مشير شنو وبشير شنو ؟؟

مكتبة هشام هباني مشير شنو وبشير شنو ؟؟
26-02-2005, 10:09 ص المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1200201380&rn=0


--------------------------------------------------------------------------------
مداخلة: #1
العنوان: مشير شنو وبشير شنو ؟؟
الكاتب: هشام هباني
التاريخ: 26-02-2005, 10:09 ص


هاكم يا سمحين الكلام الزين:
بمناسبة ترقية الريس الى مشير



مشير شنو وبشير شنو
انت يا عمر البشير
سفاح البلد رباطي البلد
وكمان رقوك لرتبة مشير
رقوك في زمن السجم
وات همك بس تصير
شاويشنا شاويش السجم
جزارنا معدوم الضمير
قدر الله قد جابك عديل
رئيسا اهبلا فاضي وعوير
لا طايوق لافهم لاخلقة لا اخلاق
بس قعونجة تحت الزير

والله يا عوقة لو طرت السما
وغسلوك بمطر السما
وصبوك من دهبا نقي
وسووك انسانا سوي
بل سووك كمان نبي

برضو عند شعبي الامير
انت احقر من حقير
مجرم حرب سفاح خبير
واولاد الهرمة المعاك
هم افة البلد الكبير
خرابة البلد الموكح بالسجم
نهابة الشعب الفقير
جلابة الدين الضلام
ماهو دين الله القدير
همباتة الرزق الحرام
عنقالة الكضب الختير
اولاد الحنوت اولاد الحرام
زبالة الزمن العفن
مومس الحال المرير

تف يا عفطة الزمن الكعب
وعوع من دقسة الحال الضهب
وتف لغفلة الناس الحيارى
عندما غابت الناس البصارى
وماتت الناس النوارة

فجاة قد جيت رئيس
تيسا خرتوك من دكة تيوس
وجيتنا في زفة تيوس
ناسا حتالاتا نجوس
همهم خم الفلوس
والكل يحلم بالعروس
عينة من بشرا رخيس
نهابة البلد التعيس
بالغدر والعمل الخسيس
وبقيت رئيس
وبقيت عريس
وانت القايد وانت الرئيس
خليك عريس
همك الليلة الرقيص
كل دلوكة داقة وقالو دقة للرئيس
ما ات وحدك الرئيس
وات وحدك العريس
والماتو في الغابات فطيس

مشير شنو وبشير شنو
والله لو طرت السما
برضو عند شعبي الامير انت احقر من حقير

والله ما شفنا زولا بترقى في زمن الهزيمة
وما شفنا زولا مهزوم ادوه قيمة
والبلد في زمانك والله قد صبحت وليمة
من سقط لقط دخلت جيوشا
جبتوها للبلد الغنيمة
وغردون جبتوه تاني بالعفانات القديمة
وفشودة جبتوها تاني بالخسارات والهزيمة
يا حليلك يا بلد امة قد كانت عظيمة
باعوك انصاف الرجال بالجبن والحالة الازيمة
باعوك برخس التراب اهدوك للاغراب وليمة
لانهم عشاق كراسي وما عندهم للشعب قيمة

مشير شنو وبشير شنو
والله لو طرت السما
انت عند شعبي الامير
انت احقر من حقير

مهازل يا بلد ستين مهازل
حت (رواندا ) العفينة
الغرقانة في بحر المشاكل
ونيجريا سمعة حروبها قد ملت المحافل
تهدي فينا وكنا تيجان المحافل
تهدي في بلدي المناضل
والذي كان حلال المشاكل
بلد قدر السما
وتاريخها مليان جمايل
سديناها عين الشمش
بسمح المكارم وحلو الشمايل
وشعبي السمح كان بسمحو صايل
وشعبي البطل بمجدو هايل

بلدي يا سجم ما جابت حوا غيرها
فيها ترهاقا ونمر والمهدي ربان المسيرة
فيها رابحة وفيها تاية ونحن منك يا مهيرة
صانوها بدم الكرامة والشرف قد كان ضريرة
قلعوها من خشم العدو بالعزة والروح الجسورة
ما سرقوها في قومة دغش ونهبوا خيرها
وما باعوها بالنص والتشاشة والفزرة والروح الكسيرة
صانوها بالسيف والكرامة والهمة والنفس الكبيرة
دي بلد شعبي المعظم براهو ليهو حق تقرير مصيرها
مصيرنا وحدة شعب واحد ودم واحد مابنرضى غيرها
شعب اصلي شعب يغلي وشعب جبار كسيرة
اسالوا السفاح حليفكم يوم ليلة النصر الشهيرة
ليلة مايو راحت (لعب ترتير جهال فوق الدميرة)
واب عاج امامكم شردلاسيادو مكسوفا عضيرة
وحق المظاليم ما بروح واطافي دنيا ازدادت شرورها
ودم الشهيد ما ببقى موية
طالما الاحرار هناك في راس المسيرة
واهلي الغبش في الحارة زي موج الدميرة
شايلنو ريدك يا بلد قدر الله ما خلق
واداهم العافية الوفيرة

مشير شنو وبشير شنو
والله لو طرت السما
برضو عند شعبي الامير
انت احقر من حقير

بلدا هاملة فاقدة وجيع
وجيعا شايف دم البلد السمحة قاعد اضيع
وخابر الناس الماكلة حقوقنا
وسكنو القصر العالي منيع
وسرقوا لبن الشافع اللسة رضيع
بلدا هاملة فاقدة وجيع
اقش الدمعة وافش غبينة الشعب المابي اطيع
بلدا هاملة فاقدة وجيع
دم الشفع لبن الشفع شربو الكوز الفاسد والله فظيع
هذا الكوز نهب الدنياوحجز الاخرة
هذا الفاسد هذا الكاسد ملك البيع
باعو البلد السمحة وابدوا نهما اصلي شنيع

مشير شنو وبشير شنو
والله لو طرت السما
انت عند شعبي الامير
انت احقر من حقير


الزول بترقى يوم نصرو
يوم اعمل مفاخر
وعزة الزول السمح عندما يعمل مآثر
وات شبعان هزايم مليان وداشر
والليلة قد بعت البلد لكل طماع وماكر
والتيوس الانت فيهم
جز دقونها جاي باكر
جاي من وجع الغبش
منهوبة الرزق يادوب تدافر
جاي من ذل المظاليم
هناك في جو الدفاتر
جاي من زعل المغابين
من زمن للحق تعافر
جاي من وجع المساجين هناك في ذل المهاجر
جاي من دم الشهيد كتلوه في زمن المساخر
جاي من مهتوكة عرض
مودرة وحيرانة ودايرالها ساتر
جاي من وجع الارض وهي دنسها العساكر
والتيوس الانت فيهم جز دقونها جاى باكر
ورقيص شنو وعرضة شنو ات يا سجم العساكر
والبلد مكندكة بالفقر والجوع قد طق البنادر
رقيص شنو وعرضة شنو ات يا سجم العساكر
والشعب قد سكن المقابر
والفاشر الحبيبة قادلة فيها اغراب من عساكر
طامعة في البلد الجنازة والشعب مسكين وصابر
وانت راقص ماك شايف ماك خابر
يا رئيسنا ويا عريسنا انت ياكبري الكباير

مشير شنو وبشير شنو
والله لو طرت السما
برضو عند شعبي الامير انت احقر من حقير

قال سلام وقال كلام فاروقنا جلاب الهزيمة
رئيسنا وعريسنا ورقاصنا معدوم العزيمة
في نيفاشا جابوك بارك شان توقع للهزيمة
وصدقت انك حمامة للحب والسلام
وماك داري انك كت متيس زي بهيمة
وفي دارفور عصروك تاني
وقلت (الروب يا الله للكوز والحكومة)
وفي شرقنا العصرة حصلت
وماك مصدق انو اوشيك الهوين
الليلة مليان بالعزيمة
وبعد ده كلو رقوك مشير رتبه ما عارف لزومها
لاحس لا شعور جاري في الدنيا ونعيمه
وكيف الله بنصر ملة الشر اللئيمة
وكيف الله بنصر صاحب اليد الاثيمة
بكرة شعبي المظفر يمسح اهاتو الاليمة
بالكفاح الاصلي فيهو
والشموخ الفيهو ديمة
وتاني ترجع ام در تغني
وتعانق الفاشر التميمة
وجوبا السمحة ترقص لوحدة البلد العظيمة
وكسلا بشوتالها شايلة
فطرة البلد السليمة
تطرد الهم من بلدنا
وترجع ايامنا الحميمة
لا مشيرا فينا يأمر
ولا بشيرا عندو قيمة
ولا دقونا فينا قادلة
بالاساطير القديمة
وتاني ما بننخم ليها
بعدما شفنا الجريمة
وشعبي شايل تارو جاهز
حقو برجع بالعزيمة
ونحن ما بنغفر ذنوب الباعو دينن
وباعوا بلدي الحرة الكريمة
والمسامح وحدو الله
وما بنسامح الولعوا نار الخصومة
والبجامل في حقو تاني
ابقي زولا واطي ديمة
والبجامل في عرضو مرة
مصيرو للذلة وجحيمها
بشير شنو ومشير شنو
والله لو طرت السما
برضو عند شعبي الامير
انت احقر من حقير
انت يا عمر البشير


هباني
















--------------------------------------------------------------------------------
مداخلة: #2
العنوان: ________
الكاتب: هشام هباني
التاريخ: 26-02-2005, 12:52 م
Parent: #1


___________

--------------------------------------------------------------------------------
مداخلة: #12
العنوان: Re: ________
الكاتب: Mohamed Elboshra
التاريخ: 04-03-2005, 02:51 ص
Parent: #2


---------

--------------------------------------------------------------------------------
مداخلة: #3
العنوان: ___
الكاتب: هشام هباني
التاريخ: 26-02-2005, 07:05 م
Parent: #1


________

--------------------------------------------------------------------------------
مداخلة: #4
العنوان: Re: ___
الكاتب: Abdelrahman Elegeil
التاريخ: 26-02-2005, 09:41 م
Parent: #3


يـاودهـباني

الـكـيـزان كـدوا الـبـلـد خـلـوهـا كـورة دومـة

إنـتـهـازيـة مـحـسـوبـيـة حـلـيـل الـعـفـة ال بـقـت مـعـدومـة

نـاس دار فــور حــالـتـهـم مـنـكـوبـة

فـرقـوا بينهـم عـرب وزرقـة وجـات الـطـوبـة فـي الـمـعـطـوبـة

حـلـيـل الـبـلـد الـ أصـبـحـت مـغـلـوبـة

سـاسـهـا وسـايـسـهـا الـكـيـزان وبـقـت مـنــهـوبـة

الـكـيـزان الـمـجـوس نـاقـصـيـن الـعـقـل والـديـن

زعـمـوا الـزور خـلافـة الـمـهـدي وودتـورشـيـن

الـكـيـزان الـنـجـوس بـيـاعـيـن الـذمـم بـرخــيـص

ضـيـعـوا للـبـلـد ودوها فـي حـيـص بـيـص

ويـن الـمـشـروع الـحـضـاري وعـرس الـشـهـيـد والـزيـن

ويـن الـتـرابـي وجـهـاد الـقـرود والـزفـاف للـعـيـ

الـكيزان اللئام مـا يخلوا مـن اللـوم

سـائلين الله الكريـم يـوريـنا فـيـهـم يـوم

كيـوم داحـس والـغبراء والنذيـر الشؤم

يوم ترقد رممهم كوم وليمة أب صـلعة وأبعـشـوم

يـا رب يـا كـريـم يـا رب يـا كـريـم تقوم الـميزانا

تـعـدل الـعـوج الـحصـل وتقـرض جـمـيع كـيـزانـا


----



--------------------------------------------------------------------------------
مداخلة: #5
العنوان: Re: ___
الكاتب: Mohamed Elboshra
التاريخ: 27-02-2005, 01:36 ص
Parent: #4


الاخ ودهباني
تهنئة خاصة لك على هذا الشعر الجميل ووينك من زمان ما اظهرت لنا هذه المواهب والله كنا نزلناه في جريدتنا ألفنكوش التي كنت اصدرها بجامعة الفاتح والفنكوش هو عكس الحنكوش ولا يعرف يدس الكلام البحرقه وبقول للاعور اعور في عينه. هل مصادفة ان يمر علينا رئيسان عاقران لا يستطيعان الانجاب وهل عقرت ارجام النساء ان تاتي باسوياء لا يطلبون تبني انتاج الاخرين. بالمناسبة لي عم موسوعة شعبية. فعندماكان البلابل يغنوا لنميري اب عاج اخوي دراج المجن، قال شوفوا الاهبل ده يقولو ليه حمار العرب الذي يرعوا بيه الغنم وهو يبشر فرحان. لأن المقصود هو =ابوعاجات= وهو التمساح . كما قال الشاعر في عمدة كلي.
ابوعاجات اللحو وكتين يزم..ينتر
ان جاتو الالوف ..لا بضل...ولا بيفتر
تمساح دار كلي البمرق مع الهجعة
ولكن رغم ان نميري كان يوصف علنا بانه حمار رعية الغنم بني اللون لكن كانت تتردد تلك الاغنية يوميا في اعلامه ولا اريد ان اسئ الى جنس الحمير بتسمية البشير باب عاج. ولنا جد حين قام انقلاب البشير وفي ساعة اعلان البيان قال= والله الزول المطير عيونو زي القعونجة ده حايودي البلد في داهية= وصدقت كلمات جدي رحمه الله ووجدت الوصف ذاته في قصيدتك.
استمر في هذا المنوال ولا تدخر سلاحا لمحاربة هؤلاء فانهم استعملوا كل الوسائل لتدمير المعارضين والان يطالبوننا الا نفجر في الخصومة كانهم قراوا القران اليوم.
تحياتي لك
ابوسامر

--------------------------------------------------------------------------------
مداخلة: #6
العنوان: Re: مشير شنو وبشير شنو ؟؟
الكاتب: rani
التاريخ: 27-02-2005, 02:45 ص
Parent: #1


سفاح..الموصلي..فيديو

--------------------------------------------------------------------------------
مداخلة: #7
العنوان: Re: مشير شنو وبشير شنو ؟؟
الكاتب: Kobista
التاريخ: 28-02-2005, 07:36 ص
Parent: #1


Greetings Habani
It's a real slap ..but honestly we deserve to be a degraded nation,coz such fools are
the masters of rotten/governament and sadly all of us

--------------------------------------------------------------------------------
مداخلة: #8
العنوان: Re: مشير شنو وبشير شنو ؟؟
الكاتب: Yasir Elsharif
التاريخ: 03-03-2005, 04:18 ص
Parent: #1


عزيزي هباني:
تحية المودة والتقدير
لقد أعجبتني قصيدتك، برغم العنف اللفظي الشديد...

Quote: والتيوس الانت فيهم
جز دقونها جاي باكر
جاي من وجع الغبش
منهوبة الرزق يادوب تدافر
جاي من ذل المظاليم
هناك في جو الدفاتر
جاي من زعل المغابين
من زمن للحق تعافر
جاي من وجع المساجين هناك في ذل المهاجر
جاي من دم الشهيد كتلوه في زمن المساخر
جاي من مهتوكة عرض
مودرة وحيرانة ودايرالها ساتر


--------------------------------------------------------------------------------
مداخلة: #9
العنوان: Re: مشير شنو وبشير شنو ؟؟
الكاتب: عبدالبارى العجيل
التاريخ: 03-03-2005, 07:02 ص
Parent: #1


الأخ هبانى

والله مابنقدر نقول غير انو ده زمن المسخرة
وانت بالبوست بتاعك ده ذكرتنى نص أنا كان كتبتو
بالمناسبة السعيدة دى. اتمنى اقدر أنزلو.

عبدالبارى

--------------------------------------------------------------------------------
مداخلة: #10
العنوان: Re: مشير شنو وبشير شنو ؟؟
الكاتب: Abdelrahman Elegeil
التاريخ: 03-03-2005, 07:14 ص
Parent: #9


إنت ياالحبيب من عجيلاب وين

وألف مرحب بيك نورت المنبر

--------------------------------------------------------------------------------
مداخلة: #11
العنوان: Re: مشير شنو وبشير شنو ؟؟
الكاتب: عبدالبارى العجيل
التاريخ: 03-03-2005, 11:33 ص
Parent: #1


الأخ عبدالرحمن

شكراً على الاستقبال ايميلى على الياهو
abdujafer أرحو التواصل

الأخ هبانى
فيما يلى الموضوع الذى وعدتك به


مدخل:
أصدر أنا الفريق البشير القرار الآتى نصه:
لقد تقرر ترقية الفريق البشير الى رتبة المشير اعتباراً من تأريخه. صدر تحت توقيعى
مشير عمر البشير

نص:

قالوا بشير
قلنا بشارة ما شافه
ده زول بلوى وصبح آفة
ينشف ريق خلايق الله
ويعذب فيها باسم الله
ومصيرك يوم بتتلافى
قالوا نذير
قلنا نذير نذير الشوم
قدر بس سلطو القيوم
قسم بلد النجوم كم كوم
وخلى خراب حداهو البوم
عشان يمرقلو بى فد كوم
قالوا مشير
قلنا مشير يشير لى مين
وشاور مين
وقبلو أشاروا واصبحوا وين
اشارتو تطير
تقع فى البير
اشارة أم حمد للزير
كان بى تنفع الأسما
كان اتنفعوا قبالك
وكان بى تبقى ليك حمى
حمايةً شيلا من بالك
ما حتفيدك القابك
ولا حتزيد فى أصحابك
حتفضل يافطة فى بابك
لأنو الشعب ما جابك
ولا ختاك
ولا سماك
ولا مترجى خيراً فيك
وعارف انو يوماً ليك
ويوماً الله لا وراك
ولا قراك
حكاية نوح والطوفان
منو البحميك
وجبل الرملة كان بغريك
بتماص فجأة من رجليك
وابقى بشير حدا الموية
وابقى مشير كما تهوى
وشوف البنفعك ياتو
وامسك فيهو كان يقوى
ويحلك من مصير فرعون
ويبقى المن والسلوى

عبد البارى العجيل - 2004

--------------------------------------------------------------------------------
مداخلة: #13
العنوان: Re: مشير شنو وبشير شنو ؟؟
الكاتب: Mohamed Elboshra
التاريخ: 06-03-2005, 06:33 ص
Parent: #1


up

--------------------------------------------------------------------------------
مداخلة: #14
العنوان: مشير شنو
الكاتب: هشام هباني
التاريخ: 26-03-2005, 09:10 ص
Parent: #1


تاني وتاني هاكم الكلام الزين ونحن تلقونا يانا نحن ولي قدام
هباني


--------------------------------------------------------------------------------