الزبالة وما ادراك ما الزبالة في بلد تغرق في الزبال

مكتبة هشام هباني الزبالة وما ادراك ما الزبالة في بلد تغرق في الزبالة!!
19-06-2006, 09:31 ص المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1200026071&rn=0


--------------------------------------------------------------------------------
مداخلة: #1
العنوان: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 19-06-2006, 09:31 ص


بالامس بعد ان ( صبت مطرة حدها النخرة) وسلمت بيوتنا الامريكية كعادتها من شر (الخرخرة والصببان) وكان لدي بعض وقت خارج ( الانترنت والتاكسي) وانا جالس قبالة ابني احمد في البيت وكلانا نتامل هذه المطرة الرهيبة..فبادرته بحوار هو الاول من نوعه حول المطر في السودان وكيفية احتفائنا بمقدمه نحن الاطفال انذاك في الزمن السعيد في اريافنا الجميلة
ونحن نحتفي به منذ المطرة وهي غمامة ونحن نتابع ظل الغمامة ونسمي ظلها(ابو الضليل) ونصيح ونحن نستظل بظل الغمامة ونحن نتابعها وهي تظللنا من حرارة شمس السودان الرهيبة ونحن نصيح( ابو الضليل ضلل لي بديك قرشين) وبالطبع اطفال هذا الزمن يقولون ( بديك الفين!!) مراعاة لفارق اسعار العملات بين الامس واليوم!!
وواصلت الحوار والصغير احمد مندهش لهذا الحوار بيننا وبين السحابة.. وواصلت الحوار معه الي ان رشت الغمامة ماءها وصارت مطرة وحيينا بعضنا بالمطرة ونحن نقول ( المطرة صبت وانقاذكم انقدت!!) وهذا التعديل مراعاة للذوق والحياء العام!!
وواصلت معه الي المطرة وموسم الامطار وكيف نحن نستعد له منذ فترة ونحن نصون بيوتنا المبنية من اللبن اي الجالوص اوالطين وذلك بطلائها ببعر الحمير اي ( الزبالة) واحيانا بعر البقر ولكنه ليس بجودة بعر الحمير....!! وسالني متعجبا ومتقززا في نفس الوقت عن هذه العملية المقززة والتي لم يرها ابدا..سالني عن كيفية عملها وهل الناس اي العمال الزبالين يقومون بهذه العملية القذرة بايديهم بلا قفازات!! فقلت له ضاحكا شفت يا احمد يا ولدي والله اعمامك الزبالين ديل تلقي الواحد غاتس في الزبالة لركبيهو..وتلقاهو شايل كوز الموية اشرب فيهو تمام التمام واترع عااااع وبعد داك اجيبوا ليهم الفطور جنب حوض الزبالة.. والله اعضوا ليك اللحم زي الترتيب ونحن ظاااطنا كان ما اتكرفنا ريحة الزبالة دي بنخرم عديل!!) وصاح احمد متقززا:عييييييييييييييييييييييييييييييييع
ولكنه فاجاني بسؤال اوقفني كحمار الشيخ في العقبة وهو يقول: لكن لايه بتزبلوا وتستعملوا الخرا بتاع الحمير ده...معقولة لحدي الان الناس ما اكتشفوا علاج لحماية بيوتكم من المطر غير الحاجة العفنة دي..!! فاجبته في نفسي قائلا : هو يا ولدي بقت العفنة بس في زبالة الحمير دي ما ها البلد كلها مزبلة بزبالة المزبلين والفاسدين وبقينا كلنا شعب في مذبلة التاريخ بسبب الحكم الزبالة ده والحمير القاعدين في السلطة ديل.... ولله في خلقه شئون!!

ظااااااطو

--------------------------------------------------------------------------------
مداخلة: #2
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 19-06-2006, 09:46 ص
Parent: #1


لدي سؤال لذوي الاختصاص وهو : لماذا زبالة الحمير اجود واغلى من زبالة البقر!!؟

--------------------------------------------------------------------------------
مداخلة: #3
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 19-06-2006, 10:03 م
Parent: #2


,,,,,,,,,,,,,,,,,,,,,,,,,,,

--------------------------------------------------------------------------------
مداخلة: #4
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 20-06-2006, 10:39 ص
Parent: #3


.................ز

--------------------------------------------------------------------------------
مداخلة: #5
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 24-06-2006, 05:49 ص
Parent: #4


??????????????????????????/

--------------------------------------------------------------------------------
مداخلة: #6
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: abubakr
التاريخ: 24-06-2006, 10:12 ص
Parent: #1


الحمير اكثر ذكاء من الابقار التي تحلب وتذبح ...وبالتالي الانتاج الحميري اجود واغلي من البقري

--------------------------------------------------------------------------------
مداخلة: #7
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: almulaomar
التاريخ: 24-06-2006, 10:14 ص
Parent: #1


أخي ود هباني
هذا هو أحد البوستات التي تشمها وأنت أوف لاين ، ولكن لأن الأمر يهمنا وأن الزبالة جزء من تراثنا وأنها ضرب من ضروب الديكور أو قل الفن التشكيلي إن شئت كان لابد أن أشمر وتووش أدخل وبدون قفازات كما تمنى إبنكم أحمد فعندنا في بلاد السودان لا نستعمل ادوات السلامة فبتاع اللحام يكون لابس جزمة باتا والميكانيكي بلبس سفنجه والجزار لابس مركوب والكهربائي لابس جلابية وسيد اللبن ما بلبس خوذة زي بتاعت الجوكية لزوم السقوط المميت من حمار اللبن وسيد الفحم ما لبس كمامات ولكن برغم الناس عايشين.
أنا لا أعترض على إستمرارنا في إستخدام الزبالة لأن بهيمة الأنعام بتأكل وهذا دليل عافية وأن عملية الأكل لابد أن ينتج عنها مخلفات أو ما يعرف عندنا بالبعر بمختلف أحجامه وأن عبقريتنا في تلييس البيوت بهذا البعر هي إعادة تدوير لنفايات كانت سوف تملأ المكان ويصعب التخلص منها ولنا في هذا المجال باع طويل حتى أن الجماعة فكروا في إستيراد البعر من اليونان ، بعد أن شعروا بأن البهائم أصابها إمساك بل أمسكت عن البعر مجبرة أو محتجة لا فرق لسؤ الغذاء وقلته ، لكن أعترض على الرائحة التي تنبعث من الزبالة بعد أن يتم تخميرها لفترة حتي تتماسك بحسب رأي الزبالين فهل فشلنا في إنتاج زبالة بلا رائحة أو زبالة برائحة معقولة على شاكلة زبالة دايت أو قليلة الدسم خاصة وأن الروائح الكريهة أصبحت تزكم الأنوف في شأننا كله وأن الروائح الكريهة المنبعثة هي نتيجة الفساد الحاصل .

--------------------------------------------------------------------------------
مداخلة: #8
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 25-06-2006, 12:19 م
Parent: #7


ابوبكر

سلامات

وجهة نظر مقدرة....لكن حمير الانقاذ هي الاسوأ في تاريخ الحمير!!



الحبيب الملا عمر

اهلين بيك


الزبالة خشم بيوت وهل هنالك ما يزكم انوفنا اكثر من هذا الوضع
القذر النجيس!!


محبتي واحترامي


هباني

--------------------------------------------------------------------------------
مداخلة: #9
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: Mannan
التاريخ: 25-06-2006, 12:41 م
Parent: #1


يا صديقى الجميل ود هبانى

هو فى تين؟ على قول صاحب الطوب الذى برر غلاء الطوب للزباين بقولته المشهورة التى صارت مثلا..
الحمدلله الذى جعل البعر بشقيه البقرى والحميرى موجودا ففى العاصمة والمدن حيث تاكل الاغنام اكياس البلاستيك لا اتخيل منها بعرا صالحا للياسة.. فى زيارة لى لموريتانيا فى منتصف الثمانينات رأيت جيوش الغنم ترابط خارج مبنى السفارة العراقية بنواقشوط وهى تلتهم مطبوعات حزب البعث العربى الاشتراكى (صاحب امة عربية واحدة ذات رسالة خالدة) وتذكرت كيف كانت اغنام الخرطوم تحب البرطعة بجوار سفارة كوريا الشمالية لالتهام مطبوعات كيم ايل سونق (الزعيم المحبوب لدى اربعين مليون كورى).. المهم بالنسبة لآغنام موريتانيا قال لى صديقى الموريتانىلقد اصبحت اغنام موريتانيا بعثية حتى انها صارت عندما تشبع تقول باع ع ع.. باع.. بعث)..
لا تسألنى عن مدى جودة البعر الموريتانى فانا لم اسأله عن ذلك.. إضافة الى تكاليف الشحن..
مع الحب والإعجاب..

اخوك
نورالدين منان

--------------------------------------------------------------------------------
مداخلة: #10
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 28-06-2006, 05:40 ص
Parent: #9


الصديق الحبيب منان

سلامات

بالتاكيد بعر الحمير هو الاجود في صنع الزبالة حسبما يقول خبراء الزبالة في السودان!!
(لكن البلد فضل فيها حمار غير الحمـــــــــار الكبير) ولذلك تغرق البلاد في الزبالة!!


هباني

--------------------------------------------------------------------------------
مداخلة: #11
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: Mohamed E. Seliaman
التاريخ: 05-08-2006, 07:39 ص
Parent: #10


الأخ هشام تحية

Quote: شفت يا احمد يا ولدي والله اعمامك الزبالين ديل تلقي الواحد غاتس في الزبالة لركبيهو..وتلقاهو شايل كوز الموية اشرب فيهو تمام التمام واترع عااااع وبعد داك اجيبوا ليهم الفطور جنب حوض الزبالة.. والله اعضوا ليك اللحم زي الترتيب ونحن ظاااطنا كان ما اتكرفنا ريحة الزبالة دي بنخرم عديل!!) وصاح احمد متقززا:عييييييييييييييييييييييييييييييييع


تعيدنا إلى زمن جد جميل
يا الله !!!!!كم نحن فرحون بيتنا يكتسي حلة جديدة
من الزبالة الخضراء حد السواد
تحتفل جدتي ( الله يرحمها) بالزبالين وتشتري
دقيقا وبصلا وتصنع قراصة وسخينة بصل ولا تبخل
عليها بسمن من زجاجتها .
أحمل القدح بسرعة إلى الدونكي يخرج الزبالون
يغسلون الأيادي ونجلس نأكل معا بي شطة

--------------------------------------------------------------------------------
مداخلة: #12
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 06-08-2006, 08:04 ص
Parent: #11


Quote: تعيدنا إلى زمن جد جميل
يا الله !!!!!كم نحن فرحون بيتنا يكتسي حلة جديدة
من الزبالة الخضراء حد السواد
تحتفل جدتي ( الله يرحمها) بالزبالين وتشتري
دقيقا وبصلا وتصنع قراصة وسخينة بصل ولا تبخل
عليها بسمن من زجاجتها .
أحمل القدح بسرعة إلى الدونكي يخرج الزبالون
يغسلون الأيادي ونجلس نأكل معا بي شطة




العزيز محمد سليمان

سلامات

لكن يا محمدالحبوبة يرحمها الله بالغت .. الشي سخينتكم حافة ساكت بصل من غير لحم!!
قطع شك اخوانا الزبالين بكونوا حادرين ليك جنس حدرة وانت صغيروني منقذ في نصهم بتاكل معاهم في السخينة وتتوحوح من الشطة... واكيد اكونوا قطعوا مليون قطيعة فيك وفي حبوبتنا الله يرحمها!!..احبكم جميعا الحبوبة والسخينة والزبالين والزبالة وفقرنا الجميل وطبعنا النبيل وكرمنا العظيم بالفي والمافي والجود بالموجود... والفقر اتقسموا النبقة...

هشام

--------------------------------------------------------------------------------
مداخلة: #13
العنوان: Re: الزبالة وما ادراك ما الزبالة في بلد تغرق في الزبالة!!
الكاتب: هشام هباني
التاريخ: 20-10-2006, 09:58 م
Parent: #12


؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


--------------------------------------------------------------------------------