الجمعة، 25 أبريل 2008

المنظمة السودانية لمكافحة المرارة وام فتفت والبطان والشلوخ ودق الشلوفة

مكتبة هشام هباني المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزان!!
31-01-2007, 06:28 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1188807999&rn=0


--------------------------------------------------------------------------------
مداخلة: #1
العنوان: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزان!!
الكاتب: هشام هباني
التاريخ: 31-01-2007, 06:28 م


الاخوة الاعزاء

ترسيخا لثقافة السلام والمحبة ونبذ ثقافة العنف والتوحش الاجتماعي والسياسي
في واقع السودان الراهن..اعلن انا هشام هباني عن قيام المنظمة السودانية لمكافحةالمرارة وام فتفت وذبح الحيوان امام الاطفال واستعمال ( الكيزان) في الازيار وفي السيارات وفي السياسة وعادات البطان واستعمال السلاح الناري في الافراح و عمليةالشليخ ودق الشلوفة ودق الشطة ودق التوم وجميع انواع التوابل ودق البطيخ ودق الويكة ودق الشرموط ودق العيش ودق الريحة ودق الدهب ودق الباب ودق قطن النجادةودق الظار ودق جميع انواع الحلويات!!وجلد الاولاد في المدارس والبيوت واستعمال كل انواع الفخاخ في صيد الطير والحيوان والانسان وبيوت الاشباح والمعتقلات واستعمال القزاز الرسالي والحجامة البلدية وما شابهها من عادات عنفوية واكلات تعزز ثقافة العنف في واقع حياتنا.. وهو نوع من المحاربة الجذرية والقاعدية لبذور العنف في بيئاتنا الشعبية والرسمية والتي تتمثل في مثل هذه التفاصيل التي لا تحظي باهتمام الناس كثيرا وهي تفاصيل خطيرة ومنها تطورت ثقافة العنف الرسمي والشعبي التي صارت تهدد الوطن بالضياع و هي تمثل ادانة صريحة لوعينا و لواقعنا الثقافي والاجتماعي وهي تجلب لنا تهما بالمجان من اعدائنا المتربصين بنا وهم ينعتونناباننا شعب متوحش وارهابي لا زالت فينا وحشية تحول دون انتمائنا لهذا الركب الحضاري الانساني والذي لا يسمح باستصحاب بشر متوحشين في معيته!
وكل من يانس في نفسه الكفاءة متطوعا معنا في هذا العمل الحضاري الانساني فمرحبا به عضوا فاعلا ملتزما بهذه الاهداف الانسانية النبيلة ونحن نتطوع في هذه الحملة الحضارية السلمية لمحاربة جذرية لبذور ثقافة العنف في بلادنا شعبيا ورسميا من التفاصيل القاعدية الشعبية وحتي نظام الحكم المتوحش وبالله التوفيق!!

هشام هباني

--------------------------------------------------------------------------------
مداخلة: #2
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: هشام هباني
التاريخ: 31-01-2007, 09:06 م
Parent: #1


واهيب بعضويتنا الجديدة ان تزودنا من داخل السودان باشرطة وثائقية عن جميع هذه الممارسات العنفية وذلك لشرح مشروعنا الوطني الحضاري لكل المنظمات العالمية العاملة في مجال مكافحة الظلم والعنف في الخارج للمساهمة في دعم هذه المنظمة الاولى من نوعها في العالم(طبعا حتكون منظمة مجتمع مدني سودانية مية المية واخر دولارات ودعومات وراحات ومؤتمرات وطيارات وفنادق وخواجات وعربات ليلي علوي.. والخواجات ناس جادين جدا حيصوروا لاول مرة المرارة وام فتفت ودق الشطة المسكينة ودق الويكة المظلومة ظلم الحسن والحسين.. ودق الشرموط!! واي سودانية داقين ليها شلوفتها لازم توثقوها وتصوروها..الشلوفة الواحدة المدقوقة مدعومة دوليا بتكون بخمسين الف دولار علي حسب درجات الدقة.. والشلوخ المطارق والنقرابي ودرب الطير دي حاجة تانية كل نوع بسعرو براهو عند الخواجات و ما عاوز كاني ماني الرئيس الاوحد هباني اذل من اشاء واعين من اشاء!!) واواصل

--------------------------------------------------------------------------------
مداخلة: #3
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: هشام هباني
التاريخ: 31-01-2007, 09:53 م
Parent: #2


اريد توثيقا حيا لعملية ذبح البهيمة المسكينة وتعليقها في شجرة البيت وسلخها في حضور اطفال البيت.. وهم يصفقون فرحون لمنظر الدماء..ومتبوعة بعادة القفز فوق الذبيحة
للتبرك بالدم... وايضا عملية تقطيع اللحمة واشراك الاطفال فيها... وبعد ذلك عمليات تجهيز المرارة بكامل تفاصيلها...نفخ الفشفاش بالطريقة السودانية المشهورة وعملية صب بعض السوائل المعوية بداخله.. وعملية اكل جزء من الكبدة النيئة( تمرة الفؤاد) وتجهيز الكرشة وابو الدمام والضنب والبنكرياس والكلاوي وابو الحلقوم.. وبعدها اكل المرارة بمصاحبة الاطفال وبالشطة القبانيت والجميع في حالة انهراش مصحوبة بحكة الراس من شدة سخونة الشطة ومصحوبة بوحوحة شديدة ومعاها شفيط المخاخيت بتاع اطفالنا المشهور من سخونة الشطة القبانيت بشدة عشان نحنن الخواجات شديد وبتكتر الدعومات بالضورار..ما الخواجات قلوبهم رهيفة شديد حكاية الوحيح وشفيط المخاخيت بتاع شفعناده والله ده حيجيب دعومات رهيبة لمنظمتنا الفتية الوطنية!!) واواصل

--------------------------------------------------------------------------------
مداخلة: #4
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: Mustafa Mahmoud
التاريخ: 31-01-2007, 10:14 م
Parent: #3


wad habbani
this for you

deep love and respect to you and to your family

mustafa

do not do this
lol


أحمد مطر >> مسألة مبدأ ..!

مسألة مبدأ ..!


قال لزوجه: اسكتي . و قال لابنه: ا نكتم.

صوتكما يجعلني مشوش التفكير.

لا تنبسا بكلمةٍ أريد أن أكتب عن

حرية التعبير !

--------------------------------------------------------------------------------
مداخلة: #6
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: هشام هباني
التاريخ: 01-02-2007, 03:51 ص
Parent: #4


دكتور مصطفي

سلامات

والله مشتاقين..بس عاوزين لينا كضم كضميمن مرارة في لندن من خرفان الانجليز الغلاد ديل
قبل ما نبدا برنامج المكافحة ده..عشان تكون وداعية لاخر مرارة!

--------------------------------------------------------------------------------
مداخلة: #5
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: هشام هباني
التاريخ: 31-01-2007, 10:23 م
Parent: #3


واي احد منكم عندو.مرتو ..بنتو,, حبوبتو امو...خالتو...جارتهم..حية او ميتة لديها صورة وهي (مشلخة او مدقوقة الشلوفة) ليبعثها الينا في هذاالبوست لتصنيفها من ضمن ضحايا دق الشلوفة او ضحايا التشليخ لنحفظها في اضابيرنا الالكترونية ادانة موثقة لثقافة العنف عندنا! وايضا الرجال المشلخون من ذويكم وجيرانكم احياء واموات ابعثوا الينا بصورهم بجميع انواع شلوخهم مع التعريف بطبيعة الشلخ... لتصنيف الشلوخ( طبعا كل شلخ بتمنو عند الخواجات) وارصدوا لنا اسماء المجرمين والمجرمات من الشلاخين والشلاخات ودقاقات الشلاليف..في كل انحاء الوطن لنرسل اسماءهم الي ( لاهاي) حيث هنالك اقسام خاصة في محكمة العدل لمثل هذه الامور تحت بند المستجدات!!
يعني نريده ان يكون عملا علميا موضوعيا وموثقا!
وايضا صوروا لنا العملية البربرية الوحشية ل( دق العيش في الحواشات) حتى العيش ذلكم النبات المسالم لم يسلم من بطش الادميين في بلادنا..لاول مرة في بلاد ادمية يجلدون الذرة في مواسم الحصاد!! ويقول اهلنا في امثالهم ( والله ندقك دق العيش!) ثقافة عنف ناخعة في كيان هذا المجتمع القاسي و هنالك في العالم المتحضر حاصدات حديثة تحصد العيش بكل تهذيب وادب ورحمة!! ونواصل

--------------------------------------------------------------------------------
مداخلة: #7
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: هشام هباني
التاريخ: 02-02-2007, 07:55 ص
Parent: #5


وايضا وثقوا لنا جريمة( دق الريحة) عند امهاتنا في بيوت الافراح وكانماعجزت اللغة ان تولد لنا مصطلحا غير كلمة( دق)! فكيف تدق الريحة... وكان يمكن ان نقول عمل الريحة..صنع الريحة..شغل الريحة....وهلم جرا.. لكن كلمة( دق) كلمة عنيفة لا تناسب مقام الريحة والعطور هذه الاشياء الجميلة!!
وايضا وثقوا لنا جريمة (دق) التوابل والبهارات حيث يمارس اهلنا عنفا علي كل انواع التوابل والبهارات من خلال عمليات (دقها) بواسطة (الفنادك) القاسية واغانينا تقول ادونا فندقكم ندق ونديكم تدقوا تدونا..كاروووشة تاكلكم)! ونواصل

--------------------------------------------------------------------------------
مداخلة: #8
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: عواطف ادريس اسماعيل
التاريخ: 02-02-2007, 12:40 م
Parent: #7


الله يجازي محنك ياهشام طلعتنامجرمين وأتالين أتلا.. كمان ما تنسى دق الدهب

وعايزة زي دقة فلانة وفلانة دقو ليها دهب بمليون جنيه وكمان عندنا ملاح ام دقوقة

معليش ياهشام في زول بدق في الباب افتح ليهو وارجع وكان لقيتو شافع مزعج ادقو ليك

جنس دقة عمرها ما حصلت ... دقة الله يلاقينا ولا دقة الشمار المدقوق وعارضنه فوق السوق.[/B
]سوري يا هشام رجعت وقلبي بدق جنس دق الله يكضب الشينة .

--------------------------------------------------------------------------------
مداخلة: #9
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: هشام هباني
التاريخ: 02-02-2007, 01:14 م
Parent: #8


الاخت العزيزة عواطف

سلامات


Quote: الله يجازي محنك ياهشام طلعتنامجرمين وأتالين أتلا.. كمان ما تنسى دق الدهب

وعايزة زي دقة فلانة وفلانة دقو ليها دهب بمليون جنيه وكمان عندنا ملاح ام دقوقة

معليش ياهشام في زول بدق في الباب افتح ليهو وارجع وكان لقيتو شافع مزعج ادقو ليك

جنس دقة عمرها ما حصلت ... دقة الله يلاقينا ولا دقة الشمار المدقوق وعارضنه فوق السوق



انت اذن من هذا اليوم قررنا تعيينك ناشطة معتمدة في هذه المنظمة الوطنية لما ابديتميه من خبرة وملكات في استنباط ثقافة(الدق) في تفاصيل حياتنا(المدقوقة)!!
واذكرك ان اهلنا لا يسمون حاصدات العيش والقمح الحديثة بالحاصدات بل (بالدقاقات) ولدينا(حبوبة) بمدينة القطينة عليها الرحمة اسمها الحاجة(دقاقة)!!ويسمون اولادها رحمة الله عليهم جميعهم باولاد دقاقة

--------------------------------------------------------------------------------
مداخلة: #10
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: علوبه
التاريخ: 03-02-2007, 06:47 م
Parent: #1



هاء . هاء !

هشام هبانى ما هبيتو ؟

شوف الدق الكايس ليهو فيهو انواع كدى شوف الصور دى وادينا قولك !!!!
See what they do in Japan!!!!

They eat small (dead) children


شوف دى كمان


--------------------------------------------------------------------------------
مداخلة: #11
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: علوبه
التاريخ: 03-02-2007, 06:57 م
Parent: #1



هاء . هاء !

هشام هبانى ما هبيتو ؟

شوف الدق الكايس ليهو فيهو انواع كدى شوف الصور دى وادينا قولك !!!!
See what they do in Japan!!!!

They eat small (dead) children


شوف دى كمان


--------------------------------------------------------------------------------
مداخلة: #12
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: خالد علي محجوب المنسي
التاريخ: 03-02-2007, 07:26 م
Parent: #11




الحبيب هشام هباني الحساني سلام عليك وعلك طيبة وعافية درت

معاك نحن في كل ما ذكرت عدأ أربع

* دق الدهب فهو زينة نسائنا
* الحجامة البلدية فهي علاج لكن ليس كل من هبّ ودبّ يمارسها وبتحتاج لبصارة ومعرفة
* الصيد البري
* وختامه مسك البطان ما بنخلي كان السما تنشق

وأسمع النقول لك

هوي يا وليد .......
حصل صحاكَ عز الهجعّه
صوت شتمن بعيد مخنوق
وجاتّك شخرة الطمباري
مشتاقن يسوي القوق
ونومك طار وأتقسّم
والرشرش صبح مفروق
وأتلفحتَّ نص من توبك الجرجار
وعلي الدلكوكة سايق سوق
تلقى هناك بنات بلدك
ولاد بلدك......
يعلّو الصفقّه تقدّح في القلوب الشوق
ونغم الفال
أبشرن آبنات بالخير
والجنيات تطير لا فوق
وكم زغرودة تتفجر
تفور بالناس بعد ما تروق
يعوم الوز
صدوروا تشابي للمجهول
تميل زينوبه زي البان
يمين وشمال تودي الطوق

وأخوان أم شلخ
إنكبوا جوه الداره
زي صقرن نزل من فوق
ضرب الصوت والركزّه بفرز الناس
عشان زينوبه ما بتحوق

وعاد تتحزّم الجنيات
وتتنظّم تقيف في رووق
وكل واحد يهز ضرعاتو
والحجبات تزح لا فوق
جفير الخوسه فايت الكوع
وسيرو مع العضل مطبوق
والطاقيه تحت الحاجب المعقود
هديت أم زين ومامشريه من السوق
ويتقدّم عريس السمحة رافع صوتو
كان بسوقوا بيهو النوق
والعنجاوي ينزل في ضهورن
بس تقول منشحطّه فوقا بروق
يبدا مجرو بالترقوة
ويتحدر مع الضلع القصار ملصوق
وأحمر عين شم الدم
بعد مايرش بنات عمو
ويزيدن شوق
وثابت حيطه
لا بتهز ولا بتلز
وصاري جبينو كلو عروق
وقال بعد العقد طلقانّه
ما يحجزوا
ألا أخلوا ضهرو شقوق
هناك الحال مغيّر جد
وكان حجازو مدَ اليد
بتسمع كع....
هووي يا وليد

بعد النضمي يا هباني تقول لي نخلي البطان والله ساعة الدلوكة دي تدق الحمار بقوم لو شعرانية وبنكون مغبيين ... دحين سو لك نضمي غير دا ابعد البطان دا من قائمتك دي ولا بنعاديك

خالد محجوب .... شندي

--------------------------------------------------------------------------------
مداخلة: #13
العنوان: Re: المنظمة السودانية لمكافحة المرارة وام فتفت والبطان والشلوخ ودق الشلوفة والحجامة والكيزا
الكاتب: هشام هباني
التاريخ: 10-03-2007, 09:58 ص
Parent: #12


.............


--------------------------------------------------------------------------------

ليست هناك تعليقات:

إرسال تعليق