وقـــــــرر زبوني الامريكي الحــج الى الخــرطوم!!؟

مكتبة هشام هباني وقـــــــرر زبوني الامريكي الحــج الى الخــرطوم!!؟
03-12-2006, 03:45 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1199945462&rn=0


--------------------------------------------------------------------------------
مداخلة: #1
العنوان: وقـــــــرر زبوني الامريكي الحــج الى الخــرطوم!!؟
الكاتب: هشام هباني
التاريخ: 03-12-2006, 03:45 م


في زحمة اللهاث اليومي وفي غمرة الاستعداد الامريكي المجنون لاعياد الميلاد المقدسة جدا جدا في هذه الايام في هذه البلاد الطيب اهلها والذين ينفقون جل مرتبهم في هذا الشهر المبارك في شراء الهداياللاقارب والاصدقاء والاحبة ومن يعشقون ويقدرون في حميمية عالية يحسدون عليها.. وبالطبع تصيبنا هذه الايام المباركات ايضا نفحاتهم وصدقاتهم في هذه المهنة العجيبة (يعني ود هباني الايام دي في خريف ابو السعن ظاااطو قعوي وجراد وصارقيل ودغلوب )!!
هذه المرة كان زبوني حسب الاشارة المرسلة الي هوالسيد (John) وكان العنوان هو في صالة عرض تجارية مشهورة بمدينة دالاس الامريكية وهي تعج بالمتسوقين في هذه الايام المقدسةوبالطبع العبد لله ( قام سداري) ووصلت العنوان المقصود وارسلت شارة الاخطارللزبون بان ( العبد لله وصل) و كنت اترقب مقدم زبوني بكل حواسي وانا في انتظار الرزق من ذلك المجهول القادم علنا نظفر بشي طيب يفرح (ام احمد ونضال واحمد والفاتحين خشومن واباطم والنجم الهناك في السودان وقالوا عليهم الله ماشق حنكا ضيعوا والله هم في كلاوي وكناكين الضياع ظاااطو وحكومة السجم قاعدة تتاجر في الدين والخراء ظاااطو)؟؟
في لحظات بعين التكاسي الحصيف و( المقددة) كان في اتجاه التاكسي زمرة من القادمين من القاعة وانا حالي كحال الصبية الاشقياء في الزمن الجميل وهم قد نصبوا فخاخهم وشراكهم
( قلاليبهم وسبيبهم) في انتظار الرزق من (البلوم والقماري والقدالي وربما ام بعيرة وبعض من طيور بلادي الحبيبة) والكل في تشوق للظفر بالطير الكبير .... لحظات وانفلت احدهم من زمرة الرهط القادم مباشرة نحو (قلوبيتي) اي التاكسي انه الزبون المقصود ... كان يتهكع ويتلكع ويتسكع وبيديه حزمة من الاشياء من المشتروات العيدية وقلت في نفسي ( يا خسارتك يا ود هباني يخسي القلوبية جابت ليها كمان عجـــل.. اللهم لا اعتراض في حكمك يا الله)!! وبالطبع حياني بتحية هي تحيتهم وحييته بتحية ( ارجل واخشن منها)ففتح باب التاكسي الخلفي .....وكانت بالطبع التحية التقليدية من قبل التكاسةلزوم تلطيف وترطيب الاجواء انني تمنيت له بعيد سعيد وبتسوق جميل يليق بعظمة هذه المناسبة..وانبسط صاحبي وسألني ان كنت مستعدا للكريسماس ام لا ؟؟ واردفه بسؤال اخر عن تسوقي وهل اشتريت للاسرة كل لوازم هذه المناسبة السعيدة.. وبالطبع كان ردي ايجابيا ولكنه كان ردا ( نايخا)وشعر بانه كان ردا ( نايخا) وهنا سألني عن ديانتي فأجبته باني مسلم.. والحقني بسؤال اخر حول هل يحتفل المسلمون بميلاد يسوع... وهو يربط ذلك بجاهزيتي للاحتفاء بالمناسبة وانا حسب اجابتي على سؤاله الاول قد بينت له ذلك بالايجاب و في هذه اللحظة( اخوكم اتنفخ وعمل فيهارب الدين ظاااطووكمان فكر استقطب هذا المثلي الامريكي للدين الاسلامي ظااطو يعني كان جلت حكاية البقشيش علي الاقل نلقى الاجر يوم القيامة في هذه المحاولة المخستكة!!) وقلت له نحن سيدناعيسى ده ظاااطو لو كان قريت القران بتاعنا عندنا سورة ال عمران دي من السور الطويلة في القران بتاعنا وعندنا سورة مريم العذراء ظااااطها العندكم في الصور محجبة والراهبات بتاعنكم محجبات وكمان انتو عاملين لينا فيها نقة في حكاية الحجاب في فرنسا وبريطانياوما ادراك ماالحجاب!!!... طيب ديك امنا مريم ظاااطها محجبة وراهباتكن ظااطن محجبات يا خي الزول حر امشي عريان ولا محجب!!! .... وبعدين يا اخوي نحن ظااطو دينا ده لو ما امنا بعيسى ولا موسي ....يعني ظاااطو ما تام!! والمسلم عشان يبقي مسلم لازم ايامن بعيسي وموسي وكل الرسل!!... ونحن اسم عيسى وموسي ومريم ده عندنا اكتر من اي شعب في الدنيا منكم انتو المسيحيين ظاااطكم وكمان اسم موسي عندنا اكتر من اليهودظاااطهم!!... وازيدك زيادة.... نحن سيدنا عيسى ده عندنا اتكلم عديل في المهد ودي تب ما عندكم في انجيلكم ده... عيسي اتكلم عندكم زول كبير .. يعني معجزة سيدنا عيسى عندنا كبيرة وواضحة وكمان نزيدك زيادة... سيدنا عيسى ده ربنا نفخ فيه من روحو وعيسى ده احيا الميت وخل الاعمي يشوف..... وكمان اصلو مامات زي ما عندكم مات وحيا بعد تلاتة ايام يعني فيه من صفات الربوبية وده ما بعني انو هو الله ظاااطو زي ما بتقولو بس باذن الله ربناخلاهو كدي وهو زول مخلوق زيو وزي محمد ويوسف وموسي وامو مريم ومريم بشر والبشر اولاد ادم وادم من تراب وادم ده ظااااطو سوداني حقنا وقريبنا ونحن اكتر شعب في الدنيا بنسمي باسم ادم وبندلعو.كمان .ادومة وادمو وادامايا وابشرازيدددددددددددك) وهنا فغر المثلي فاه مندهشا من هذا التكاسي الدعي والمتسلبط في الدين وهو متعجب من تطابق قصتي السيد المسيح في القران والانجيل حسب شرحي له...وهنا فاجأني بسؤال اخر عن بلادي هل بلادي تحترم حقوق الانسان؟؟وهنا اجبته بالنفي جازما انها تجانب هذا الفهم الذي يعنيه زبوني.....اي بمطلق الفهم..... وسالني عن وجودمجتمع
( كداينة) في بلادي يعيش بحرية ...وهنا وقع اخوكم في حيص بيص ولكننا معشر التكاسة احيانا دعيون وانبرى هباني التكاسي الدعي في الدفاع ايضا حتى عن حقوق ( المثليين ) في بلاد السودان المهان!!....فقلت له : انتم في اعتاب الالفية الثالثة وانتم الدولة العظمي والتي تتمشدق بالليبرالية وحقوق الانسان ( يادوب) تناضلون يا معشر ( المثليين) الامريكان لاجل تشريع يصادق على زواج المثيل بينما في بلادناالمتخلفة قبل اكثر من قرن عندما قامت اعظم الثورات عندنا وهي المهدية وهي ثورة تطهرية ووطنية تدعو لاحلال الفضائل وايضا طرد الاستعمار وفي وقتها اشيع ان هنالك رجل قد تزوج برجل في منطقة الابيض وهو امر اثار حنق وغضب التطهريين السودانيين انذاك قبلكم باكثر من قرن وكان سببا من اسباب اندلاع الثورة المهدية انذاك!!!! ........ واردفته بحادثة اخرى موثقة في مجلتنا القضائية وهي تلكم القضية المشهورة التي قرات عنها وانا طالب بكلية القانون بجامعة الخرطوم في القانون الجنائي علي يد الرائع الدكتور عبد الله احمد النعيم استاذ القانون الجنائي حيث في الخمسينيات كانت حادثة زواج رجل من رجل بمنطقة القضارف وقد اثارت حنق وغضب الناس مما دعاهم للشكوى القضائية في حق المتهمين المثيلين وقد كان على ما اذكر رئيس القضاء حينها بابكر عوض الله او ربما المرحوم ابو رنات ولم يكن هنالك تشريع يحرم ذلك الفعل حيث لم تعرف تلك الحادثة في قانون العقوبات الجنائية ولذلك ما كان بالامكان ان يشرع لها وهو امر يتناقض مع القاعدة القانونية المشهورة والتي تقول ما معناه ( ان القانون لا يمكن ان يطبق باثر رجعي علي فعل لم يكن معرفاكجريمة في ذلكم الوقت ) وبحكمة رئيس القضاء فقد صدر حكم في تلكم القضية في حق المتهمين وفقالتلكم القاعدة العادلة بموجب مادتين وهما الافعال المخلة للاداب وايضامردفة بمادة الازعاج العام ... وعلي ما اعتقد ان الحكم الصادر في حقهما لم يتجاوز العامين فقط وهو ما لم يشبع نهم الحانقين والغاضبين من المواطنين ولكنه القانون في زمن دولة القانون ورجال القانون الافذاذ امثال بابكر عوض الله وابورنات وغيرهم من قضاتنا الافذاذ.. واردفت زبوني الكوديانة اليانكي وانا ادافع عن ليبراليةبلادي وسماحتها في التعامل مع هذه الفئات وانا اقول لهم انهم اي ( المثليين) في بلادي نستطعم اكلهم وحديثهم وغناءهم ولا نهاجمهم او نقاتلهم ... وايضا حكاية( البوي فريند والقيرل فريند) دي عندنا قديمة جدا جدا قبل ما اكتسشفوا أمريكا ظاااطها وكتب فيها البروفيسور الهندي بجامعة الخرطوم كلية القانون استاذنا (كرشنا فازديف) كتابا على ما اذكر اسمه( LAW OF HOMICIDE IN SUDAN) وتحدث فيه عن اسباب جريمة القتل في السودان وعزى معظم الاسباب لنظام ( الرفقة والمصاحبة) والخيانات التي تحدث في هذه العلاقات وهو نظام ( البوي فريند والقيرل فريند)....وظل صديقي فاغرا فاهه واردفني بســــــؤال الشخص المتابع والعارف باحوال السودان الراهنة وهذا الشطط وهذا الهوس الراهن في السودان ..وهو يسأل هل لا زالت هذه المفاهيم قائمة ام اندثرت واجتثت بالهوس والغلو الديني الرسمي ؟؟؟هنأ اجبتـه بالنفي مؤكدا له بل ترسخت هذه المفاهيم وتطورت احوال( المثليين) في بلادي ثقافيا واجتماعيا ولدينامطربون مشهورون واخرين في هذا الزمن الرديء وهم احرار في تصرفاتهم غير مضطهدين رغم الهوس والكبت الكبير وهنا قفزت الي راسي فكرة هي اكثر تدليلا علي ليبرالية شعبنا وانا اقول له نحن اكثر تطورا منكم ومن كل دعاة انصار ( المثلية) العالمية فقد تطورت احوالهم من شرائح بسيطة اجتماعية الى شريحة سياسية وصلت اليوم الي سدة الحكم ونحن في وطن حر يحكمه سبعة عشر عاما رفاقكم ( المثليون؟؟) ولله في خلقه شئون.....وهنا صاح اليانكي (......)wow Oh my gosh....are you kidding
فقلت له:that is true
فمد يده الي مصافحا.... وقد اعلن الحج الي الخــــــــــــرطوم!!
وهنا وصلناالى المحطة الاخيرة وكان البقشيش عظيما لانهم كرماء!!

هباني ظااااطو

--------------------------------------------------------------------------------
مداخلة: #2
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: فاروق حامد محمد
التاريخ: 03-12-2006, 04:26 م
Parent: #1


Quote: نحن اكثر تطورا منكم ومن كل دعاة انصار ( المثلية) العالمية فقد تطورت احوالهم من شرائح بسيطة اجتماعية الى شريحة سياسية وصلت اليوم الي سدة الحكم ونحن في وطن حر يحكمه سبعة عشر عاما رفاقكم ( المثليون؟؟) ولله في خلقه شئون.....وهنا صاح اليانكي (......)wow Oh my gosh....are you kidding
فقلت له:that is true
فمد يده الي مصافحا.... وقد اعلن الحج الي الخــــــــــــرطوم!!
وهنا وصلناالى المحطة الاخيرة وكان البقشيش عظيما لانهم كرماء!!




الله يجازيك يا ود هباني

يا خي ضحكت لما جيراننا الخواجات العجايز ضربوا الجرس ...!!!

Are u ok Mr.Farouk فطمنتهم ولولا الوقت متأخر لحكيت لهم ما كتبت

والله يا هشام الناس ديل بياخدوا المواضيع دي جد... هسع الشاف الخواجة

ده في أقرب مكتب سفريات ما كضب وبكون حسع فاتح قوقل الخرايط Earth بفتش

على موقع السودان !!!!! والله يا هشام بالغت ,,, كمان عايز تزيدهم واحد!!!!!

وأمريكاني كمان ... ان شاء الله كمان ما تكوني علمته "جزاك الله عنا كل خير"

--------------------------------------------------------------------------------
مداخلة: #3
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: هشام هباني
التاريخ: 03-12-2006, 05:33 م
Parent: #2


العزيز فاروق

سلامات


Quote: هسع الشاف الخواجة

ده في أقرب مكتب سفريات ما كضب وبكون حسع فاتح قوقل الخرايط Earth بفتش

على موقع السودان !



المصيبة انو لو قوقل ظاااطو طلع بني ادم من الجماعة يا هم ظااااطم
قطع شك بكرة تلقاهو في الخرطوم....نبي الله قوقل...قوقل الاسلامية للقلقلة!!
قوقل الهدي والنور.... قوقل السابحات!غايتو اخر زمن!!

تحياتي

--------------------------------------------------------------------------------
مداخلة: #4
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: عبد المنعم سليمان
التاريخ: 03-12-2006, 06:21 م
Parent: #1


هشام

تحياتي


يا اخوي دي اشانة سمعة للبلد مفروض اكلم ليك هجو الاقرع !!

الا سامحتك ..



Quote: wow Oh my gosh




والله يا هشام دي بالغت فيها

منعم

--------------------------------------------------------------------------------
مداخلة: #5
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: هشام هباني
التاريخ: 04-12-2006, 08:05 ص
Parent: #4


عبد المنعم

سلامات


Quote: يا اخوي دي اشانة سمعة للبلد مفروض اكلم ليك هجو الاقرع !!




عارف يا منعم اخونا الاقرع زول طيبان ومخموم ساكت وعارف البير وغتايتها الا بس بكابر ساكت! وشايلاهو الهاشمية والزول جعلي رابطاهو العصبية ساكت مع الريس والمتجوعلين في الحيكومة..
والله السودان لو غسلوهو بمويات بحور الدنيا ما انضف من العفن والفسادالفيهو...لكن الناس بتكابر ساكت وبتخاف من كلمة الحق... والحكومة باطشة مخوفة الناس بالكتل والتعذيب وبالقزاز عشان كده كتيرين من الناس منفزرة ومتنحة ورضيانيين بالذل والمسكنة وعشان الواحد اضاري علي كرامتو المهانة طوالي مستعد اهاجمك علي طول ويسمعك مليون نصيحة وكلمة استحقار وناسي انو هوالمحتقر الاعظم بس لكنو جبان والله عارف وشايف!!

--------------------------------------------------------------------------------
مداخلة: #7
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: Faisal Fadhlallah
التاريخ: 04-12-2006, 08:37 ص
Parent: #4


Quote: وانا حالي كحال الصبية الاشقياء في الزمن الجميل وهم قد نصبوا فخاخهم وشراكهم
( قلاليبهم وسبيبهم) في انتظار الرزق من (البلوم والقماري والقدالي وربما ام بعيرة )



أخوي هشام

أنا قرّاء مداوم لما تكتب وأستمتع جدا بسخريتك اللازعة وجرجرتك لمحاوريك .ودائما ما تتطابق مسمياتك للأشياء مع ماهي عندنا ( ام بعيرة والقدالي والقديلو والدباسه أم حلقا مواسه والصارقيل وفراق الطريفي لي سفينة الصحراء كما وأنه لديّ إحساس قوي بانك تعرف التربيقة وأم بقبق وهلم جرا من موروثاتنا الفقرية التي أملتها عليها ضرورة التشبث بالحد الأدني من الحياة.وينتابني إحساس بأنك إبن عمي ورفيق صباي والحق أقول أن ما تكتب به من لغة إنما هو ( كالشطة القبانيت ) يرفضها البعض ولكن يتلذذون بها. لغتك سردية موقلة في الإبداع المتوارث عند آل هباني ومنكم الرائع بشري هباني (ومسرّه وما أدراك ما مسرّه ).
إذهب بنابنا بعيداً حتي يقضي الله أمراكان مفعولا أو تحطّ ناقتنا عصي ترحالها.

يا أيها التكساسي المقرّم ( أقصد الدويمي ).

أخوك

أبو باسل

--------------------------------------------------------------------------------
مداخلة: #8
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: هشام هباني
التاريخ: 04-12-2006, 04:51 م
Parent: #7


العزيز فيصل
سلامات

Quote: .ودائما ما تتطابق مسمياتك للأشياء مع ماهي عندنا ( ام بعيرة والقدالي والقديلو والدباسه أم حلقا مواسه والصارقيل وفراق الطريفي لي سفينة الصحراء كما وأنه لديّ إحساس قوي بانك تعرف التربيقة وأم بقبق وهلم جرا من موروثاتنا الفقرية التي أملتها عليها ضرورة التشبث بالحد الأدني من الحياة.وينتابني إحساس بأنك إبن عمي ورفيق صباي والحق أقول أن ما تكتب به من لغة إنما هو ( كالشطة القبانيت ) يرفضها البعض ولكن يتلذذون بها. لغتك سردية موقلة في الإبداع المتوارث عند آل هباني ومنكم الرائع بشري هباني (ومسرّه وما أدراك ما مسرّه ).
إذهب بنابنا بعيداً حتي يقضي الله أمراكان مفعولا أو تحطّ ناقتنا عصي ترحالها.



بالتاكيد طالما تمتلك كل تلكم المفردات اذن انت علي راي المصريين ( ود بيئة)!!
نعم بالتاكيد نحن من بيئة واحدة وبيئات السودان متشابهة..وانابن بيئة ام تكشو والويكاب والبني كربو والكجيك وملاح المرس والكسرة القلع والعصيدة والقدح اب خرس
وجميع انواع اللواييق السودانية!!
واماالروائي والرسام والشاعر والطبيب دكتور بشرى هباني بن عمي فلك التحايا وايضا له
التحايا..ودم بخير.
اخوك هشام احمد هباني بن المرحوم الدكتور احمد هباني

--------------------------------------------------------------------------------
مداخلة: #6
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: عبد المنعم سليمان
التاريخ: 04-12-2006, 08:22 ص
Parent: #1


الاخ العمدة ود هباني

هجو فعلا راجل طيبان وبذكرني باسحق فضل الله اللي عارف الانقاذ

فاسدة وجبانة وتقدم تنازلات سريعه بس بدافع عنها بشراسة !!

حالة تحير وتوجب الدراسة

تحياتي

منعم

--------------------------------------------------------------------------------
مداخلة: #9
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: هشام هباني
التاريخ: 05-12-2006, 10:22 م
Parent: #6


عبد المنعم

فعلا ظاهرة تحتاج دراسة!

--------------------------------------------------------------------------------
مداخلة: #10
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: هشام هباني
التاريخ: 06-12-2006, 10:24 م
Parent: #9


؟؟؟؟؟؟؟؟؟؟؟؟؟؟؟؟؟؟

--------------------------------------------------------------------------------
مداخلة: #11
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: هشام هباني
التاريخ: 09-12-2006, 02:09 م
Parent: #10


......................

--------------------------------------------------------------------------------
مداخلة: #12
العنوان: Re: وقـــــــرر زبوني الامريكي الحــج الى الخــرطوم!!؟
الكاتب: هشام هباني
التاريخ: 13-12-2006, 10:08 م
Parent: #11


؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


--------------------------------------------------------------------------------