الأربعاء، 30 أبريل 2008

هيييييييييييع عــوافي بوليس الامريكان اخوان البنات؟

مكتبة هشام هباني هيييييييييييع عــوافي بوليس الامريكان اخوان البنات؟
19-10-2005, 07:50 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1200202378&rn=0


--------------------------------------------------------------------------------
مداخلة: #1
العنوان: هيييييييييييع عــوافي بوليس الامريكان اخوان البنات؟
الكاتب: هشام هباني
التاريخ: 19-10-2005, 07:50 م


بعد ظهر هذا اليوم الاربعاء الموافق19/اكتوبر كنت في مشوار تاكسي حار الى مطارDFW وذلك ثالث اكبر مطارات الولايات المتحدة بمدينة دالاس بولاية تكساس ودوما مشاوير المطارات هي ( الشدر الكبار) اي عامرة بالرزق وكان بصحبتي هذه المره زبونان امريكية بيضاء مع زوجها المهندس الجواتيمالي وعندما اوصلتهما المطار دفعا لي ثمن الاجرة بالبطاقة الائتمانية( كريدت كارد) حيث مزودة سيارات الاجرة بالكمبيوتر وهو بالتالي مربوط بقمر صتاعي من خلاله تتم وتنسق كل المشاوير حيث تبعث للسائق عروض لمشاوير تحدد لك اسم الزبون وعنوانه بالتفصيل والجهة التي ينشد الوصول اليها وايضا مزود الكمبيوتر بالماكينة التي تسحب عليها البطاقة لتاخذ امرا بسحب ثمن الاجرة من حساب الزبون في مصرفه ولو كان في سقط لقط وايضا يمكن ان تستقبل امرا برفض بطاقة الزبون لعدم صلاحيتها او خلو رصيده من مبلغ يغطي تكلفة الاجرة وهو ما حصل لي في هذا اليوم حيث رفض الكمبيوتر بعد ان غادرت المطار وودعت زبوني اعطائي التخويل الذي بموجبه يتم سحب مبلغ الاجرة لصالحي من حساب الزبون ولم تتم الاستجابةلسحب البطاقة داخل المطار نسبة لتأثر المنطقة بالرادارات المكثفة ولكنها حصلت بعد ان غادرت المطار وعندما اكتشفت ان الاجابة كانت بالرفض و( الكرت مضروب)والزمن كان ضيقا جدا لاني مرتبط بمواعيد احضار ابني احمد من مدرسته والتي تبعد كثيرا عن البيت (( اخوكم قام بالتاكسي فللي راجع المطار شان الحق قريشاتو قبل الزباين ما اتشعبطوا ليهم في طيارة واكبوا الزوغة وفعلا وصلت المطار وحالا مشيت طوالي للخطوط وين ما نزلت الزباين وهناك اخوكم ضارب الجرسة الحكاية كانت تمانية وخمسين دولار وستين سنت يعني اكبر من ماهية موظف كبير في بوستة امدرمان وهناك قالوا لي الزباين فعلا اتشعبطوا في طيارتهم واخوكم قرب اضرب اللالاي واجاهد في الامريكان زي اخوانا الكيزان الكضابين وما في كان حل الا اتصل بالبوليس اخو البنات اشرح ليهو الحكاية وفعلا رفعت تلفوني الماخمج واتصلت بالرقم المشهور911 للبوليس وبعد داك دورت الرطانة وبعد عشر دقايق جوني اربع (بلاليس) غلف وكفار عديل وقالوا هاك يا تحريات من وين شلت الزبون وكان لابس شنو وكدي ادينا الورقة بتاعة الكريدت وانت وين ساكن ورخصة تاكسيك كم وساكن وين وبعد داك مشوا ليك لناس الخطوط وزرزروا ليك الموظفين بكل ادب والكمبيوترات اتخابتت والانجليزي وقع درش شديد وسالوهم عن الرحلة ولقوا اسم الزبونة وزوجها وعرفوهم ما شين وين وشغالين وين واتولدوا وين واتصلوا بالبوليس بتاع الحتة الماسشين ليها واتصلوا ببرج المراقبة وكلموا الطيار والطيار كلم المضيفة والمضيفة بلغت الزبونين عن سبب الاتصال وحكاية التمانية وخمسين وستين سنت بتاعة ود هباني المسكين القاطع اربعتاشر الف ميل من السودان لامريكا جاري جاري الوحوش عشان اربي احمد ونضال وكمان عامل بكاتل وبتحدى عمر البشير العوير وعبد الرحيم بتاع البتاع الهناي ابو ريالة يعني جنس همالة ومصايب وبعد داك جوني البلاليس الاربعة وقالوا لي ابشر بالخير يا ود هباني التمانية وخمسين دولار وستين سنت بتاعتك بتجيك ونحن الزبونة دي لو داير تقاضيها من حقك وممكن افصلوها من عملها بسبب هذه الجنحة وقلت ليهم انا والله ماداير اقطع عيشة وليداتها بس يا اخواني التديني التمانية وخمسين دولار بتاعتي والستين سنت بس وكان الله يحب المحسنين وبعد داك قالوا لي نحن بلغنا كل الجهات وهي الان عارفة وحنضلوا ليها السفرة بتاعتها فوق الطيارة وتكون المسكينة سبت لهباني الكبير ذاتو وكل العبيدالسودانيين الجايين لوتاري ولا جئين ومشردين والكضابين العاملين لاجئين كمان وهم كيزان عديل ومصقرين في امريكا من زمن سيد قطب ذاتو .المهم قالوا لي لحد الساعة ستة مساء لو ما اتصلت عليك من هناك محل ما سافرت اتصل علينا وبنجيب ليك خبرها النصرانية الغلفاء بت الكلب اكالة مال اليتامي والمساكين السودانيين زي ود هباني وكل السجمانين في امريكا..
علي بالطلاق قبل الساعة ستة ما تجي واخوكم قاعد فوق البيت قام تلفوني خبت جنس خبت وقلت كدي ورفعت التلفون كان اجيني صوتا مسيكين وسالتني مرة ات يا اخوي هشام هباني قلت ليها اي بالحيل قالت لي انا فلانة الفلانية متأسفة وقروشك هسع بترجع ليك على داير المليم وانااسفة والله شديد.. وقلت ليها ولا يهمك الاخت علي بالطلاق كان ما الفلس وورانا ناسا اباطهم والنجم وفاتحين خشومهم هناك غادي في السودان علي بالطلاق كان خليتها ليك يا بت العم والباقي ان شاء الله لناس كاترينا والستين سنت ممكن اتبرع بيها لاهلنا الغرابة عشان اطلعوا بيها دين الانقاذ.. وبعد داك اخوكم اتنفخ واتصل بالبوليس اخو البنات وقلت ليهم هييييييييع اخوان البنات الله يبارك فيكم الغلف ابان مسوحا نيفيا علي بالطلاق كان لقينا مية منكم بس في السودان علي الطلاق عبد الرحيم ابو ريالة الا اقصوا دربو بريالتو والقوهو لا بد عند عمر العوير واقبضوهم الاتنين وبعد داك اي كوز حرامي اقول كاني ماني الامريكان البلاليس علا اجزوا ليهو دقنو والحقوه تيس الحاجة مدينة ولي قدام..

--------------------------------------------------------------------------------
مداخلة: #2
العنوان: Re: هيييييييييييع عــوافي بوليس الامريكان اخوان البنات؟
الكاتب: الزوول
التاريخ: 19-10-2005, 10:36 م
Parent: #1



السلام عليكم
الأخ هشام هباني
لك التحية على البوست الرائع وتجدني دوماً مغرماً بالتجارب الشخصية للكاتب وأفضّلها على إستجلاب (استجلب ، جلب فهو جلاّبي) المواضيع والمقالات الجاهزة للكتاب المحترفين ،أو المواضيع السياسية ( بتاعت أكل العيش)
ففي التجارب الحياتية تتجلى المصداقية والعفوية بصورة صرت افتقدها في هذا المنبر في الفترة الحالية.
مزيداً من التجارب الشخصية

ملحوظة لابد منها:
لم يعجبني تعبيرك :

Quote: والستين سنت ممكن اتبرع بيها لاهلنا الغرابة عشان اطلعوا بيها دين الانقاذ.



رمضان كريم

وما الناس إلا هالك وأبن هالك *** وذو نسب في الهالكين عريق

--------------------------------------------------------------------------------
مداخلة: #3
العنوان: Re: هيييييييييييع عــوافي بوليس الامريكان اخوان البنات؟
الكاتب: Deng
التاريخ: 19-10-2005, 10:48 م
Parent: #1


Husham

You don't think you are insulting people

--------------------------------------------------------------------------------
مداخلة: #4
العنوان: Re: هيييييييييييع عــوافي بوليس الامريكان اخوان البنات؟
الكاتب: Sudany Agouz
التاريخ: 20-10-2005, 05:22 ص
Parent: #3


الأخ هشام هبانى ..

صحيح السرد ممتع ولكن ..

لا تنسى أخى الذين اتهمتهم بالكفر .. و .. لا يصح أخى حتى نحن كمسيحيين أن
نتهم بمثل هذه الطريقة ..

ثم ..

ألا تعتقد أخى .. اننا هنا فى أرضهم .. ونأكل من خيراتهم .. فهم الذين فتحوا
لنا أذرعهم بعد أن تركنا ديارنا وأهلنا ..

أنا أعلم .. أنك لا تقصد تجريح الآخرين .. ولكن .. العتاب بين الاخوة هى المحبة
بأصلها ..

ودمت أخى ..
أرنست

--------------------------------------------------------------------------------
مداخلة: #5
العنوان: Re: هيييييييييييع عــوافي بوليس الامريكان اخوان البنات؟
الكاتب: Sudany Agouz
التاريخ: 20-10-2005, 06:12 ص
Parent: #4


الأستاذ الجليل دينق ..

عندما كتب الأخ هشام هبانى مقاله .. كان من واقع الحياة باسلوب قصصى كما
يفعل دائما القصصى الكبير الطيب صالح .. ولا يقصد أبدا التجريح أو الاهانة ..وأنا
واثق من مصداقيته هذه .. وكان الغرض من ردى عليه هو .. قد يسوء فهمه البعض
ويجارونه فى نفس تيار التعبير مثل " الخواجات الكفار ( ... ) - وفعلا صدق حدسى

.. وماهى الا لحظات .. حيث قام الأخ الأستاذ هشام بالاتصال بى هاتفيا .. وهكذا أثبت شعورى .. فكم أنت نبيل يا أخ هشام ..

بل قالها بالحرف الواحد " لو أننى أعرف رقم هاتف الأخ دينق لاتصلت به الآن "

.. فياأخى دينق .. نحن هنا فى المنبر .. حتى لو اختلفت ديانتنا .. أو آراؤنا ..
فى النهاية اخوة .. لا نرضى بالتفرقة .. والشيىء الجميل .. هى الصراحة فى المحبة
والاخاء ..

ودمت أخى ..

عمك العجوز ..
أرنست

--------------------------------------------------------------------------------
مداخلة: #6
العنوان: Re: هيييييييييييع عــوافي بوليس الامريكان اخوان البنات؟
الكاتب: هشام هباني
التاريخ: 22-10-2005, 07:28 ص
Parent: #5


فوق

--------------------------------------------------------------------------------
مداخلة: #7
العنوان: Re: هيييييييييييع عــوافي بوليس الامريكان اخوان البنات؟
الكاتب: عبدالناصر معتصم
التاريخ: 22-10-2005, 08:05 ص
Parent: #6


الاخ الكريم هشام هبانى

لك التحية.....
بالجد دا بوست الاسبوع و من غير ادعاء او تملق.
انا مقل جدا فى المداخلات لكن بوستك دا اجبرنى على المداخلة.
تسلم يا رائع.


عبد الناصر

--------------------------------------------------------------------------------
مداخلة: #8
العنوان: Re: هيييييييييييع عــوافي بوليس الامريكان اخوان البنات؟
الكاتب: Tragie Mustafa
التاريخ: 22-10-2005, 09:03 ص
Parent: #7




هشام هباني

والله ضحكتني ضحك

وزي ماقالوا ده بوست الاسبوع

والله زي ماقلته هؤلاء الناس (الامريكان) يبهروننا كل يوم اكثر.

اما اكثر ما اضحكني فهذه الحقيقه:


Quote: العبيدالسودانيين الجايين لوتاري ولا جئين ومشردين والكضابين العاملين لاجئين

كمان وهم كيزان عديل ومصقرين في امريكا من زمن سيد قطب ذاتو .



والله يا هشام وهؤلاء اكثرنا,هنا.

شكرا لك.

ويا دينق صدقني مثل هشام لايقصد شيئا هو يقصد ان يتحدث بلسان السوداني العادي

وهو للاسف شخص طويل اللسان في الفاضي تلقاه قاعد في بلاد الخواجات وينبز فيهم

ويقول عليهم غلف وكفار لكن هشام هباني الذي نعرفه يا ما سجل ادانه لهذ الالفاظ.

ولك العتبى حتى ترضى.

تراجي.

--------------------------------------------------------------------------------
مداخلة: #9
العنوان: Re: هيييييييييييع عــوافي بوليس الامريكان اخوان البنات؟
الكاتب: هشام هباني
التاريخ: 22-10-2005, 11:33 ص
Parent: #8


الاحباء العم ارنست والاحباء الزول ودينق وناصر والرائعة تراجي


لكم كل الود ولكل شعبنا العزيز التجلة والاحترام وشكرا على المرور ويا عمنا ارنست قد وصلك التوضيح عبر الهاتف وانت ايها الحبيب الزول طبعا ( حكاية طلعوا دينهم ) مقصودة جدا جدا (وهو لو عندهم دين بعملو كده )؟؟
الحبيب دينق عندما اتعمد نوع هذه الكتابة الساخرة فلست بالسطحي حتى اكيل السب والشتم جزافا لهؤلاء الانسانيين الذين قدموا لنا الملاذ والامن والطمأنينة والمستقبل لابنائنا ونحن نطرد من بلادنا ومن حقنا رسميا فانا لست جاحدا ولكني هنا اتحدث بلسان اولئك الجاحدين والذين سيوفهم مع مصالحهم وقلوبهم مع بنى امية في الخرطوم..

وتشكر اخوي ناصر على المرور ودمت ذخرا لهذا الوطن الجميل

اما انت ايتها المرأة الجسورة فحق لك ان تظل الجنة تحت قدميك الطاهرتين لا تحت اقدام الظلاميات...
هباني

--------------------------------------------------------------------------------
مداخلة: #10
العنوان: Re: هيييييييييييع عــوافي بوليس الامريكان اخوان البنات؟
الكاتب: saif massad ali
التاريخ: 23-10-2005, 04:24 ص
Parent: #9


فوق

البوست ده شوفتو اليوم , يالك من رائع ود هباني , ان شاء الله يكون عجب ناس الانقاذ بي امريكيا

مش طلعوا دين الناس , شروا دينا في حبل الملابس , عديمن الدين عديمن الحياء

--------------------------------------------------------------------------------
مداخلة: #11
العنوان: Re: هيييييييييييع عــوافي بوليس الامريكان اخوان البنات؟
الكاتب: جمال هباني
التاريخ: 23-10-2005, 02:43 م
Parent: #10


العم هشام

رمضان كريم

اضحكني الموضوع شديييد وتزكرت اهلنا في السودان ورجعتنا كلمه هيييييع الى زكريات
حبيبه الى نفوسنا ، الى ديار هجرها اهلها بجور التسلط والفساد فلك كل التجليه على هذا السرد الرائع .


تحياتي لكل الاسرة

جمال هباني

--------------------------------------------------------------------------------
مداخلة: #12
العنوان: Re: هيييييييييييع عــوافي بوليس الامريكان اخوان البنات؟
الكاتب: هشام هباني
التاريخ: 24-10-2005, 00:11 ص
Parent: #11


الابن الجميل جمال هباني

تحياتي ومحبتي

هيييييييييييييييييييييييييع ( هرا ود المرة) بتذكرها يا جمال ؟؟

تحياتي للمدام والصغير الحليو وكل ام سعين بالمملكة وناس سيد وعبد الله بالامارات

خالك وعمك هشام هباني

--------------------------------------------------------------------------------
مداخلة: #13
العنوان: Re: هيييييييييييع عــوافي بوليس الامريكان اخوان البنات؟
الكاتب: هشام هباني
التاريخ: 27-10-2005, 05:11 ص
Parent: #1


؟........................

--------------------------------------------------------------------------------
مداخلة: #14
العنوان: Re: هيييييييييييع عــوافي بوليس الامريكان اخوان البنات؟
الكاتب: هشام هباني
التاريخ: 27-11-2005, 09:30 م
Parent: #1


عـــــــــــــــــوافي بوليس الامريكان

--------------------------------------------------------------------------------
مداخلة: #15
العنوان: Re: هيييييييييييع عــوافي بوليس الامريكان اخوان البنات؟
الكاتب: عاطف عبدالله
التاريخ: 28-11-2005, 02:21 ص
Parent: #14


الأخ هشام هباني
أكثر ما أعجبني في هذا البوست هو تصحيح مفاهيم خاطئة لكنها مترسخة عن مجتمع الأمريكان والغرب ، والذين أحتجوا على أستخدامك تعابير دارجة ككلمة الغلف والكفار فيجب أن يعلموا بأن تلك نظرة العامة وهي أيضا يجب أن تصحح ، لكن المفاهيم التي أقصدها هي مفاهيم العدالة في المجتمع الأمريكي خاصة والمجتمعات الغربية عامة ، وسطوة القانون فيها ، فتلك عندهم عبارة عن قيم مقدسة ، يدركون جيدا ان مجتمعاتهم لم تنهض إلا بسببها لذا فهم يتمسكون بها وبدونها سوف لن تقوم لهم قائمة
شكرا على البوست الظريف والممتع والمفيد في آن واحد


--------------------------------------------------------------------------------
مداخلة: #16
العنوان: Re: هيييييييييييع عــوافي بوليس الامريكان اخوان البنات؟
الكاتب: هشام هباني
التاريخ: 04-12-2005, 04:58 م
Parent: #15


العزيز/ عاطف عبد الله
مساك الله بالخير
شكرا علي المرور واسف لتاخر الرد لمشغوليات الحياة ولهاث الرزق العسير
وليتهم يعقلون.... وليتهم يبصرون.

محبتي احترامي

--------------------------------------------------------------------------------
مداخلة: #17
العنوان: Re: هيييييييييييع عــوافي بوليس الامريكان اخوان البنات؟
الكاتب: هشام هباني
التاريخ: 07-12-2005, 11:09 ص
Parent: #1


...............


--------------------------------------------------------------------------------

ليست هناك تعليقات:

إرسال تعليق