانسان واعلانات الانعتاق والتحرر من العبودية والاسترقاق ..هنا تقع المفارقة الغريبة..الاسود يستعبد اسود!! وسواد اللون وحده معيار لتحديد العبودية!! انه السودان حيث تعيش وتتوطن اسوأ انواع العنصرية في هذا الراهن الوخيم..والكل يلغي الكل
انت اسود اذن انت عبد....انت ابيض اذن انت حلبي انت غريب.. غير ذلك انت عريبي جلف ..وعقدة اللون اصابت ثقافتنا بعمى الالوان..ونحن السودانيين اي السود من بلاد السودان باستحياء..لا مكان للون الاسود..لون ادم السوداني.. لون الاديم..لون التراب في
حياتنا عندما نوصف الوان بشرتناونحن نقول باستحياء للاسود منا فلان ازرق,,,فلان الاخدر الليموني والبرتكان الناير..وخداري الما بخلي اللونو زرعي!!!
عدت من رحلة غوصي في ذلك الماضي البغيض احتقر نفسي واسـب الاوضاع وهذا الوضع اللئيم..الذي قذف بنا الي منافي الدنيا لائذين بالغريب من القريب..فكنت انا السائق الاسود اللاجيء لذاك الاسود المواطن الامريكي .. وكنت انا اللاجيء في بلاده.. وانا الذي اقتات من خيراتهم وشعبي يتصدقون عليه بمساعداتهم وانا الاتي من وطن هو ارض المجاعات والفساد والارهاب والهوس الازيم..اذن كيف غريمي المواطن الامريكي بالعبد..يا هباني ايها العبد اللاجيء الاسودالكبير يا عبد العبيد!!
و(فكفكت) لام الانقاذ ولكل اولئك القوادين من لا زالوا يقولون: سير سير يا بشير
والبلاد تسير الي الهلاك والدمار والتشطير بقيادة هذا الاهبل العوير!!


هشام هباني

--------------------------------------------------------------------------------
مداخلة: #2
العنوان: Re: واكتشفت بالامس انني عنصــري اسـود حـقير!!
الكاتب: زهير حيدر صديق
التاريخ: 24-06-2006, 11:32 م
Parent: #1


أخي هشام
أجدك قد لخصت معظم ما يدور في ذهني من خلال حديثك.
واستغرب نزعة العنصرية والقبلية التي طفت بشدة على سطح الأحداث في السنوات الأخيرة.
تجدني دوماً اتأمل ما بين سطور حديثك واستشعر تماماً احاسيسك وأعي مقدار ألمك لواقعٍ لم تختره لنفسك بمحض إرادتك.
لك المودة وكل التحايا.

--------------------------------------------------------------------------------
مداخلة: #4
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 25-06-2006, 01:25 ص
Parent: #2


الاخ زهير

سلامات

هذا الواقع المازوم بالعنصرية البغيضة ينبغي التصدي له بالصدق والشفافية
والموضوعية في الرصد والتحليل وابتداع الحلول..وبالتوعية والتوجيه الوطني السليم ونحن نعيش اليوم اسوا مراحل الانحطاط ومن هم في هرم السلطة يقننون العنصرية البغيضة
ويضرمون نيران النزاعات وتغذية الصراعات القبلية والجهوية بين الاشقاء ليسودوا من خلال تشتيت وتشريد الاخرين!!

محبتي

--------------------------------------------------------------------------------
مداخلة: #3
العنوان: Re: واكتشفت بالامس انني عنصــري اسـود حـقير!!
الكاتب: ABDELMAGID ABDELMAGID
التاريخ: 24-06-2006, 11:36 م
Parent: #1


ود هبانى ...
اخوى ...
مساك الله بالخير ...
ات اخوى مشيت بعيد مالك ؟؟؟ ناسا فى المنبر ده ... زراقه و فروخ و فلاته و نوبه ... عاملين لينا فيا أولاد عرب ؟؟؟؟ أها نحن أولاد البحر نقول شنو ؟؟؟
سبحان الله !!! سمك ياكل سمك !!!
عبدالماجد

--------------------------------------------------------------------------------
مداخلة: #5
العنوان: Re: واكتشفت بالامس انني عنصــري اسـود حـقير!!
الكاتب: Adil Osman
التاريخ: 25-06-2006, 01:39 ص
Parent: #1


Quote: فعندما استعدت الذاكرة لتحليل ردة الفعل بدات اتفرس ملامح غريمي وانا قد عيرته بالعبد والعبودية في بلادي ارتبطت بلون البشرة وملامح الوجه لا بالسلوك والمفاهيم..وفي الحقيقة وجدته انعم بشرة مني وافتح لونا مني واوسم ملامح مني..بالاضافة الي انه امريكي من العالم الاول وانا سوداني لاجيء مضطهد ات من قاع الدنيا!!
وغاصت بي الذاكرة ايضا في تقصي هذه النفسية العنصرية التي تركبني من حين لحين رغم كل تراكمات الوعي الجديد ولكنها عند اللزوم ( تتاورني كوجع الضرس الاليم)وذهبت الي احياء قريتي القصية في الريف البعيد استدعي ذلك الماضي الاليم حيث الاحياء الفقيرة واسماء اهلهاواهلي الطيبين المفعمة بالعبودية والاستلاب ( تام زينو..عجب سيدو..الكريم مهال..خادم الله مستورة..الكريم ادي..قسم السيد..) وهي ادانات دامغة من تاريخنا العنصري البغيض.. وكل ما اعرفه عن هؤلاء الطيبين انهم خالاتي واعمامي واخواتي واخواني..فما كنت اوسم منهم ولا افتح بشرة من غالبهم ولا اذكى من غالبهم ناكل ونلعب معهم وننام في بيوتهم ولكن عند ساعة الجد ولحظات الفصل تقول لي القرية وارثها العنصري البغيض انهم ( عبيد جدي وسراريه وخدمه)!! لا نتزوج منهم ولا يتطاولون للزاوج منا وهو اسوأ انواع الاستلاب والاسترقاق ان يتوطن الخنوع والانكسار في نفسية الانسان وذهنيته وهو يقبله امرا واقعا لا مناص منه رغم كل مواثيق حقوق الانسان واعلانات الانعتاق والتحرر من العبودية والاسترقاق ..هنا تقع المفارقة الغريبة..الاسود يستعبد اسود!! وسواد اللون وحده معيار لتحديد العبودية!! انه السودان حيث تعيش وتتوطن اسوأ انواع العنصرية في هذا الراهن الوخيم..والكل يلغي الكل
انت اسود اذن انت عبد....انت ابيض اذن انت حلبي انت غريب.. غير ذلك انت عريبي جلف ..وعقدة اللون اصابت ثقافتنا بعمى الالوان..ونحن السودانيين اي السود من بلاد السودان باستحياء..لا مكان للون الاسود..لون ادم السوداني.. لون الاديم..لون التراب في
حياتنا عندما نوصف الوان بشرتناونحن نقول باستحياء للاسود منا فلان ازرق,,,فلان الاخدر الليموني والبرتكان الناير..وخداري الما بخلي اللونو زرعي!!!
عدت من رحلة غوصي في ذلك الماضي البغيض احتقر نفسي واسـب الاوضاع وهذا الوضع اللئيم..الذي قذف بنا الي منافي الدنيا لائذين بالغريب من القريب..فكنت انا السائق لذاك الاسود الامريكي .. وكنت انا اللاجيء في بلاده.. وانا الذي اقتات من خيراتهم وشعبي يتصدقون عليه بمساعداتهم وانا الاتي من وطن هو ارض المجاعات والفساد والارهاب والهوس الازيم..اذن كيف غريمي الامريكي بالعبد..يا هباني ايها العبد الكبير يا عبد العبيد!!
و(فكفكت) لام الانقاذ ولكل اولئك القوادين من لا زالوا يقولون: سير سير يا بشير
والبلاد تسير الي الهلاك والدمار والتشطير بقيادة هذا الاهبل العوير!!


كتابة بديعة ومؤلمة وعميقة.. بارك الله والوطن فى قلمك يا هشام هبانى..

--------------------------------------------------------------------------------
مداخلة: #6
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 25-06-2006, 06:36 ص
Parent: #5


عبد الماجد اخوي

سلامات

كمان ده وجه اخر من تجليات الازمة اسمو (عقدة اللصيق ) وهو اسوا انواع الاحساس بالدونية ان ترفض ذاتك!!

محبتي

هباني

--------------------------------------------------------------------------------
مداخلة: #7
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 25-06-2006, 06:56 ص
Parent: #6


الاخ/ عادل عثمان

كيفنك يا جميل

ما حاولت ان اتناوله من هذه الواقعة طرق هذا الجرح الغائرالمسكوت عنه
جدا جدا في حياتنا السودانية رغم انه يمثل شرخا بائنا من شروخات ازمتنا الوطنيةفي ام نسيجنا الاجتماعي والثقافي وله تداعياته السياسية في تاريخنا الحديث منذ ايام اللواء الابيض وحتي بروز الحركات التحررية في جنوب وغرب الوطن!!
وهو امر لا بد من مواجهته بالشجاعة والشفافية الكافية لمعالجته وعلي الاقل تسكين الامه ونحن نطمح في وطن خال من الجراحات والتشوهات والالام في ظل اوضاع راهنة تنكأ هذا الجرح القديم المتجدد وتعمقه كل يوم ليسود الخراب والبلاء في زمن (الانقاذ) سرطان هذا الوطن التعيس الذي يجتاح كل الخلايا مهددا ايانا بالتلاشي والفناء!!


محبتي واحترامي


هباني

--------------------------------------------------------------------------------
مداخلة: #8
العنوان: Re: واكتشفت بالامس انني عنصــري اسـود حـقير!!
الكاتب: خالد عبد الله محمود
التاريخ: 25-06-2006, 08:28 ص
Parent: #7


و الله يا هشام

كلما أقرأ كتاباتك أستمتع


طرقت موضوع حساس جدا كل من تناولوه كانوا يصبون الزيتت على النار و يزيدون المشكلة
و فاحت رائحة العنصرية في المنبر تكاد تشم رائحتها على بعد مليون IP .

الله يخليك

و يرجع ليك الأربعين دولار حقتك ...

قول آمين

--------------------------------------------------------------------------------
مداخلة: #9
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 25-06-2006, 08:31 ص
Parent: #8


خالد الجميل

وارجع لينا بلدنا الجميل..قول امين

محبتي

هباني

--------------------------------------------------------------------------------
مداخلة: #10
العنوان: Re: واكتشفت بالامس انني عنصــري اسـود حـقير!!
الكاتب: Muhib
التاريخ: 25-06-2006, 08:34 ص
Parent: #8


السهل الممتنع ..وتسلم هباني ..

--------------------------------------------------------------------------------
مداخلة: #11
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 25-06-2006, 11:17 ص
Parent: #10


الجميل محب


سلامات وكيفنك...

اعمل حسابك من العقل الباطني والعرق دساس!!


هباني

--------------------------------------------------------------------------------
مداخلة: #12
العنوان: Re: واكتشفت بالامس انني عنصــري اسـود حـقير!!
الكاتب: محمد ابراهيم قرض
التاريخ: 25-06-2006, 11:50 ص
Parent: #1


هباني ..
بلادك حلوة أرجع ليها ..
دار أمريكا ما بترحم ..

و بعدين الملح ده موجود في
كله مكان .. و خاصة في وطنا
الغالي السودان !!!

كفاية الرجعت سالم ..
الجاتك في دولاراتك جاملتك !!

و بعدين خايفين بكرة يطلعوك لينا
في الأخبار ..
خلية نايمة قامت صحت !!!

--------------------------------------------------------------------------------
مداخلة: #13
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 25-06-2006, 12:05 م
Parent: #12


الجميل الظريف الدكتور ود قرض

سلامات با زول يا سمح وليك وحشة

والله يبدو الامور والعصلجة مباريانا لامريكا يعني عطية هناك ساكينا
وهنا عطية الخواجات يا محمد عجمي ما بتفاهم تب والله استر!!

وسلامي لكل ال قرض بعموم القضارف وقلع النحل

محبتي واحترامي


هباني

--------------------------------------------------------------------------------
مداخلة: #14
العنوان: Re: واكتشفت بالامس انني عنصــري اسـود حـقير!!
الكاتب: ابوالقاسم ابراهيم الحاج
التاريخ: 25-06-2006, 09:50 م
Parent: #13


إهدىء يا محمد عمال تشخت وتشتم من الصبح مالك ؟!.

سودانى ابن ال.... كلام عنصرى جارح وهو صحبى!!.
لم اقل شىء تركته ومضيت فى طريقى ولما رجعت وقبل ان ادخل عتبة العمارة استوقفنى واعتذر لى بحرارة وقال: ما اخدتش بالى والله انت عسل وود ناس ما لكش دعوة بإبن ال...داك؟!.


حاجات كدا يا ود هبانى الواحد ما يقدر يكتشفها فى نفسه الا وقت الزنقات الضيقة والغريبة.

ولكن الجميل انك تمارسها وترجع وتفتش فى الجذور التى خزنت فينا هذه الامراض فى كل نفس سودانى ؟!!.

هل الى خلاص من سبيل!!!؟؟؟.

مع التحية.

--------------------------------------------------------------------------------
مداخلة: #15
العنوان: Re: واكتشفت بالامس انني عنصــري اسـود حـقير!!
الكاتب: عوض الله الفولانى
التاريخ: 26-06-2006, 06:51 ص
Parent: #14


عبد الماجد كتب :-


Quote: ناسا فى المنبر ده ... زراقه و فروخ و فلاته و نوبه ... عاملين لينا فيا أولاد عرب ؟؟؟؟ أها نحن أولاد البحر نقول شنو ؟؟؟



ها أنت تمشى عكس التيار بهذه اللهجة العنصرية التى نبغضها جميعا و تضررنا
منها و هبانى صاحب هذا البوست الرائع هو واحد منهم و احسب انك مررت او
احسست بها يوما ,,, اما العروبة التى تتشدق بها انا و غيرى و هم كثر
فى هذا المنبر لم نركض ورائها بل فرضت علينا اى , ويبدو لى انك لم تخرج من
السودان شبر واحد اذا اردت ان تعرف قدر نفسك و عروبتك سافر الى أى دولة عربية
ناهيك من الدول الغربية و قتها فقط ستكتشف ما هو موقعك كسودانى بين الشعوب
( قال اولاد البحر قال ).

عفوا اخى هبانى ابدا ما اردت ان اعكر صفو هذا البوست الرائع الا أن الكلام الذى
تفوه به المذكور اعلاه كان مستفزا لمشاعر كل القبائل التى استحقرها فى مداخلته
و لك العتبى حتى ترضى اخى هبانى .

الفولانى

--------------------------------------------------------------------------------
مداخلة: #22
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 26-06-2006, 08:14 م
Parent: #15


الحبيب عوض الله

سلامات يا زول

اخوك دكتور عبد الماجد ابعد ما يكون عن هذه النزعة العنصرية
بل كصراحته المعهودة يسمي احيانا الاشياء باسمائها عندما تستفزه
مثل هذه الخطابات العنصرية..مع خالص مودتي.


هباني

--------------------------------------------------------------------------------
مداخلة: #21
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 26-06-2006, 08:05 م
Parent: #14


الحبيب ابو القاسم

سلامات

عارف الحاجات دي اصلها موجودة ولابدة في قعر المخيخ وما بتنعرف الا في
الزنقات والمحكات الزي الوقع فيها اخوك العــــب الكبير هباني!!
عشان كده اتجنب المطبات!!

محبتي

هباني

--------------------------------------------------------------------------------
مداخلة: #16
العنوان: Re: واكتشفت بالامس انني عنصــري اسـود حـقير!!
الكاتب: Deng
التاريخ: 26-06-2006, 07:01 ص
Parent: #1


Habani

Well said.

Deng.

--------------------------------------------------------------------------------
مداخلة: #17
العنوان: Re: واكتشفت بالامس انني عنصــري اسـود حـقير!!
الكاتب: Asma Abdel Halim
التاريخ: 26-06-2006, 05:22 م
Parent: #16


Quote: ( تام زينو..عجب سيدو..الكريم مهال..خادم الله مستورة..الكريم ادي..قسم السيد..)[/

B]

أريتها يا هشام لو كانت أسماء ليهم. هى صفات للأسياد والستات يعنى الواحد منهم bill board فى شكل إنسان.

--------------------------------------------------------------------------------
مداخلة: #18
العنوان: Re: واكتشفت بالامس انني عنصــري اسـود حـقير!!
الكاتب: Nyuol Nyuol
التاريخ: 26-06-2006, 06:08 م
Parent: #17


أخي هشام
كلام في محله،هذا ما من اجله قامت الحركة الشعبية والجيش الشعبي لتحير السودان، وأتمنى من الساسة أن يعوا ويتعلموا من هذه المقال الرائع وشكرا. نيوال

--------------------------------------------------------------------------------
مداخلة: #23
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 26-06-2006, 08:31 م
Parent: #16


العزيز دينق

سلامات

انه ميراث قبيح لا زال يشكل ادانات لماضينا البغيض
وهو ماض لسنا مسئولين عن تداعياته وحيثياته ولكنا مطالبون
اخلاقيا بادانته..لراب الصدوع في نسيجناالاجتماعي.لبناء وحدة وطنية..قائمة علي التصالح والتاخي والمساواة والمحبة باعتماد مبدا المواطنة معيارا للحقوق والواجبات بين اهل الوطن.

محبتي


هباني

--------------------------------------------------------------------------------
مداخلة: #19
العنوان: Re: واكتشفت بالامس انني عنصــري اسـود حـقير!!
الكاتب: AMNA MUKHTAR
التاريخ: 26-06-2006, 06:21 م
Parent: #1


Quote: هذه النفسية العنصرية التي تركبني من حين لحين رغم كل تراكمات الوعي الجديد ولكنها عند اللزوم ( تتاورني كوجع الضرس الاليم)وذهبت الي احياء قريتي القصية في الريف البعيد استدعي ذلك الماضي الاليم حيث الاحياء الفقيرة واسماء اهلهاواهلي الطيبين المفعمة بالعبودية والاستلاب ( تام زينو..عجب سيدو..الكريم مهال..خادم الله مستورة..الكريم ادي..قسم السيد..) وهي ادانات دامغة من تاريخنا العنصري البغيض

.



. وكل ما اعرفه عن هؤلاء الطيبين انهم خالاتي واعمامي واخواتي واخواني..فما كنت اوسم منهم ولا افتح بشرة من غالبهم ولا اذكى من غالبهم ناكل ونلعب معهم وننام في بيوتهم ولكن عند ساعة الجد ولحظات الفصل تقول لي القرية وارثها العنصري البغيض انهم ( عبيد جدي وسراريه وخدمه)!! لا نتزوج منهم ولا يتطاولون للزاوج منا وهو
Quote: اسوأ انواع الاستلاب والاسترقاق ان يتوطن الخنوع والانكسار في نفسية الانسان وذهنيته وهو يقبله امرا واقعا لا مناص منه رغم كل مواثيق حقوق الانسان واعلانات الانعتاق والتحرر من العبودية





Quote: هنا تقع المفارقة الغريبة..الاسود يستعبد اسود!! وسواد اللون وحده معيار لتحديد العبودية!!






Quote: انه السودان حيث تعيش وتتوطن اسوأ انواع العنصرية في هذا الراهن الوخيم..والكل يلغي الكل
انت اسود اذن انت عبد....انت ابيض اذن انت حلبي انت غريب.. غير ذلك انت عريبي جلف ..وعقدة اللون اصابت ثقافتنا بعمى الالوان





Quote: لا زالوا يقولون: سير سير يا بشير
والبلاد تسير الي الهلاك والدمار والتشطير بقيادة هذا الاهبل العوير!!





ياهو ده السودان ..

--------------------------------------------------------------------------------
مداخلة: #20
العنوان: Re: واكتشفت بالامس انني عنصــري اسـود حـقير!!
الكاتب: Yassir Tayfour
التاريخ: 26-06-2006, 07:56 م
Parent: #19


ود هبانى

السودانيين ديل كلهم عبيد اولاد هرمة، بس طلع منهم الرشايدة.



___________
واحد صاحبنا يا هشام قال: انا ما كنت قايل نفسى اسود الا لما جيت كندا

--------------------------------------------------------------------------------
مداخلة: #26
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 27-06-2006, 10:19 ص
Parent: #19


الاخت الجسورة امنة

سلامات
معا يدا واحدة لمحو هذا العار الذي يلطخ ويوهن نسيجنا الاجتماعي لاجل سودان المواطنة والعدل والمساواة والاخاء..والحرية..لبناء وحدة وطنية تقوم علي التمازج الاجتماعي والثقافي الاصيل الخالي من عقد الامس البغيض بين الاشقاء بمختلف مكوناتهم وانتماءاتهم..ولك الود والاحترام.

هباني

--------------------------------------------------------------------------------
مداخلة: #24
العنوان: Re: واكتشفت بالامس انني عنصــري اسـود حـقير!!
الكاتب: AMNA MUKHTAR
التاريخ: 27-06-2006, 09:48 ص
Parent: #1


مالا يفصح عنه (2) نكتة الحرورية والعبودية فى بلد الحضارات الزنجية

--------------------------------------------------------------------------------
مداخلة: #25
العنوان: Re: واكتشفت بالامس انني عنصــري اسـود حـقير!!
الكاتب: AMNA MUKHTAR
التاريخ: 27-06-2006, 09:52 ص
Parent: #1


مداخلة للأخ البينو أكون ألبينو فى بوست آخر :


Quote: نعمة الرب يسوع المسيح وسلامه عليكم.امين
التحية لك الاستاذة امنة .
الموضوع جد حلو ومثير وحكاية الحرارة والعبودية منتشرة حتي بين الاعراب السودانيين انفسهم من الجعلية لي كنانة مناصير , والغريبة انو احد اصدقائي يدعي اباذر وهو جعلي من منطقة الكبوشية قال لي يوما ان له ابناء عمه لونهم افتح منو شوية بيقولوا ليهو يا عبد!!
وكمان واحد من كنانة بيوصم بالعار لان حبوبته خادمة قالوا هو ما عربي حر لان حبوبته خادمة.
وبصراحة حاولت كثيرا مع بعض معارفي واصدقائي العرب السودانيين تفسير معني الحرارة وتوصلنا في نهاية المطاف علي ان الانسان الحر هو الذي لم يختلط بدم اجنبي وهكذ اصبحت وحدي الحر لاني دينكاوي من ابوي وحبوبتي للاسلاف وطلع الجماعة ماهم حرين ولا شافوا الحرارة وهذا ما اثار حفيظة احدهم فقال لي انت عب جنقاي وانا طبعا رديت ليهو وقلت انت ذي الكلب المهجن لا معروف كلب ولا معروف ذئب واحسن اقول ليك انت بغل لا حمار لا حصان
(مع الاعتذار للجميع).
المهم الموضوع جد محتاج لي وقفة صادقة وانا بتاسف واتحسر لما انظر للثقافة العربية السودانية والقاها هي بتقيف مع الحكاية دي وبتاكد الحرارة والعبودية في امثالها ذي .....وما تامن العب الجحر حساي والعبد ناسي و اضريب العب بالعب والكثير من الامثال التي تدعوا لهذه العادة السخيفة.

Quote: فى مقدمته ان ثقافة المنتصر هى التى كانت تسود. ودأب المنتصر فى الحروب على استعباد أخيه الانسان المهزوم فيها،ومن هنا نشأت فكرة العبودية


وبالمناسبة اهلي الدينكا رغم انهم رجال قتال يحاربون بعضهم وياسرون انفسهم الا ان الاسير يطلق حرا بعد انتهاء الحرب ولا يستعبد كما ان النساء ان غطن رجلا في المعارك وجب ترك ذلك الرجل دون ايذاءه كما لا يؤذي النساء !!
انا اعتز اني دينكاوي والعبد البقول لي عبد لانو ما عندو اصل وحتي لو كان من قريش لان لا اصل من ضغر نفسه امامه عينيه فاساء الي الاخرين حتي يرتفع هو .
واكرر الشكر للاستاذة واسال الله لها التوفيق ولنا المنفعة والفائدة
وجزاكي الله خير جزاء .
وان كان الله معنا فمن علينا
وليبارككم الرب وسلامه ونعمته معكم الي الابد.
امين


--------------------------------------------------------------------------------
مداخلة: #27
العنوان: Re: واكتشفت بالامس انني عنصــري اسـود حـقير!!
الكاتب: غادة عبدالعزيز خالد
التاريخ: 27-06-2006, 10:23 ص
Parent: #25


Quote: والعبودية في بلادي ارتبطت بلون البشرة وملامح الوجه لا بالسلوك والمفاهيم




تعرف يا هشام,
اكثر مما صدمنى بعد انضمامى الى سودانيز اون لاين هو النبرات العنصرية, و الوقوف عند لون البشرة و ملامح الوجة.. حقيقة حاجة محزنة.. ما احزننى اكثر,ليس فقط وجود النبرة العنصرية, لكن ربما لاننى كنت بعيدة لفترة طويلة, و لم افكر قط فى انقاص قدر شخص لمجرد لون البشرة, لذلك صدمت بعمق الفوهة بيننا.. و اتمنى ان يأتى اليوم الذى تندفن فية هذة الفوهة

خالص التحايا
غادة

--------------------------------------------------------------------------------
مداخلة: #28
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 27-06-2006, 10:28 ص
Parent: #27


العزيز ود طيفور

سلامات

نحن شعب حر وعزيز بمواقفه وشموخه واحرار بمثلنا وقيمنافي مواجهة الظلم
والاستحقار (فالحرورية) قيمة وسلوك تكلل حياة هذا الشعب الشامخ الابي.

محبتي


هباني

--------------------------------------------------------------------------------
مداخلة: #29
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 27-06-2006, 10:37 ص
Parent: #27


الاخت/ غادة

سلامات
لا زلنا نعاني هذه الرواسب البغيضة من تراكمات الماضي الاليم
والذي لم نساهم في صناعته ولكن صمتنا حياله وعدم نقده ومحو اثاره
لهو اقرار بهذا الجرم الكبير وادانة لنا نحن اجيال الحاضر والتاريخ لن يرحم
الجهلة والمغرضين..

محبتي واحترامي


هباني

--------------------------------------------------------------------------------
مداخلة: #30
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 27-06-2006, 11:44 ص
Parent: #29


الاستاذة /اسماء
سلامات
يعني تخيلي واحد اسمو( عجب سيدو) هذا الاسم المفعم بالعبودية والاسترقاق وهو اسم شائع يفترض لو هنالك دولة راشدة ذات قوانين عادلةان تشطب هذا الاسم من سجلات مواطنيها بل تستبدل اصحابها باسماء تعيد لهم كرامتهم.. وتمتع التسمي بهذا الاسم السيءولكن هيهات نحن نعيش في ظل دولة تمارس السخرة والاسترقاق لمواطنيها وتشيع روح العنصرية والقبلية بين مواطنيها لمارب سياسية قذرة.

احترامي

هباني

--------------------------------------------------------------------------------
مداخلة: #31
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 28-06-2006, 05:12 ص
Parent: #30


؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

--------------------------------------------------------------------------------
مداخلة: #32
العنوان: Re: واكتشفت بالامس انني عنصــري اسـود حـقير!!
الكاتب: Asma Abdel Halim
التاريخ: 28-06-2006, 05:30 ص
Parent: #31


انت اسود اذن انت عبد....انت ابيض اذن انت حلبي انت غريب.. غير ذلك انت عريبي جلف ..وعقدة اللون اصابت ثقافتنا بعمى الالوان..ونحن السودانيين اي السود من بلاد السودان باستحياء..لا مكان للون الاسود..لون ادم السوداني.. لون الاديم..لون التراب في

تعرف يا هشام إنه مؤسسة الرق دى واحدة فى كل العالم رغم محاولات الافارقة "أنسنة" الرق فى افريقيا. اللون يصبح لا قيمة له إذا لم تمر إمتحان "النقطة الواحدة" The one drop rule بتاع ناس Jim Crow
كلنا راينا وعشنا مع اولئك اللذين يفوقوننا جمالأ وذكاءً ولوناً قمحيا ولم يشفع لهم مع ذوى بشرة مثل القطيفة السوداء.

--------------------------------------------------------------------------------
مداخلة: #33
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 28-06-2006, 05:55 ص
Parent: #32


الاستاذة/ اسماء

صباح الخير

((كلامك تب سمح بس علا بالتنقليزي..واخوك تب ما فاهم شي وحات الله
وكمان اخواني ناس الكاشف ما فاهمين حاجة...شيشك علينا!!))

محبتي واحترامي

هباني

--------------------------------------------------------------------------------
مداخلة: #34
العنوان: Re: واكتشفت بالامس انني عنصــري اسـود حـقير!!
الكاتب: رأفت ميلاد
التاريخ: 28-06-2006, 06:43 ص
Parent: #33


الجميل دومآ عزيزى هبانى

ربما من الداء قد يكون الدواء
وفى إيلام النفس قد يكون ا لشفاء

لو كلنا تخاطرنا مع أنفسنا هكذا دومآ
لخر البشير.. ونائبه العوير

هنيئآ لنا بك هبانى

أخوك رأفت

--------------------------------------------------------------------------------
مداخلة: #35
العنوان: Re: واكتشفت بالامس انني عنصــري اسـود حـقير!!
الكاتب: هشام هباني
التاريخ: 03-08-2006, 02:04 م
Parent: #34


الجميل رافت

جيتك بعد شهر راجع واسف للتاخير

نعم نحن في حوجة للتخاطر مع انفسنا لنحرك هذا الواقع الاسن من المفاهيم الجائرة تهيئة لطردها الي الابد ونجد لها ثقبا لتصبح اخراجا بلا اياب وحينها نقول: الحمد لله الذي اذهب عنا الاذى وعافانا!! محبتي واحترامي.

هباني

--------------------------------------------------------------------------------
مداخلة: #36
العنوان: Re: واكتشفت بالامس انني عنصــري اسـود حـقير!!
الكاتب: Shao Dorsheed
التاريخ: 03-08-2006, 07:59 م
Parent: #1


*


--------------------------------------------------------------------------------