الخميس، 24 أبريل، 2008

أم ضريوة تحذر وتنذر امريكا للمرة الاخيرة

مكتبة هشام هباني أم ضريوة تحذر وتنذر امريكا للمرة الاخيرة!!
26-05-2007, 02:05 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1199605557&rn=0


--------------------------------------------------------------------------------
مداخلة: #1
العنوان: أم ضريوة تحذر وتنذر امريكا للمرة الاخيرة!!
الكاتب: هشام هباني
التاريخ: 26-05-2007, 02:05 م


عندما كان الهوس والتشنج في اوجه واوداج البسطاء كادت ان تنفجر من الحماس القطيعي الارعن...خرجت تلكم اللافتة الشامخة المستنصرة بدين اللصوص والقتلة والمنافقين تحسب ان في قبة (الانقاذ) شيخ صالح ورع ومجاهد تقي شجاع وراءه ارادة الرب العليا الناصرة لدينه في الخرطوم ولذلك خرجت تلكم الراية من قريتنا الطيبة
( ام ضريوة) مستنصرة بالله وبكل ثقة عليها احرف جهادية تقول(ام ضريوة تحذر امريكا للمرة الاخيرة)...عندها تشنج صديق لي من الضحك الهستيري حتى كاد ان يبكي من هذه البلية لهذه الاخبار الواردة من السودان ومثل هذه اللافتات المضحكة وهو يحكي عن طيبة هؤلاء المخمومين والمضللين بالشعارات الجهاديةالذين يحثونهم قطعانا للجهاد والحرب ضد الاستكبار وصديقي يقول ضاحكا علي الحررررام يا هباني الموا فيهم الامريكان ديل بس بعشرة طيارات رش مليانات بس hot dog وتفكهن في نص القيادة العامة والله البشير الخواف ده وجماعتو كل زول اقبض ليهو واحدة من الحاجات دي اعاين ليها واعاين لصاحبو واضربوا اللالاي....بان الله غضب عليهم غضبا عظيما حتي امطرت السماء........... وبالتاكيدالحكومة بتقع من غضب الله !!
وين بالله الايام ديك والشعارات ديك والمسيرات ديك والهتافات ديك والرغاءات ديك والجهادات ديك..والايات ديك والاحاديث ديك والديوك ديك!!؟

--------------------------------------------------------------------------------
مداخلة: #2
العنوان: Re: أم ضريوة تحذر وتنذر امريكا للمرة الاخيرة!!
الكاتب: محمد عادل
التاريخ: 26-05-2007, 02:07 م
Parent: #1


الحبيب ودهبانى
ممكن تكون الطيارة الوقعت اول امس
تكون ام ضريوه رسلتها احتمال كبير

--------------------------------------------------------------------------------
مداخلة: #3
العنوان: Re: أم ضريوة تحذر وتنذر امريكا للمرة الاخيرة!!
الكاتب: هشام هباني
التاريخ: 26-05-2007, 05:57 م
Parent: #2


الابن محمد عادل

والله ممكن ان استجاب الرب لاهلنا في ام ضريوة وباذنه اسقطوا تلكم الطائرة التي تحطمت في منطقة الحلفاية.....بس ما قلت لي رايك في حكاية الهوت دوق دي لو حصلت في الخرطوم واتشتت في السوق العربي...الناس حتقول شنوة وهم ابداما شافوا ابدا (هوت دوق) من النوع البقري بالحجم الامريكي الكبير... مش ممكن الحكومة تسقط بغضب الله الذي اسقط عليهم حاجات طبيعية!!

--------------------------------------------------------------------------------
مداخلة: #4
العنوان: Re: أم ضريوة تحذر وتنذر امريكا للمرة الاخيرة!!
الكاتب: Mustafa Mahmoud
التاريخ: 26-05-2007, 06:06 م
Parent: #3


if as you said they have hot dogs falling from the sky

definitely hassan al turabi will say the angles are dropping hot dogs from heaven

and i sincerely hope the just eat it



--------------------------------------------------------------------------------
مداخلة: #5
العنوان: Re: أم ضريوة تحذر وتنذر امريكا للمرة الاخيرة!!
الكاتب: محمد عمر الفكي
التاريخ: 27-05-2007, 07:33 ص
Parent: #4


الاخ ود هباني
منطقة ام ضريوة منطقة تسكنها قبيلة البطاحين والاستهزاء بالمنطقة يعني الاستهزاء باهلها ومواطنهاوهو ما لايليق بك ولا نتوقع ان يصدر عن ابن النظار الذي يفهم ويعي تماما المفهوم القبلي والعشائري.
اؤكد لك لو جمعت كل ابناء ام ضريوة وكل ابناء البطاحين وسالتهم هل ام ضريوة قادرة علي هزيمة امريكا؟ لسالوك هم عن سلامة عقلك!!!
ام ضريوة ونظرا لفقر مواطنيها جراء سياسات الانقاذ اضطروا لبيع اراضيهم فجاورهم الهيب والضيب واؤكد لك ان كاتب هذه اليافطة وحاملها والمحمولة له لا يمثلون البطاحين ولا يمثلون ام ضريوة ولا يمثلون سكانها واهلنا هناك مغلوبون علي امرهم فحجة كاتب اليافطة انه اشتري منزلا في المنطقة بقروشه ومن حقه يكتب الداير يكتبه ويوقل الداير يقوله ما دامت اللجنة الشعبية بالمنطقة تعترف به مواطنا بالمنطقة ولو كان كاتب اليافطة او حاملها من البطاحين اهل المنطقة لما هدت الحكومة بيوت داردوق "بطاحين" المجاورة حتي تساهم مع اختهاام ضريوة في هزيمة امريكا.
سوف ينط البعض ويقولوا يا زول والله انت رجال ومفروض تعتز بالكلام دا وما الي اخره من غنا الحكامات فنقول لهم عندما نعترف بكتابتها قولوا ذلك والي ذلك الحين نقول "رحم الله امرئ عرف قدر نفسه"

--------------------------------------------------------------------------------
مداخلة: #6
العنوان: Re: أم ضريوة تحذر وتنذر امريكا للمرة الاخيرة!!
الكاتب: هشام هباني
التاريخ: 27-05-2007, 08:34 ص
Parent: #5


حبيبنا ود الفكي

سلامات

يبدو انك لا تعرفني حين اوجه سهامي....عندما اقصد من اقصد..كن عميقا في تناولك الامر بين السطور فانا اقصد التهكم علي خطاب الهوس الذي كان سائدا في تلكم الفترة الكالحة من تاريخنا ولا اعرف حتى اللحظة من يسكن ام ضريوة.... من اهلنا من قبائل السودان فالسودان كله قبيلتي ولا اتعامل مع اهله قبائل وعشائر.... وحتي لو رفعت اللافتة في قريتي ( نعيمة) حينها ساكتب باسم نعيمة لا قاصدا الاستهزاء باهلنا الطيبين بقدر ما اتندر علي الخطاب الاسلاموي القبيح السائد...فاحيانا كثير من الاصدقاء في هذا البورد يتندر قائلا الناس في شنو والحسانية في شنو) فرغم اصرة القبلية المتخلفة وانا انتمي الي هذا الاسم ابدا لم ولن اتعرض الي من يستخدم هذا المثل المستفز لقطاعات كبيرة من القبليين من اهلي...ولكني لست بقبلي وارفضها وامقتها ولذلك لا اتحرج من اولئك المستخدمين لهذا المثل!
عموما اعتذر لاهلي البطاحين اذا فهمت انت وغيرك اني استفزهم وهو ما لم ولن يكن ابدا ديدني لان لدي فيهم من اعزهم وهم كثيرون من اهلي البطاحين ومنهم استاذي الثائر الدكتور المحامي محمد يوسف ابو حريرة ومنهم صديقي النبيل خالد المحرب وزوجته الفاضلة اختي عفاف ابو حريرة واخي احمد ابو حريرة واختنا سمية الشيخ طلحة وانت ايها العزيز محمد عمر الفكي....مع حبي واحترامي لاهلي في ام ضريوة
عموم البطاحين وجيرانهم.

هشام

--------------------------------------------------------------------------------
مداخلة: #7
العنوان: Re: أم ضريوة تحذر وتنذر امريكا للمرة الاخيرة!!
الكاتب: محمد عمر الفكي
التاريخ: 27-05-2007, 09:11 ص
Parent: #6


الناظر
نحن لا نطلب منك اعتذارا فانت منا ونعرف تماما قصدك وحسن نيتك ولكن خفنا ان يفهم البعض المقال علي انه استهزاء وكتر خيرك علي التوضيح.
بالمناسبة انا وضحت ليك موقف اهل ام ضريوة لكن لحم الراس التاني ديل يمكن عندهم فعلا مقدرة علي تهديد امريكا وانذارها اوعندهم شئ داسينه لليوم الاسود ولا اليوم الشيرياولا يكون عندهم كتائب نحل استراتيجية ولا كتيبة قرود مدفعية ولا طائرات تجسس من نوع الهدهد او طائرات لا يلتطقها الرادار من نوع "ابو الرقيع" علمه واسع والله يجازيك يا كمال شداد لولاك لما سمع احد بهذه المقولة.



--------------------------------------------------------------------------------

ليست هناك تعليقات:

إرسال تعليق