الأربعاء، 30 أبريل، 2008

خطـرت لي فكرة ان اربـط (كــــوزا ) للتاكـسـي؟

مكتبة هشام هباني لـقـد خطـرت لي فكرة ان اربـط (كــــوزا ) للتاكـسـي؟؟
29-10-2005, 01:24 ص المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1200202361&rn=0


--------------------------------------------------------------------------------
مداخلة: #1
العنوان: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 29-10-2005, 01:24 ص


احيانا وفي جو ( فياقات) هذه المهنة عندما تجد براحامن زمن تجترحه بعد لهاث الرزق اليومي المجنون تسرح كثيرا وتغوص بك الذاكرة (المجوبكة) في عمق الماضي المدفون في وطني لترجع لطفولتك الريفية الغضة .. القرية والزبالين والخلوة والانداية والبطان والقلوبية والزريبة و( قيلة العروس) والقنيص والسواقين والمساعدية واللواري والصاجات وكــــوز عند اللزوم ليعطي اللوري (السفنجة او الهوستن او التيمس ) ميوعة صوت في معافرة قيزان ( تجلع) هذا اللوري المجنون وهو (جلع) ميكانيكي محبب لدى السواقين و(المساعدية )الكبار بفعل هذا الكــــــــــــــوز العجيب في معركة القيزان والصاجات والوحل ومنها يصوغون البطولات والحكاوى الساذجة في مجتمعات ساذجة طيبة بطلها السواق اكثر من الطبيب اي الحكيم؟؟

(امس الرزق كان مجوبك والتكسي ما ياهو التكسي البعرفو والمعايش هنا جبارة شديد الفواتير راجياك فاتورةالموية الكهرباء تلفون البيت والموبايل والكريدت كارد وفاتورة البيت وحاجات وكمية ورق علي بالطلاق كتابة صغار صغار وما بتنقري ورق والله اولع تكال حلتنا كلها واشبعها كسرة وابري ليوم القيامة وساعي البريد في البلدان السجمانة دي انا علي بالطلاق بكرهو اكتر من عمر البشير ذاتو وعربيتو العفينة الصغيرة دي لمن اشوفها جسمي كلو انهرش لاني عارفة جايبة المصايب جايبة الفواتير مش جايبة جوابات الحب ويا حليل ساعي البريد الكان بغنو فيهو في السودان (يا حليلك يا ساعي البريد وطولت وايه و) طبعا الذاكرة محلوجة شديد المهم اغنية مشهورة في السودان القديم مش الجديد المخستك بتاع ( ط.. في لباس واحد) غايتو لو سمعتو يوم ود هباني كتل ليهو ساعي بريد في امريكا ما تستغربوا وقولوا عليهو جزاهو الله عنا كل خير.. المهم اخوكم في فياقتو ديك حالج وقاعد لي تحت ضل شدرة من شدر تكساس الكبار داك قدام اجزخانة وشايف ليكم ودابرق داك ليهو انطط ساكت جنب الاجزخانة وقلت هسع السجمان ده كيفنو قطع البحور دي كلها من بلدنا الخربانة ديك لحد ما وصل هنا والعاجبو شنو في البلد دي دحين جا لوتري ولا لاجيء زينا ولايه ساكن هنا بالذات جنب الاجزخانة دي بالذات ودي اجزخانة هنا بتشتغل اربعة وعشرين ساعة وطبعا اخوكم بفهمها طايرة قلت ربما اخونا ود ابرق مخصوص جايبو شيتا ختري شديد وقالوا امورو التانيةالتحتية بقت بايظة ما زي زمان في السودان وعشوشة قالوا قنعت منو تب وما شة تشوف ليها غراب ولا كان صقر ولا ابو السعن ذاتو لانو صاحبنا نشاطو قل شديد لانو الاكل في البلد مافي والعيشة في تولا زيو وزي الناس هناك البطاطير واقعة عشان كده ما عندو لياقة زيو وزي الناس لمن كانو بوزعو عليهم السكر بالوقية اللياقة وقعت ويوم الخميس راح في غضب الله غلي المسكينات الصابرات.. المهم باختصار ود ابرق لابد جنب الاجزخانة دي عشمان ليهو في يوم من الايام انط ليهو في حبة فياجرا من اي خواجة مشتريها من الاجزخانة عشان ارجع بيها السودان طوالي وافرح عشوشة عشان ترجع تاني للحب الزمان..

المهم نرجع لحكاية الكوز وقصة الكيزان وعلاقتها باللواري وذلك الصوت المتغنج والمتجلع المحبب لديناوهوطالع من مكنات اللواري الكبيرة زي الهوستن والتيمس والسفنجة والفارقو خاصة لمن تكون وحلانة ونحن صغار نتفرج والمساعدية انزلوا في الصاجات تحت العربية واللوري اكورك كواريك شديدة وصوت الكوز جلع شديد ونحن صغار درافين شفع اولاد حرام قليلين ادب ندق العقرب في شوكتها وما خلينا ( قيلة) نكورك عشان نشجع السواق عشان اللوري اطلع من الوحل وطبعا السواق لو نجح في العملية ابقى بطل عديل وكنا ننبسط شديدونحن بنسمع في حكاوى السواقين والمساعدية الكبار في مناسبات الحلة خاصة لمن اتكلموا عن بطولاتهم في خيران الغرب الصعبة ديك زمن الغرب كان غرب قبل الحرب والمصايب العملوها الكيزان دي في الغرب السمح داك .المهم المساعدية مرات بكضبوا شديد ونحن بنصدق حكاويهم وهم يمدحون في السواقين بتاعينهم والسواق تلقاهو منفوخ لابس العراقي الساكوبيس والسروال ابو تكة طويلة والمركوب الفاشري السمح داك من قطع الفاشر قبل الحرب ومتفوجج نص الناس وريحة مريستو ضاربه اترع مريسة عديل وريحة لحم شية والله مارقة من خشمو ومبسوط من كضب المساعد بتاعو .. المهم حكاوي جميلة وبنصدقها كتير..
المهم انا مبسوط لفكرة الكوز الزمان في السودان القديم بتاعنا المربوط جو العربات دي من انا طفل وتمنيت اكون عندي لوري اربط ليهو مش كوزساكت والله سيد قطب ذاتو كان لقيتو اربطو لكن لمن كبرت وعرفت انو الكيزان زي ما مربوطين في الازيار مربوطين كمان في المدارس في الاتحادات وفي النقابات وهسع البلد مربطة كلها كيزان عشان كده البلد كلها تكورك وحلانه وما قادرة تمرق من التراب والترابي ذاتو رغم انو الترابي ذاتو هسع ودي من علامات القيامة ذاتها قابل افورقي وعمل معاهو بيان وكمان قال حاقابل الحركات المسلحة في الشرق .. يعني اريتريا ذاتها ربطوافيها كوز والمعارضة كلها ربطوا فيها كيزان والمنبر ده ذاتو مربوطة فيهو جنس كيزان حاجة غريبة يعني الحكومة والمعارضة كلها مربطين فيها كيزان عشان كده المعارضة وحلت وهسع عبد الرحمن سعيد ذاتو قال احتمال اكون وزير وممكن اكون ابو عيسى ذاتو وناس مولانا وكمان اولاد المهدي امكن اتصالحوا وقالوا فطروا مع بعض واخدوا صور تذكارية وصالحوا الترابي شيخ الكيزان ذاتو ونقد قابل الترابي ذاتو ومولانا قالوا قبضوهو تقيل من الكوز عليوة ذاتو والزهاوي بتاع الاصلاح بقى موتمر وطني والترابي هسع بقي زعيم المعارضة وناس التجمع بقو مع التوالي غايتو جنس جوبيكة وما قادر اركز كدي خلونا مع الكوز بتاع التاكسي بتاعي ..
المهم انا هسع من امبارح مفكر اربط لي كوز في التكسي بتاعي عشان احقق امنية الطفولة بتاعتي بس خايف الامريكان في الكشف السنوي بتاع التاكسي بتاعي كان لقوا في المكنة بتاعة التكسي بتاعي كـــــــــوز عديل مربوط علي بالطلاق اودوني غوانتنامو ذاتها يعني هسع انا اعمل شنو يا جماعة الخير ويا كيزان المنبر ادونا رايكم وجزاكم الله عنا كل خير والجاتك في تكسيك سامحتك ................... ونواصل

--------------------------------------------------------------------------------
مداخلة: #2
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: محمد السر
التاريخ: 29-10-2005, 01:38 ص
Parent: #1


Quote: ودابرق داك دحين جا لوتري

Quote: ربما اخونا ود ابرق مخصوص جايبو شيتا ختري

لا هذا ولا ذاك..
بل جاء عبر برنامج الفيزا العشوشية

--------------------------------------------------------------------------------
مداخلة: #3
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: محسن عبدالقادر
التاريخ: 29-10-2005, 04:42 ص
Parent: #2


فووووووووووووووووووووووووووووووووووق يا ود هباني

عشان الكوز يتربط


لكن دحين يا هشام اخوي الكوز دا لو ربطتو بي حبل وجريتو بالتاكسي
مش اخير ؟؟؟؟؟؟؟؟؟؟؟؟؟؟؟؟؟؟؟

--------------------------------------------------------------------------------
مداخلة: #4
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 29-10-2005, 06:43 ص
Parent: #3


الاخوان ود السر ومحسن

صباحاتكم بالف خير

والله يا ود السر محيرني تب ود ابرق وصل البلد دي كيف غايتواحتمال اكون جاء ليهو في كرتونة سودانية بتاعة طلح وشاف لابد فيها من السودان مرسلنها لعريس لاجيء...


وانت يا محسن نصيحتك دي بتدخلنا السجن هنا في اميريكا. هي امريكا كان بتجر الكيزان ما كانوا قاعدين ومعششين فيها من زمن حسن البنا ذاتو محبتي واحترامي ولي قدام..

--------------------------------------------------------------------------------
مداخلة: #5
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: mutwakil toum
التاريخ: 29-10-2005, 08:51 ص
Parent: #4


احييك يا هشام على جلد الواقع المرّ بهذه السخرية
التاكسي في امريكا محطة تحتاج كثيراً من حكّ الحكي خاصة وانها المهنة الغالبة بين السودانيين
اشتغلت بها وكتبت عنها في رحم هارد درايف في علم الغيب الآن لكنني حتماً سأعود الي كتابتها
اذ لا بد من ذلك .
تسلم لينا وكلو عيد وانت طيب

--------------------------------------------------------------------------------
مداخلة: #19
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 09-11-2005, 02:22 م
Parent: #2


................

--------------------------------------------------------------------------------
مداخلة: #6
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: Eng. Mohammed al sayed
التاريخ: 29-10-2005, 09:53 ص
Parent: #1


Quote: يعني اريتريا ذاتها ربطوافيها كوز



يحلها الشبكا

--------------------------------------------------------------------------------
مداخلة: #7
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: EL fahal Abdelatif
التاريخ: 29-10-2005, 10:42 ص
Parent: #1


العزيز هشام ..الفكرة رائعة من حيث انها تلقى الضوء على تطلعات قديمة لقطاع
هام من المواطنين فى السودان وهم المساعدية...والكوز صوت (تورية)...والكوزفى مجال آخر مساعد يدندن داخليابصوت رياح صحراية قادمة من ماضى تهامة.

--------------------------------------------------------------------------------
مداخلة: #8
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: Sudany Agouz
التاريخ: 29-10-2005, 12:24 م
Parent: #7


الأستاذ هشام هبانى .. الهمباتى ..

تعرف .. من الليلة دى .. أديك لقب " الهمباتى " .. همباتى بس نضيف ..

طبعا .. انا ما عارف .. طفولتك قضيتا وين .. لكن باين عليك لفيت السودان ..

لأننى أعتقد .. من عاش فى الخرطوم .. وأم درمان .. أو بحرى .. لا يعتبر سودانيا

أصيلا .. بل السودانى هو من دار به .. وزار قراه وعاش فى أدغاله تارة .. وشرب

من ماء حفائره تارات أخر .. ومن طعنته أشواك السنط .. ومن صنع لنفسه نبالا من

لساتك العربات .. ورأى بأم عينية كيف يصنع حذاء التموت تخليه .. ومن لعب القرقور ..

والسورو .. ومن ذاق ضرباته على ظهور أصابعة والدماء تسيل منها .. ومن أكل العصيدة

الحمراء فى قدح خشبى ..

وأخيرا من ركب اللوارى .. أبورجيلة .. و السفنجة .. والبروكوار .. وركب فوق جوالات السمسم أو العيش مع المساعدية .. كما قلت .. وذاق .. غربلة الدقداق .. أو المبيت فى الخلاء ثلاثة أيام لعطل فى الماكينة .. أو لكسر عمود النص .. أو حتى لفيضان فى أحد الأودية الخطرة ..
وهنا نرجع لموضوع الكوز .. تعرف ياهشام .. أول مرة أعرف انه الكوز يربط أما ماكينة
اللورى .. وهو الذى يعطى صوتا مميزا .. يرتاح له السائق .. لكن ماقلت لى نوع الكوز ..
هل هو من الألمونيوم .. ولا من الصاج ولا .. ولا عنده شنب ودقن .. ده يكون خازوق كبير ..
لآنه لو كده .. الصوت يطلع من وين .. ؟؟ .. استغفر الله .. يااخى .. انت داير تدخلنا فى مشاكل عويصة ..
لاكين قول لى .. ههمّ الكيزان .. سموهم كيزان ليه ؟؟ .. هل عشان الكوز له أضان واحده بس .. ؟؟ .. لاكين في كيزان ليهم أضانين ..
بعدين .. عرفنا كيزان اللوارى .. وحسى دى انت داير تربط ليك واحد فى التاكسى بتاعك ..
وبعدين فى كيزان أزيار السبيل .. المربوطين طوالى .. ديل برضو كويسين ..

لكين ياهبانى الهمباتى .. خلى بالك .. لو لحقت ربطت ليك كوز فى التاكسى بتاعك ..
حتاخد مخالفة .. لأنو هيئة حقوق الانسان حتمسكك .. ويقولوا ليك كيف تربط بنى آدم بجوار هوا الماكينة الساخن .. أعمل حسابك ..

يالا .. كله .. كلام ونسة .. وان شاالله ماحد حوش ..

عمك العجوز ..
أرنست



الكوز .. ومن شر

--------------------------------------------------------------------------------
مداخلة: #9
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: almulaomar
التاريخ: 30-10-2005, 00:38 ص
Parent: #1


يبدو أننا نمارس نوعاً من الحرب على الكيزان فبعد أن فرغنا من كوز سبيل أبا جهينة وأفرغناه بارداً في جوفنا الحار بفعل الشطة والويكة وموية الفول والشاي الأحمر والكسره المرة التخليك تصر العين ويصبح وشك ولا القمر زي الماصي ليك ليمونة وشمس الصباح البتطلع عمودية وبدون مقدمات يعني لو جاملتك وعاوز تقول يا نسيم أرجوك قول ليهو تكون درجة الحرارة قد تجازت الثمان وثلاثون درجة أى حولي مائه وكسور الدرجة فهرنهايت.
أها يا أخوي بعد أن فرغنا من كوز السبيل نجي لي كوز العربية ففكرة تركيب كوز في العربية دي فكرة شغلتني منذ الصغر بشرط أن يكون في الكوز ريشتين أو موسين ، وظللت طوال عمري محتفظاً بالكوز على أمل أن أجد عربية حتى بلغت من الكبر عتيا وجاوزت الرابعة والثلاثون من الأعوام والسنون في دنيتنا الجميلة ففكرة كوز العربية كما تعلم أنه يتم تركيبه أمام المروحة وما أن تدور المروحة حتى يحدث الهواء المندفع منها طنيناً يشبه طنين باعوض منتصف الليل في أجواء حارتنا والحارات المجاورة ، الشئ الذي إستغرب له كيف لهذا الكوز أن يقد المكنه فهو عبارة عن كوز صلصلة حجم عائلي أو أنناس مفتوح من الإتجاهين ومثبت في طرفيه من ناحية واحدة عدد إثنين موس ناسيت الأصلية ماركة التمساح العشاري.
يأتي صوت الكوز عندما تكون العربية في منتصف الأودية أو العتامير حنيناً حزيناً. أها شايف جيزانك بدأت تغرف من بحر السياسة في الدول المتقدمة ومن بالوعات السياسة في دولنا المتأخرة حد الدهشة. ولما كانت السياسة مرض مزمن في عالمنا كان لابد أن أبتعد عنها وأكتفي بكوز ذرة شامي أو قل قنقر وفي رواية أخرى عيش ريف.

--------------------------------------------------------------------------------
مداخلة: #10
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: gamal elsadig
التاريخ: 30-10-2005, 01:23 ص
Parent: #9



الرفيع / هشام هباني
لك السلام و التحايا ....
وانت تعيدنا الى ماضي جميل بحديثك عن اللواري و القيزان و السواقين و المساعديه وتوصف كل ذلك بدقه وسرد رائع وجذاب ..
بخصوص الكوز في العربيه اصبح بدل العلب الفاضيه (الكيزان) السواقين بقو يربطو صورة الاشعة بعد لفها بصوره خاصه فهي تصدر صوتا اجمل من الكوز .... وقد يكون السواقين خايفيين على المكنة من الكوز .... ياهشام اوعك تربط كوز خوفا من سرقة اجزاء المكنة جزء جزء واحتمال تلقى تنك (البترول) فاضي في لحظات وقد تمتد اثار الكوز الى باقي السياره وخاصة (الخزنه) واخشى عليك من سرقة السيارة ليلا بتوصيله خارجيه وقد تجدهامشلعه ومفككة (اجزاء) .. فاعمل حسابك ...

جمال حسين

--------------------------------------------------------------------------------
مداخلة: #11
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 30-10-2005, 06:28 ص
Parent: #9


العزيز الملا ود عمر الطالباني
صباحاتك بالف خير


يا خـــــــــــوي كان الكوز العفين بتاع علبة الصلصة العفينة زي ما قلت بقد مكنة اللوري الهوستــــــــــــن اذن نظريتك صحيحة عشان كده الكـــــــيزان الجبهجية قـدوا مكنة البلد كلها والبلد بقت محلوجة ما قادرة تمشي..
معزتي واحترامي









العزيز جمال

والله يا جمال انت عارف كان كدي السواقين اكتشفوها مؤخرا حكاية ورق الاشعة دي وده والله سبق في الاكتشافات خطير وهنيئا لكل السواقين في بلادي
في التخلص من الكيزان في سياراتهم ولواريهم ولذا ننصحهم بورق الاشعة واحذروا الكيزان واشكرك يا عزيزي علي النصيحة الغالية فقد جنبتني هذا الكوز الذي اخاف منه على ماكنة التاكسي بتاعي وربنا اخلصنا من الكيزان الكبار ذاتهم واجنب بلادنا شرورهم.
محبتي واعزازي

--------------------------------------------------------------------------------
مداخلة: #12
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: برير اسماعيل يوسف
التاريخ: 30-10-2005, 05:29 م
Parent: #11


العزيز/ هشام هباني

و الله يا هباني انت زول مسلط خلاص... يا زول انت نكته قصة الكوز من وين ... و لكن ما دمت مصر علي ان تربط كوز لتكسيك... فانصحك نصيحة لله و الرسول ... ما تربط اي كوز في عربيتك ... لان الكيزان ديل ما عندهم ضمان و لا امان ... فقد ينقلب عليك كوز عربيتك و يدخل في اضافريك... فابعد عن الكيزان نهائيا... لان الكيزان لا عهد لهم.

و لا تهتم يا هباني بالجوطة الحاصلة في السودان المتمثلة في لقاء الاضداد من اقصي اليمين الي اقصي اليسار و ناس نص نص... فالشغلانية دي عمرها قصير... و لا تستدعي ان ينجس عربيتك كوز ... حتي لو كان كوز من العيار الخفيف.

و حتي اعطيك بديل للكوز ... فيمكنك ان تركب ليك بوري متلت و به اغاني من نوع ود اب جردة بالغ فيها و جاب المكنة بترزيها.

بخصوص حكاوي السواقين فقد كنت شاهد عيان لحكاوي كثيرة مليئة بالمبالغات و منها علي سبيل المثال ان احد السواقين قال لنا و نحن في القرية ان سير المروحة انقطع ليه في الخلاء و لم يكن عنده اسبير ... فربط المروحة بالتكية ... و كان يسوق اللوري بالجلابية فقط و من غير سروال ... اي بمعني انه اصبح سواق ام فكو في سبيل ان يصل الناس الي اماكنهم ... و لا ندري حتي الان كيف تحملت تكية اخونا السواق حرارة المروحة العالية و لساعات طويلة ... لان اللوري ... لوري سفري ... بتاع سفريات... و لك المودة و المعزة و الاحترام يا هباني الحقاني... الماهو براني.

--------------------------------------------------------------------------------
مداخلة: #14
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: almulaomar
التاريخ: 31-10-2005, 00:44 ص
Parent: #12


أخي برير أحمد يوسف
لم يبالغ ود أب جرده الذي أحضر المكنه بي ترزيها بل أنت الذي فعلت ذلك يقيناً.

--------------------------------------------------------------------------------
مداخلة: #13
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: برير اسماعيل يوسف
التاريخ: 30-10-2005, 06:11 م
Parent: #1


***

--------------------------------------------------------------------------------
مداخلة: #15
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 31-10-2005, 09:09 ص
Parent: #13


العم ارنست

صباحاتك بالف خير

انا قبلت منك تب لقب (الهمباتي) عشان الهمباتة رجال لكنك يا عم ارنست بهذه الذخيرة والمفردات الموغلة في السودانية الاصيلة والتي فرغتها في هذا البوست بهذه الكميات المهولة وهي تفاصيل انقرضت في ذاكرة كثير من السودانيين ولذلك تستحق ان امنحك لقب ( الفنجري ود البلد) محبتي وتقديري





اما انت يا برير المسنوح والله نصيحتك باقي عليها تب وزي ما قلت الكوز ما عنده امان وبعدين التاكسي ده حمار الرزق بتاع اخوك وعليهو معايش الوليدات والفاتحين خشومن في البلد هناك كمان اقوم افرط فيهو ادخل فيهو كوز في المكنة بتاعتو علي بالطلاق بقد المكنة ده كان لقيت المكنة الخوف ما القاها ذاتها ولله في خلقه شئون.

محبتي واعزازي


هشــــــــام

--------------------------------------------------------------------------------
مداخلة: #16
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 01-11-2005, 08:18 ص
Parent: #1


..................

--------------------------------------------------------------------------------
مداخلة: #17
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: نادر
التاريخ: 01-11-2005, 10:44 ص
Parent: #1


هشام هباني
تحياتي كاملة غير منقوصة
مررت وأعجبني هذا التدعي الجميل ... واصل امتاعنا فقد طربتُ أيما طرب لما كتبت ... قد يكون مرد الأمر لتشابه البيئة التي ترعرعت فيها في شمال السودان، حينها كانت الحياة بسيطة وحدود العالم بالنسبة لنا هي تلك التلال وراء النهر، وأعجب رجال هو كما ذكرت سائق البص أو اللوري السفنجة أو الأوستن، فهو في نظر الجميع أبرع من مشى على قدمين، كيف لا وهو يطاوع الحديد ببراعة واتقان، عندنا إضافة لما ذكرت بوري تلاتة؛ حيث النغمات الحنينة التي يتفنن سائق اللوري أو البص في عزفها بواسطة ذلك البوري، وقد كانت أشهر الأغنيات التي تُعزف حينها على بوري تلاتة هي أغنية(إنتي كلك زينة وعايمة كالوزينة ويحفظك مولاي) هكذا كان يبدو لي النص لو لم تخني الذاكرة المعطوبة هذه ...
كل عام أنت ومن تحب بألف خير
نادر

--------------------------------------------------------------------------------
مداخلة: #18
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 01-11-2005, 11:49 ص
Parent: #17


العزيز الاصيل الاخ/ نادر


كل العام وانت والوطن بالف خير

قطع شك وتب انت ( ود بيئة) ما دام بتعرف البوري ابو تلاتة غمازات واغنية انت كلك زينة وعايمة كالوزينة ويحفظك مولاك اي من ذات البيئة التي ترعرع فيه اخوك هشام هباني وان كان اسمانا لا يتناغمان مع تلكم البيئة كان يمكن ان يكون اسمي خير السيد او الفنجري وانت عوج الدرب او عاشميك بدل هذا الاسم (الحنكوش) والذي لا يتلاءم مع بيئتنا الموغلة في الريفية وقد كان اسمي يسبب لي حرجا كبيرا امام رفاقي في المدرسة من ابناء اهلي بالبادية لانه اسم حناكيش وباذن الله في طريقي لتغييره قريبا حتى يتماهى مع تلكم البيئة الريفية... معزتي ومحبتي


هباني

--------------------------------------------------------------------------------
مداخلة: #20
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 10-11-2005, 07:25 ص
Parent: #1


...................

--------------------------------------------------------------------------------
مداخلة: #21
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 11-11-2005, 11:35 ص
Parent: #1


>>>>>>>>>>>>>>>>>>>

--------------------------------------------------------------------------------
مداخلة: #22
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 11-11-2005, 11:35 ص
Parent: #1


>>>>>>>>>>>>>>>>>>>

--------------------------------------------------------------------------------
مداخلة: #23
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 13-11-2005, 03:10 م
Parent: #22


كيتا في الكوز النباح

--------------------------------------------------------------------------------
مداخلة: #24
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 15-11-2005, 02:25 م
Parent: #23


كيتا في الكوز النباح

--------------------------------------------------------------------------------
مداخلة: #25
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: shammashi
التاريخ: 16-11-2005, 00:50 ص
Parent: #24


والله يا هشام لقيت ليك كوز فيه كل المواصفات المطلوبة من ناحية الصوت وما يلزم . وهاك دي عينة من صوته.

وعلي الطلاق سمسرة ما عايز بس خدمة ليك في البلد الصاقطة ديك لوجه الله


Quote: جك جرك سحبو منّي ..
تاني جوووة الجك سحبو منيّ......




ولو دا ما نفع في واحد تاني لكن داك أقل حاجة بينكسر يعني ممكن تربطو في عجلة واحد من الشفع.

قصرت معاك؟؟؟

والله بعد دا إلا أجيب ليك حاج نور ظاتو

--------------------------------------------------------------------------------
مداخلة: #26
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 16-11-2005, 06:04 ص
Parent: #25


العزيز/شماشي


والله عوافي عليك تب ما قصرت مع اخوك لكني يا خوي الناس وصوني قالوا لي ما تركب كوز للتاكسي بتاعك بكرة ممكن تلقى التاكسي بتاعك ظاطو ما في ولا كمان ممكن تلقاهو في جوانتانامو ظاطهاااااا حاجة تجنن؟؟؟
محبتي

هباني ظاااااااطو

--------------------------------------------------------------------------------
مداخلة: #27
العنوان: Re: لـقـد خطـرت لي فكرة ان اربـط (كــــوزا ) للتاكـسـي؟؟
الكاتب: هشام هباني
التاريخ: 08-12-2005, 06:21 ص
Parent: #1


.......................


--------------------------------------------------------------------------------

ليست هناك تعليقات:

إرسال تعليق