الدكتور المناضل عثمان دقنة يلتقي الاستاذ المهدي في فندق هيلتون قدير

مكتبة هشام هباني الدكتور المناضل عثمان دقنة يلتقي الاستاذ المهدي في فندق هيلتون قدير!!
18-08-2006, 12:45 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1200123297&rn=0


--------------------------------------------------------------------------------
مداخلة: #1
العنوان: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: هشام هباني
التاريخ: 18-08-2006, 12:45 م



معقولة ده شي عادي وطبيعي يا مؤرخينا ومثقفينا ويا افنديتنا يا جماعة زول كبير وفقران وفي بلد ذاتها الناس لا عارفين هم كانوا في السودان ولا في الصومال ..زول قريب الخمسين من عمرو اسمو عصمان دقنه امو بيجاوية وابوهو كردي ... اقوم اقرراركب حمارو التعبان الغلبان من طوكر و سنكات في اقصى شرق السودان اسافر الى منطقة قدير في غرب السودان لاعندوGPS ولااطلس ولا بوصلة عشان اعرف وين قدير دي في السودان ولا كان في قطارات ولا طيارات ولا عربات عشان اركب لقدير ولا تلفونات ولا تلفزيونات ولا راديوهات ولا موبايلات ولا فاكسات ولا انترنت اكون بيها اسمع الاخبار ولا في فنادق ولا كافتيريات ولا بقالات ولا شوارع ظلط ولا طرق سريعة في الطريق....الماشي لقدير.. بس سمع بواحد اسمو محمد احمد المهدي انتصر علي الاتراك في قدير..طوالي قام عصمان قرر اسافر لي قدير شان اقابل الزول الاسمو محمد احمد الدنقلاوي..ولا كان قريبو ولا بعرفو من زمان ولا من تنظيمو ولا من حزبو ولا من قبيلتو ولا من منطقتو ولا درس معاهو في الابتدائى ولا الثانوي ولا الجامعة والاتنين ما قروا غير الخلاوي ده في الشرق وده في الغرب ولا اتعارفوا بالانترنت ولا بالتلفونات ولا اتلاقوا في الدراسة في ارروبا ولا لماهم الاغتراب في الخليج ..حاجة تمخول الراس...اركب عصمان حمارو عرر عرر عرر حاو حاو هش هش لحد ما وصل قدير.. كيف وصل قدير وفي كم يوم وكان لابس شنو وكان بياكل شنو وبشرب شنو وبنوم كيفن.. وسلاحو شنوومشى بياتو طريق
وكان بسال عن المهدي في الطريق كيفن.. وبقابل الناس كيف وبقول ليهم شنو...والجو حر ولا برد.. ومنو المشى معاهو لقدير ووين اولادو ومرتو واهلو,, وقال ليهم شنو لمن كان مسافر لقدير الله ورسوله اعلم!!؟؟
واقوم اصل عصمان قـــــــــــــدير واقابل المهدي ظااطو في قدير واتعارفوا واتعاهدوا وطبعا مااتلاقو في فندق ولا في فيلا ولا منتجع ولا كان في مؤتمر صحفي ولا ندوة ولا لقاء تلفزيوني ... ولا كانوا معاهو ومبارينو ناس حراسات خاصة ولا معرصين شايلين الشنطة!!واقوم ارجع عصمـان تاني للشرق ولا تذاكر طيارات علي السودانية ولا السويسرية قام راجع بعد ما بايع البطل المهدي وشايل مهمتو الوطنيةبنفس الطريق ركب حمارو ظاااااطو عرررررر حااااااو هشششششششش لحد ما وصل الشرق هناك والجيب فاضي معلم الله اباطو والنجم لا دولار ولا استرليني ولا كريدت كارد ولا حساب في سويسرا ولا دعم من ملوك ولا امراء ولا منظمات مشبوهة..بس مليان قلبو بحب الوطن !!
واقوم اقنع اهلو البجا بقصة تحرير السودان الواحد وجدية البطل المهدي ومشروع السودان الجديد وكان الزمن داك سودان التحرير والاستقلال هو فكرة السودان الجديد بالجد جد لا فيهو شرق ولا غرب ولا شمال ولا جنوب ولا انفصال !!واقوم اقنعن واقوم انظمن.. ولا ايقاد ولا اسمرا ولا اديس ابابا ولا منبر شرق ولا غرب ولا محاضرات ولا ندوات ولا منتدي حوار ولا مواقع اسفيرية ولا جرايد ولا سمنارات ولالقاءات تلفزيونية ولا اذاعية..اقنعن كيف وقال ليهم شنو الله اعلم المهم اهلنا ناس اوشيك واوهاج وادروب اقتنعوا!!
عصمان جهز رجالو لا عندهم دبابات ولا طيارات ولا كلاشنكوفات ولا قبعات ولا معسكرات ولا هاك يا دعم من امريكا اوارتريا او ليبيا ولا هاك يا طيارات وزيارات ولقاءات وصفقات ودولارات من تحت الطاولات وفي جيوب السادات!!.. رجال غبش ليهم تفــف شايلين سيوف وشوتالات وحراب ودرق وحبة بنادق وشايلين ايمــــــــــــــــان بالوطن والقضية!!
وعارفين كانوا بحاربوا منو يا شطار؟؟ كانوا بحاربوا بريطانيا الكانت حاكمة تلتين الدنيا...يعني زي امريكا الهسه البتبرطع في الدنيا دي!! وقام عصمان الما قرا في الكلية العسكرية ولا كان في الكديت في الثانوية كســـر مربع الجيش التنقليــــــزي ظااااطو ونجضم نجاض قبورة زي ما المهدي نجض ناس هكس في شيكان نجاض قبورة وما خلى ليهم نفاخ النار!!
شفتو عصمان ده صعب كيفن... داوس الجماعة في الشرق والمهدي واصحابو بداوسوا الجماعة في الغرب!!
و سقطت الخرتوم في يد المهدي واصحابو في زمن قياسي جدا جدا بعد اربع سنين بس من قيام دعوتو البدت 1881 وسقطت الخرتوم في 26 يناير1885 وده زمن قياسي في تاريخ حركات التحرير في الدنيا لتحرير دولة بكاملها وكبيرة زي السودان من استعمار صعب زي الاستعمار الانجليزي وبامكانيات تعبانة بواسطة شعب لحم راس وقبايل وطوايف كيفن اتوحد ..دي فكرة صعبة بالحيل وكلام ختري شديد.. لهسع المؤرخين بتاعننا السجمانين ما شرحوها لينا ولا الروائيين اولاد البلد اتخيلوها كانت كيفن... ومن هناك عصمان بقي امير الشرق بعد انتصاراتو المتكررة وما انهزم تب لا هو لا المهدي في اي معركة...ده كلام صعب بالحيل....!
تاني عصمان ركب حمارو عررررر عرررر حاااااو هششششش وهو امير الشرق بعد ما مات البطل المهدي وبقى ود تورشين الخليفة التعايشي حاكم البلد..عصمان ركب حمارو ظاااااطو لمن سمع بالانجليز قالوا جايين اقلعوا السودان تاني من السودانيين..تخيلوا امير الشرق اركب حمارو تاني لا طيارة خاصة ولا سيارة ولا قطر ولا لواري....عررر عررر عرررر لحد ما وصل كررررري..كيفن وصل وبياكل شنو وبنوم وين وصل الخرتوم كيف وقابل الخليفة كيف وكاتل الانجليز كتال الابطال كيف مع كل اهلو السودانيين الشهداء لحد ما سقطت الخرطوم في يد الخواجات بقيادة كتشنر...في كرري وتراجع البطل ود تورشين الي ام دبيكرات لاستعادة الصفوف بعد معركة كرري..ولكنو استشهد استشهاد الابطال هو واصحابو في ام دبيكرات بعد ما حصلوهم الانجليز واعوانهم من السودانيين الخونة!!
عصمان البطل تاني رجع كمان عشان انظم صفوف الرجال لكتال الخواجات.....طبعا بحمارو ظااااطو موديل 1881...ولا طيارة ولا فيلا ولا ( ليلي علوي) ولا شارع كسلا بور تسودان ولا قطر بورتسودان عرررر عررر حاااو هشششششش!!
الامير عصمان في الطريق للشرق قابل سودانيين طلب منهم ادوهو الامان واحموهو من عيون الجواسيس بتاعين الخواجات.. وكلمن بضرورة مقاومة الاحتلال وتنظيم الصفوف..وقالوا ليهو جدا نوم قفا يا امير الشرق !!.. ونام الامير في كهـــف في نص الجبال لا منتجع لا فيلا لا فندق ولا شقة مفروشة ولا خدم وحشم لخدمة مولاي الامير عصمان!!
تراهو الانجليز كلموهم اولاد الكلب السودانيين الخاينين عن مكان الامير عصمان الادوهو الامان ... وفي الصباح داهم الجيش الانجليز الكهف الفيهو الامير عصمان كاسر المربع الزول الصعب بالحيل.. وكانو خايفين منو شديد اكون عندو قنبلية نووية وتفاجعوا لمن لقوهو زولا بسيط بالحيل وكان قلبو مليان بحب الوطن تريان ودخلوا الكهف الفيهو عصمان وما كان عند الامير عصمان لمن قبضوهوالا المصحف الشريف وسيف وجــــــــــــراب... وكانوا خايفين من الجراب شديد تكون فيهو متفجرات... ولكن بعد ما فتحوهو تخيلوا لقوا فيهو شنو؟؟ لقـــــــــــــوا في الجراب دووووووووووم الامير العظيم عصمان دقنةكان بياكل دووووووم يا جماعةالهامبرجر والبطاطس المقلية والكاتشاب كان عصمان بكــــد الدوم وبكسر مربع جيش الانجليز وبركب حمار من سنكات لقدير وبالعكس ومن سنكات لامدرمان وبالعكس وبحارب في الشرق وفي كرري وبياكل دوم!!!!
تقولوا لي نحن سودانيين وديلك ما سودانيين ونحن وطنيين وديلك ماوطنيين ونحن متعلمين وديلك ما متعلمين ونحن متقدمين وديلك متخلفين..وداك سودان قديم ونحن السودان الجديد.... ولله في خلقه شئون!!

هشام هباني

--------------------------------------------------------------------------------
مداخلة: #2
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: هشام هباني
التاريخ: 18-08-2006, 01:35 م
Parent: #1



ألا تلهم قصة حياة هذا البطل الاسطورة عثمان دقنة كتابنا وشعراءنا وادباءنا ان يصيغوا حوله الروايات والقصص و تنظم فيه الملاحم البطولية والقصائد العظيمة دروسا من ماثر للابناء والاحفاد من واقع حقائق التاريخ الذي صاغه لنا الاعداء ولم يهتم به الابناء...فسحقا والخزي لامة لا تعرف الوفاء وتتنكر لتاريخ ابطالها الاوفياء وتمجد حكام اليوم من الخونة والعملاء والمأجورين الذين وضعوا الوطن باكله تحت احذية الغرباء والاعداء.

هباني

--------------------------------------------------------------------------------
مداخلة: #3
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: إدريس البدري
التاريخ: 19-08-2006, 01:40 ص
Parent: #2


هشام هباني

ازيك يا زول

لي فوق

--------------------------------------------------------------------------------
مداخلة: #4
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: هشام هباني
التاريخ: 19-08-2006, 06:34 ص
Parent: #3


قريبي ادريس البدري حفيد المجاهد ادريس تمساح الترك

سلامات والف حبابك معانا في المنبر
مع تمنياتي لك باقامة طيبة بين الاصدقاء
ودم بخير مع تحياتي لكل احفاد ادريس تمساح الترك
واهلنا بالدرادر.


هباني

--------------------------------------------------------------------------------
مداخلة: #5
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: هشام هباني
التاريخ: 19-08-2006, 07:37 ص
Parent: #4




من خلال تناولي المختصرلهذا البطل الاسطورة يبرز السؤال التالي والذي لم اجد له حتى اللحظة اجابةشافية لها منطقها وفكرتها السديدة....من اين جاء وتاتي هذا الوعي الوطني الكاسح وهذه العقيدة الوطنية الراسخة لهذا البطل عثمان دقنةوصحبه والتي مكنتهم من تحقيق مشروعهم الوطني لتحرير الوطن واستقلاله في زمن قياسي جدا في ظل ظروف قاهرة ومستحيلة تنعدم فيها امكانيات التواصل الفكري لبلورة المفاهيم الوطنية بين ابناء الوطن كانعدام الوسائل والوسائط التعليمة الحديثةلايصال المعارف والعلوم وايضا انعدام وسائل المواصلات والنقل الحديث في بلاد شاسعة كالسودان لاحداث التواصل الاجتماعي والثقافي والفكري وايضا كان فقر الظروف الاقتصادية والظروف الصحية والغذائية وايضاسيادة المفاهيم القبلية والطائفية اي تخلف الاحوال الاجتماعية..وبكل هذه الظروف القاهرة كانوا يجابهون عدوا عالميا لا محليا شرسا يمتلك كل اسباب القوة والبطش علي مستوى عالمي .. وهي الامبراطورية البريطانية التي كانت تتحكم في عالم ذلك الزمان..اي مقارنه غير عادلة وغير متكافئة وبرغم كل ذلك الظرف العسير والمستحيل حققوا مشروع التحرير والاستقلال الوطني في ظرف قياسي رهيب ولم ينهزموا في اية موقعة حتي استعادوا الخرطوم واستقل الوطن في 26 يناير 1885.
بينما في الكفة الاخري نحن السودانيين ابناء الراهن في الالفية الثالثة في عالم يسير فيه تتدفق وتنساب المعارف متاحة عبر التعليم بجميع انواعه وعالم ثورة الاتصالات الكبرى التي اختذلت عقدة الجغرافياومسافاتها وحققت التواصل بين البشر في كل انحاء الدنيا وفيه وسائل النقل العظيمة الطائرة والمبحرة والبرية... والتغذية العالية والرعاية الصحية المتقدمة والاقتصادات المزدهرة ورغم كل هذه الميسرات والمسهلات يظل مردود وعينا الوطني صفــــــر كبير ونحن منذ استقلالنا الثاني في يناير1956 في دوامة من الفشل المتواصل والاخفاقات الوطنية الكبرى ونحن نعجز حتى في بلورة وعي وطني لم يستطع حتى هذه اللحظة ان يصمد كي يحافظ علي مفهوم الوحدة الوطنية لصون وحدة هذا الوطن الذي وحده وحرره اولئك الاجداد الابطال...بل صار امرا واقعا ان نتقبل اليوم بكل اريحية دعاوي تقسيم الوطن.. ونتبادل فيها بلا استحياء وجهات النظر حول كيفية التقسيم وتوزيعه بين الفرقاء... وايضا نرسب جميعا في امتحان تحرير الوطن من عصابة محلية فقط وليست الامبراطورية البريطانية عصابة نهبت السلطة الشرعية من بين ايدينا ونحن نيام وظلت علي رقابنا سبعة عشر عاما بقوة السلاح... ولا نملك حتى اللحظة وعيا وطنياولو مؤقتا لايقاف هذا النزف المحلي الخطير وبالتاكيد لن نصمد في التحديات الخارجية الكبرى اذا واجه الوطن الاستعمار مرة اخرى وهو امر ليس ببعيد في هذا العالم الغابة ...اذن الهوة بين الاحفاد والاجداد كبيرة والبون شاسع قيميا وسلوكيا...لماذا..لماذا...لماذا نجحــوا ولماذا ننهار!!؟؟

هشام هباني

--------------------------------------------------------------------------------
مداخلة: #6
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: محمد المرتضى حامد
التاريخ: 19-08-2006, 05:50 م
Parent: #5


هباني
سلام ياخ
الأستاذ الأقتصادي الشاعر والأديب الجليل عبدالمنعم خليفه خوجلي كان قد أرسل لي الشهاده الأنجليزية التالية بعد أن ترجمها بلغته العالية الرصينة , وتعليقه الجميل,


FUZZY WUZZY للشاعر الإنجليزي روديارد كبلنج


فزي وزي
ترجمة : عبدالمنعم خليفه خوجلي


لقد خبرنا الحرب مع رجال عديدين عبر بحار ممتدة
كان بعضهم شجعانا بواسل وكان بعضهم غير ذلك
منهم البايثان والزولو والبورميون
غير أن البجا كانوا أكثرهم روعة
لم نجد منفذا لاختراق صفوفهم أبدا
بينما ظلوا يرمون خيلنا ويمزقون حراسنا في سواكن
وكأنهم يلاعبون جندنا لعبة القطط الموسيقية
********
إنني أهدي إليكم أيها " البجاويون " هذه الكلمات المخلصة
تقديرا لكم في وطنكم السودان
إنكم وان كنتم (متخلفين)
غير أنكم ترتقون أعلى مرتبة يكون عليها المحاربون
إننا نصدر لكم هذه البراءة شهادة حق وصدق
وان رغبتم في أن تكون ممهورة بالتوقيع
فنحن يشرفنا اللقاء بكم في الزمن الذي يروق لكم
****************
قد عرفنا مفارقات ساحات الوغى في حربنا مع الكيبر
وتصدينا لسهام البوير الطائشة عبر المسافات
وارتعشنا عند ملاقاة البورميين
ولمسنا المهارة المتميزة التي يحارب بها الزولو
غير أن كل هذا لم يكن سوى جعجعة ليست بذات أثر
أمام إقدام وجسارة البجا

*************
لقد أشادت الصحف بتماسكنا
غير أن الحقيقة تظل دوماً باقية وناصعة
وهي أنه في حرب الرجال للرجال
قام البجا بدحرنا تماماً

*************
لكم أيها البجاويون ولأزواجكم وأبنائكم
نعترف بأن التوجيهات كانت أن نقهركم
ولقد تحقق ذلك بفضل بنادق المارتيني
التي ظلت فوهاتها تقذف بالشرر نحو صدوركم
في معركة غير متكافئة وغير عادلة
لكنكم رغم ذلك تمكنتم من اقتحام الصفوف

*************
لم تحملوا أوراق هوية
ولم تزين صدوركم الأوسمة والنياشين
وهذا يلقي علينا واجب أن نقوم نحن بالشهادة على البسالة
وعلى براعة الحرب بالمهند ذي المقبضين
وأنتم تصولون وتجولون وسط الأحراش
حاملين رماحكم ودروعكم وأكفانكم

**************
حقاً أن يوماً في المعركة مع البجا
تظل سعادته باقية لعام

*************
أيها البجاويون
هذه القصيدة مهداة لكم ولمن رحل من أصدقائكم
وإن لم نكن نحن أيضاً قد فقدنا رفاقاً
لعاوناكم على التأسي
غير أن الحرب كر وفر
سجال بين الأخذ والعطاء

*************
كانت معركة متوازنة
فقدكم كان هو الأكبر
غير أنكم نجحتم في بعثرة صفوفنا

*************
هم هبوا نحو اللهيب المستعر والدخان المتصاعد
وقبل ارتداد الطرف حلوا أمام وجوهنا
تنفذ منهم رائحة التراب والزنجبيل
وبدت أجساد قتلاهم
مثل الزهور البرية
وبدت كالبط وكالحملان ومثل عرائس المولد

***********
لكم أيها البجاويون في وطنكم السودان
لكم أيها (المتخلفون) الذين تبوءوا أرقى مراتب المحاربين
لكم أيها البجاويون يا أصحاب الهامات الشامخة
لكم أيها الفقراء السود يا ذوي العزائم العالية
يا من نجحتم في كسر صفوف كتيبة بريطانية
أهدي هذه القصيدة .

**********************

عن الشاعر والقصيدة

هذه قصيدة تاريخية كتبها قبل أكثر من مائة عام الروائي والشاعر الإنجليزي والحائز على جائزة نوبل للأدب عام 1907 روديارد كيبلنج (1865- 1936) .
وكيبلنج هو شاعر الإمبراطورية البريطانية الذي تغنى بانتصاراتها وهي في أوج مجدها الفيكتوري . غير أنه في هذه القصيدة يعبر عن إقدام وبسالة الجنود السودانيين ، أبطال معارك الشرق بقيادة الأمير عثمان دقنة وقد بهرته شجاعتهم التي ليس لها مثيل وإجادتهم لفنون الحرب ونجاحهم في كسر صفوف الكتيبة البريطانية . وبرغم ما في القصيدة من تعالي إمبريالي إلا أنها تظل " شهادة حق وصدق " - والفضل ما شهدت به الأعداء - . وهي توثيق لصفحة من سجل الوطنية والجندية السودانية في الذود عن تراب الوطن .
كذلك تشهد القصيدة على نماذج رائعة من الوطنية والتضحية والفداء يحق لأجيالنا المعاصرة أن تفخر بها، وتستمد منها العزيمة على بناء مستقبل زاهر للوطن .

مسقط يناير 1995 عبد المنعم خليفة خوجلي

____________________

* " فزي وزي " تعبير استخدمه الأوروبيون للإشارة إلى السودانيين من قبيلة "البجا " في شرق السودان . وربما يكون المعنى الحرفي له هو: ذوو الشعر المتجعد الكثيف .



--------------------------------------------------------------------------------
مداخلة: #7
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: هشام هباني
التاريخ: 19-08-2006, 07:39 م
Parent: #6



شكرا يا صديقي مرتضى على هذه الافادة الشهادة في حق هذا البطل الاسطورة عثمان دقنة واهلنا البجا الاشاوس وهم يرسمون لوحة ماجدة من البطولة الوطنية الحقةوقد شهد لهم بذلك اعظم شعراء الامبراطورية البريطانية انذاك وهو فخر لكل سوداني وسودانية ان يشهد لنا اعداؤنا بماثرنا فالمجد والخلود لشهدائنا الابطال..ودم بخير مع تحياتي للرائع المترجم عبد المنعم خوجلي وهو يهدينا هذا السفر من الترجمة الرصينة لهذه الشهادة الحقة من اعدائنا عندما تصحو ضمائرهم في لحظات الصفو....

هشام

--------------------------------------------------------------------------------
مداخلة: #8
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: Shao Dorsheed
التاريخ: 19-08-2006, 07:43 م
Parent: #1


*

--------------------------------------------------------------------------------
مداخلة: #9
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: هشام هباني
التاريخ: 20-08-2006, 05:44 م
Parent: #8


..............................

--------------------------------------------------------------------------------
مداخلة: #10
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: Saifeldin Gibreel
التاريخ: 20-08-2006, 11:58 م
Parent: #9


الصديق هشام هبانى بقدر ما كان للبطل عثمان دقنة تاريخ حافل بالوغى ضد المستعمر .. فهنالك تاريخ اسود لعثمان دقنة حيث كان عثمان دقنة آحد اكبر تجار الرقيق فى ذلك الذمان ، وعندما انضم لصفوف المهدى ليس كان حبآ فى المهدية وانما كان لمأرب آخرى حيث اصدرت الامبراطورية قوانين تمنع تجارة الرقيق.. ولم يرق هذا الامر لعثمان دقنة.
على العموم موضوع ذو فائدة تاريخية يجب أن نفرد له حيز من النقاش العلمى والموضوعى.

--------------------------------------------------------------------------------
مداخلة: #11
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: هشام هباني
التاريخ: 22-08-2006, 04:29 م
Parent: #10


Quote: بقدر ما كان للبطل عثمان دقنة تاريخ حافل بالوغى ضد المستعمر .. فهنالك تاريخ اسود لعثمان دقنة حيث كان عثمان دقنة آحد اكبر تجار الرقيق فى ذلك الذمان ، وعندما انضم لصفوف المهدى ليس كان حبآ فى المهدية وانما كان لمأرب آخرى حيث اصدرت الامبراطورية قوانين تمنع تجارة الرقيق.. ولم يرق هذا الامر لعثمان دقنة.
على العموم موضوع ذو فائدة تاريخية يجب أن نفرد له حيز من النقاش العلمى والموضوعى


ــــــــــــــــــــ

صديقي التكاسي سيف جبريل

سلامات

ان كان البطل العظيم والقائد السوداني المحرر لشعبه عثمان دقنة بكل نضاله وبطولاته وتضحياته الفذة وهو الذي سعي لتحرير كل شعبه من الاستعمار والاسترقاق العالمي الامبريالي ان كان تاجر رقيق له مارب ذاتية قاتل لاجلها بجانب البطل المهدي لصالح تجارة الرق كما زعمت..فاني منذ اليوم امني نفسي ان اكون تاجر رقيق مثل هذا الجسور دقنه؟؟!!
ولعمري لاول مرة اسمع بهذا الزعم.. ويا ليتك لو ارجعتنا للمراجع التاريخية الموثوقة في ذلك لنخطو خطو هذا البطل الذي من تاجر رقيق بسيط انقلب لواحد من أعظم الابطال المحررين لشعوبهم من الرق العالمي.. وياليت ان لا يكون مرجعك مرجعا من اعدائنا الامبرياليين الذين استرقونا واسترقوا كل العالم.. والله اكضب الشينة... محبتي واحترامي

هباني

--------------------------------------------------------------------------------
مداخلة: #12
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: Shao Dorsheed
التاريخ: 22-08-2006, 06:53 م
Parent: #1


*

--------------------------------------------------------------------------------
مداخلة: #13
العنوان: Re: الدكتور المناضل عثمان دقنة يلتقي الاستاذ المهدي في فندق هيلتون قدير!!
الكاتب: هشام هباني
التاريخ: 22-08-2006, 11:10 م
Parent: #12


.........................................


--------------------------------------------------------------------------------