الجمعة، 25 أبريل، 2008

البيرة ام ناقة والشـــراب سكوب

مكتبة هشام هباني البيرة ام ناقة والشـــراب سكوب!!
01-12-2006, 03:04 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1166766676&rn=0


--------------------------------------------------------------------------------
مداخلة: #1
العنوان: البيرة ام ناقة والشـــراب سكوب!!
الكاتب: هشام هباني
التاريخ: 01-12-2006, 03:04 م


يا الله...اليوم ارجعتني علبة الدخان الامريكية التركيةcamel اي (الناقة) وهي ترجمة بتصرف احتراما للحياء العام..والتي نسيها يبدو زبون من زبائني الكثر!!
ارجعتني هذه العلبة الي الزمن الجميل والسودان القديم الحبيب حيث كان الحلال بينا والحرام بينا وفي السينما وانا بمدينتي الجميلة الدويم كنت صغيرا اشاهد قبل بداية العرض اي الفيلم المناظر وكانت دعاية البيرة( ام ناقة) فابريقة النيل الازرق المحدودة والتي كانت فيها الناقة تتهادى في شوارع الظلط.. وكان الجمهور في ( الشعب واللوج)مستمتعا جدا بهذا العرض الحرام الجميل ولم نسمع بمهووس حمل سيفه وذهب مطالبا براس عمناالمرحوم عبد الحارث عبد المنعم صاحب السينما ولا طالب بجلد عمنا( نجارو) مشغل السينما!!
وكان بجوار السينما مباشرة شمالها يقع (بار المحبة) وهو اكبر بار في مدينة الدويم
ويجاوره في ذات الصف حلواني عمنا المرحوم برعي وهو اكبر مكان مرطبات بمدينة الدويم وقد كان يؤمه المعلمون القادمون من معهد بخت الرضا عند الامسيات الى المدينة ليقضوا حوائجهم!! وقد كان العم المرحوم برعي من اكبر رموز الحركة الاسلامية بمدينة الدويم
بلحيته المشهورة وعجلته وهو رجل طيب وكريم وقدكان ايضا رئيس دار جبهة الميثاق الاسلامي التي كانت علي بعد خطوات من ( بار المحبة)!!
انها سماحة ما بعدها سماحة في وطن كان الحلال فيه بينا والحرام بينا والناس احرار فمن اراد الحلال عليه ان يذهب الى حلواني العم برعي ومن اراد الحرام ف(بار المحبة) جوار
مرطبات العم برعي!! ولم نسمع ذات يوم ان العم برعي حمل سيفه او بندقيته ليجاهد في عمنا( ابكر) العامل في ذاك البار!! ومن الصور العفوية الجميلة تجد اهلنا القادمين الي السوق مرورا بالبار في زمن الصيف..بلا حرج يدخلون البار ليشربوا ماء سلسبيلا حلالا باردا من ماسورة البار المثبتة بثلاجة والعم ابكر يحييهم بتحية الاسلام كانما كان البار سبيلا!!
واما الان فاننا نعيش زمنا عجيبا اختلط فيه الحلال بالحرام والحابل بالنابل والصالح بالطالح فصار البشير مجرما خطيرا والنافع ضارا والانقاذ اغراقا!!
ومن نكات اهلنا في الدويم ان فريقي الاشبال والوطن المشهورين قد لعبا مباراة وهزم الوطن الاشبال واحتج مشجعو الاشبال علي مدربهم الذي اعتبروه سببا مباشرا في هزيمته وقابلوه عند النادي بعد المباراة وهم يحتجون امامه..فما كان من عمنا المدرب الا ان وقف امامهم متحديا اياهم وهو يضع عمته علي كتفه قائلا: اها الدايرني يا رجالة الحقني هناك انا ماشي لبار الله والرسول داك... وهو يعني انه ذاهب لبار المحبة!!
احب الدويم شــــــــــات والركوب عجلات!!!


هشام هباني

--------------------------------------------------------------------------------
مداخلة: #2
العنوان: Re: البيرة ام ناقة والشـــراب سكوب!!
الكاتب: saif massad ali
التاريخ: 01-12-2006, 03:20 م
Parent: #1


ود هباني


الشعوذة بدت من ايمام نميري الوسطي يعني النصف الاخير للسبعينات

مريت مرة وانا قادم من معيجنة عن طريق مدني الخرطوم وقريت يافطة

كبيرة مكتوب عليها مدرسة حلاويات سعد الثانوية اها ود عمك جاتو فكرة


مجنونة قلت ناس البيرة ام جمل يبنو مدرسة ثانوية عليا للبنات

يسموها مدرسة البيرة ام جمل الثانوية العليا للبنات

وحات الله فكرة خترية كان اسع كان اقاموا علي الحد

--------------------------------------------------------------------------------
مداخلة: #4
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 01-12-2006, 06:37 م
Parent: #2


ود عوج الدرب

سلامات


Quote:
مجنونة قلت ناس البيرة ام جمل يبنو مدرسة ثانوية عليا للبنات

يسموها مدرسة البيرة ام جمل الثانوية العليا للبنات

وحات الله فكرة خترية كان اسع كان اقاموا علي الحد



يا زول ات كلامك ده مالو اعوج كدي...ما قلنا ليك المنبر ده فيه نسوان وعيال
والله بدور المهذبين والله الا اغتسوا حجرك...يا زول ما تلعب بالنار ودي مواضيع ما عندنا فيها لا ناقة لا سفينة صحراء!!

--------------------------------------------------------------------------------
مداخلة: #41
العنوان: Re: البيرة ام ناقة والشـــراب سكوب!!
الكاتب: نصرالدين بابكر بدرى
التاريخ: 06-12-2006, 02:33 ص
Parent: #4


ألخ هشام

سلام عليك

يا حليل زمن البيلاة أم جمل الكان قزازها الفاضي لمن نبيعو بصرفنا شهر

ويا حليلزمن التكسي !!!!!!


ودالبدري

--------------------------------------------------------------------------------
مداخلة: #3
العنوان: Re: البيرة ام ناقة والشـــراب سكوب!!
الكاتب: بكري الصايغ
التاريخ: 01-12-2006, 03:57 م
Parent: #1


الاخ الـحـبيـــب الـحـبـوب،
هــبــانـي،

اغـلب الـمواضيـع التـي تبـث فـي الـموقع الـموقـر افضـل وان ارد او اشــارك فيـها من وجـهة نـظـر قانونيـة او بعـرض تاريـخـي.
اخـوك كاتب هـذة السـطور عـاصـر زمان البـيـرة " ابو جـمل " والـتي ظـهرت لاول مـرة عـام 1960، وكانت تصـنع فـي مصـنع بالخـرطوم بـحـري وصـاحـب الـمصـنع كـان أغريـقي إسـمة " خـريسـتو " ومتجـنـس بالجـنسيـة السـودانية وكـانت لة اســرة واولاد عاشـوا فـي الـخرطـوم وطـوال مـدة ليسـت بالقصـيـرة حـتي جـاء نـميـري وبقـوانيـن التـاميمـات صـادر الـمصـنع . كـان الـمصـنع يسـتوعـب نـحـو 3 الـف عـامل وينتـج يـوميـآ نـحـو 14 الـف زجـاجـة بـيـرة. وكانت تباع فـي خـمارات يـملكهـا اغـاريـق او أقبـاط. اشـهـر الامكان الـتـي كـان يـقصــدهـا الشـباب كـل يـوم خـميـس لتنـاولـها كـانت : الـريفيــرا، كـوبا كـوبانا، رويـال، حـديقـة البلـديـة، فنـدق صــحــاري. كـانت هـناك اغـاني معـروفـة وقتـهـا يرددهـا الشـباب وقبـل بـدء فـتـح الـقواريـــر!!!،احـدي هـذة الاغنيـــات تقـول:

" البـيـرة ابـو جـمل والشــراب ســكوب،
كـب يـاعــلـي بالـكـبابـي الشــــوب".

واغنيـــة اخـري تـقـول كـلماتهــا:
" الـجمل بـركبوة، ونحـنا بنشـربوا
شـوف حـكـمة اللـة فـي قـزازة عـبوة"

لـم تكـن هـناك اي إدانات او غضـــب عـلي شـراب البيـرة لان الـمجـتمع
كـان متـســامـحـآ حـتـي جــاءت قـوانيـن نـميـري فـاختلـت كـل الـموازييـن.

--------------------------------------------------------------------------------
مداخلة: #5
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 01-12-2006, 07:12 م
Parent: #3


استاذي العزيز بكري الصايغ

سلامات

شكرا علي المداخلة وانت تذكرنا بذلكم السودان الرائع المتسامح وان كان هو القديم
ولكنه اصبح الان حلمنا ونحن نتوق ان نعود اليه.. وعلي ذكر التسامح حيث كنا صغارا اذكر انني كنت ادرس بمدرسة الوابورات بحري الابتدائية بجوار كنيسة مارجرجس.. كنا عندما نمر بجوار كنيسة مارجرجس نستمتع بالفرجة علي اللوحة المرسومة علي الكنيسة للشهيد مار جرجس وهوراكبا فرسه الابيض وبقناته يقتل الوحش.. ولا نشعر باية نوع من النفور من هذا المشهد الجميل و ايضا كنا عندما نعطش نتداعي علي مزيرة الكنيسة لنشرب الماء وقد كانت سبيلاواحيانا ندخل داخل الكنيسة للفرجةباعتبارها مكانا مقدسا سودانيا!!
وقد كان لدي نقاش ذات يوم بالقاهرة حول سماحة اهل السودان باختلاف اديانهم مع اخوة ومن بينهم الرائع الاديب والشاعر والمسرحي الصديق يحي فضل الله وهو حينها كان يفكر جادا في كتابة دراسة حول ادباء اقباط سودانيين اثروا الحياة الادبية السودانية باشعارهم.. ومن المفارقات التي حكاها لنا احد الاخوة في ذات الجلسة حول التسامح الديني ان بعض ادباء الاقباط كانوا يحتفون مع اخوتهم المسلمين بكل احتفالاتهم وقد سمى لنا اسماء شعراء اقباط كانوا ينشدون قصائد في مدح النبي محمد في احتفالات المسلمين بالمولد النبوي الشريف!!
وبهذه المناسبة احي الاديب والصديق الرائع يحي فضل الله واذكره ان يواصل فكرته في كتابة ذلك السفر الرائع والذي لو ابصر النور حتما سيكون اضافة ثرة للمكتبة السودانية وهي تسلط الضوء علي هذه الشريحة السودانية الهامة..
واذكر يا استاذي بكري تاكيدا علي هذا التسامح ان( الخواجة كوستا) صاحب بار معروف في الدويم كان يجاور جدنا المرحوم الناظر يوسف هباني ( الحيطة بالحيطة) وبينهم الاحترام والود..(لكم دينكم ولي دين )

شكرا استاذي بكري.

--------------------------------------------------------------------------------
مداخلة: #6
العنوان: Re: البيرة ام ناقة والشـــراب سكوب!!
الكاتب: محمد أبوالعزائم أبوالريش
التاريخ: 02-12-2006, 00:30 ص
Parent: #1


أخي هباني
والله لكأنك توصف ما رأيت بنفسي
فقد ذكرتني فصلي في مدرسة الخرطوم الثانوية (القديمة)
حيث كان أحد الزملاء في الصف من الأقباط وكان ذا صوت جميل
يحب أن ينشد أناشيد السماني أحمد عالم في مدح المصطفى (ص)
وكان هناك 3 طلبة أقباط في الفصل بالإضافة إلى واحد
من قبيلة الدينكا .. فكان مجموع المسيحيين 4 طلاّب
لم يكن أحدنا ينتبه إلى ديانتهم إلاّ حينما تأتي حصة التربية الإسلامية
فيخرجوا من الفصل ليدرسوا حصتهم (التربية المسيحية)
هل كنا في جاهلية؟؟
عجبي

--------------------------------------------------------------------------------
مداخلة: #7
العنوان: Re: البيرة ام ناقة والشـــراب سكوب!!
الكاتب: khalid almohrib
التاريخ: 02-12-2006, 12:00 م
Parent: #6


ات عارف ياشيخ العرب المشروع الحضارى دا اول ماجاطبعا ات عارفوبدا يصنف الشعب الزول فى وظيفتو يلقا رقبتو ودوه الصالح العام الضابط مهما تكون رتبته عليك امان الله يقع فيه واحد من الجماعه اياهن يسمعو الماسمعو قبال كدى دا زاتو الجاب الناقه لى الطين ومن هنا بدا الحال يتغبر وحصلت الاشياء اللت بتقول فيها دى

--------------------------------------------------------------------------------
مداخلة: #11
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 02-12-2006, 02:25 م
Parent: #7


خالد

سلامات

Quote: المشروع الحضارى دا اول ماجاطبعا ات عارفوبدا يصنف الشعب الزول فى وظيفتو يلقا رقبتو ودوه الصالح العام الضابط مهما تكون رتبته عليك امان الله يقع فيه واحد من الجماعه اياهن يسمعو الماسمعو قبال كدى دا زاتو الجاب الناقه لى الطين ومن هنا بدا الحال يتغبر وحصلت الاشياء اللت بتقول فيها دى



الله اجازي اللي كانوا السبب!!

--------------------------------------------------------------------------------
مداخلة: #8
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 02-12-2006, 12:21 م
Parent: #6


العزيز ابو العزائم

سلامات

بالتاكيد السودان هو وطن التسامح.. وبالدليل كان وما زال ملاذا امنا لاهلنا الاقباط وهم في الاصل مصريون تعرضوا في فترات تاريخية للاضطهاد الديني في بلادهم الاصلية اي في مصر ولذلك هاجروا واستوطنوا في السودان ولم يرجعوا الي ديارهم بعد ان وجدوا الامن والطمانينة بالسودان.. وايضا يهود السودان عايشوا ذات التسامح في بيئة السودان... ولذلك حتى اللحظة تجد اهلنا اقباط السودان حتى بعد هجراتهم القسرية الاخيرة بسبب هذا النظام البشع.. تجدهم اكثر تمسكا واعتزازا بثقافتهم السودانية.. واما يهود السودان فقد سبق ان اوضحت مصادفتي السعيدة ليهودية سودانية من خلال مشوار تاكسي... وقد كانت وهي تحكي لي عن ذكريات طفولتها بالسودان كنت اشعر بحنين طاغ يجتاحها في تلكم اللحظة وهي في رفقة مواطن سوداني من اهلها.. تحكي لي عن طفولتها واصدقائها واحتفاظها حتى هذه اللحظة باسر سودانية ببريطانيا وسويسرا!!
اه ما اروعك ايها السودان الجميل

--------------------------------------------------------------------------------
مداخلة: #9
العنوان: Re: البيرة ام ناقة والشـــراب سكوب!!
الكاتب: Adel Sameer Tawfiq
التاريخ: 02-12-2006, 01:40 م
Parent: #1


Quote: ودي مواضيع ما عندنا فيها لا ناقة لا سفينة صحراء!!


UP

--------------------------------------------------------------------------------
مداخلة: #13
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 02-12-2006, 02:38 م
Parent: #9


مولاناعدولي


Quote: Quote: ودي مواضيع ما عندنا فيها لا ناقة لا سفينة صحراء!!




بالله هسع جدودنا زمان لمن وصونا علي الوطن!! ما في زول كان بينصحهم هم ظاااطهم
بدل اخلونا نجهجه الجهجهة والمضايرة دي.. ما لقوا ليهم اسم حيوان في الدنيا دي
اسموا عليهو الا سفينة الصحراء دي!! والله غلطانين ...كان ممكن اسموه ديناصور...ورل
ود ام بعلو....ما كان في داعي اسموهو علي الحيوان العايش معانا ده وسط نسوانا وبنياتنا ووليداتنا..غايتو انا سفينة الصحراء دي ما راكبة لي في راسي لكن نسوي شنو!!
يعني هسع لو جبت اسمو....طوالي اقولوا ليك هباني قاصد حاجة.....التقول الاسم الشين ده
عملوا هباني!! انا عارفك حلبي مسخوت وعارف قصدك!!

--------------------------------------------------------------------------------
مداخلة: #14
العنوان: Re: البيرة ام ناقة والشـــراب سكوب!!
الكاتب: Adel Sameer Tawfiq
التاريخ: 02-12-2006, 03:01 م
Parent: #13


Quote: انا عارفك حلبي مسخوت وعارف قصدك!!


تتذكر ياهشام أيام الجامعة الحلوة زمـــــــــــااااان ؟؟!!
إنت كنت أكتر واحد مؤدب وود ناس فينا..
ماحصل يوم قلت كلمة لزول أو إنفعلت..
وإذا في زول قال ليك أي شئ ، كنت تبتسم في هدوء ولا ترد عليه..
غايتو سبحان الله..النضال دا حاجة صعبة خلاص !!

--------------------------------------------------------------------------------
مداخلة: #10
العنوان: Re: البيرة ام ناقة والشـــراب سكوب!!
الكاتب: Adil Osman
التاريخ: 02-12-2006, 02:01 م
Parent: #1





مريسة من الذرة والكسافا، تخمر لمدة 7 ايام.. فى جنوب السودان


سودانيات يبعن المريسة فى السوق.. جبال النوبة؟


مريسة..
فى شمبات معهد تابع لجامعة الخرطوم اسمه معهد ابحاث الاغذية. يبحث فى القيمة الغذائية لبعض الاطعمة والاشربة السودانية مثل اللحم المجفف وبعض الانبذة السودانية.

صدقت يا هبانى ( لكم دينكم ولى دين).. الحرية لنا ولسوانا.. كم اشتهى كورية شربوت!

--------------------------------------------------------------------------------
مداخلة: #16
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 02-12-2006, 09:40 م
Parent: #10



الله عليك يا مولانا عادل دي عملتها كيفن البيرة ام ناقة والسودان والفياقة!!
داك زمن سمح....بالله شوف الناقة دي تريانة وشبعانة كيفن..احب السودان القديم
والشعب العظيم!


--------------------------------------------------------------------------------
مداخلة: #12
العنوان: Re: البيرة ام ناقة والشـــراب سكوب!!
الكاتب: Amin Hamad
التاريخ: 02-12-2006, 02:33 م
Parent: #1


الفاضل هشام
وضيوفه الكرام

عساكم طيبين
منورين البكان
كأنني أعرفكم فرداً فرداً

بالله شوف الفقاعتين علي سطح المريسة
يحدقان اليك في حنو وكرم، قائلين نحن لك
اشفط يا عشا البايتات بالهنا والشفا
ارقدوا عافية

أمين حمد

--------------------------------------------------------------------------------
مداخلة: #15
العنوان: Re: البيرة ام ناقة والشـــراب سكوب!!
الكاتب: عبد المنعم سليمان
التاريخ: 02-12-2006, 04:37 م
Parent: #1


الاخ هباني

الاخوة الاعزاء

تحياتي ..

شايفكم جبتوها بالصورة والقلم !!


من صور التسامح السوداني الاصيل ما حكتة لي الاستاذه الصحفية امال مينا

قبل يومين .. حيث انها سافرت في السبعينات الي السعودية من ضمن وفد

حكومي برفقة الرئيس لاداء العمرة ولم يبدي اي شخص انزعاجة او ملاحظتة

حتي لاحظ ذلك مسئول المراسم السعودي الذي اوضح لها بانه لا يجوز زيارة

غير المسلم للاراضى المقدسة .. وقد انتظرت الوفد بمدينة جدة !!

وقد قالت لي بان الشخص السعودي قد فوت عليها زيارة الكعبة !!


تحياتي

منعم

--------------------------------------------------------------------------------
مداخلة: #17
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 02-12-2006, 09:50 م
Parent: #15


حبايبنا عادل وامين ومنعم

هاكم حـرم ضيافتكم بقنية نضيفة وظريفة!!



--------------------------------------------------------------------------------
مداخلة: #29
العنوان: Re: البيرة ام ناقة والشـــراب سكوب!!
الكاتب: محى الدين ابكر سليمان
التاريخ: 03-12-2006, 12:02 م
Parent: #17


يا جماعة مالكم علينا؟ الواحد من شوفت الغبيشة دى لا قدر يلحق ريقو ولا دموعو!

--------------------------------------------------------------------------------
مداخلة: #18
العنوان: Re: البيرة ام ناقة والشـــراب سكوب!!
الكاتب: Mannan
التاريخ: 02-12-2006, 10:25 م
Parent: #1


يا هشام يا همام
الواعظ النوبى الراحل حسن طنون ارسلته وزارة الشؤون الدينية والاوقاف فى الستينات لحلفا ليعظ الحلفاويين ولدى وصوله لمحطة السكة حديد بوادى حلفا شاف يافطة كبيرة مكتوب فيها" اشرب بيرة ابوجمل" فرفض مولانا حسن طنون النزول من القطر إلا بعد ينزلوا اليافطة واثناء الجدال محتدم قال له حلفاوى عجوز: " يعنى انت يا مولانا جاى من الخرطوم هناك ومخلى مصنع البيرة الكبيرة هناك وجاى تجارطنا فى اليافطة دى؟؟؟؟؟؟؟"

حليل ذلك الزمن الرطب.. حيث لا غلو ولا بيوت اشباح ولا قطع يدين ولا قطع رقاب

منان

--------------------------------------------------------------------------------
مداخلة: #19
العنوان: Re: البيرة ام ناقة والشـــراب سكوب!!
الكاتب: ABDELMAGID ABDELMAGID
التاريخ: 02-12-2006, 10:36 م
Parent: #18


ود هبانى اخوى ...
سودانا كان بخيرو ...
و اهلنا كان بغنوا ...
الحاج حجا و جا !!!
و شراب ( البيره !!! ) ما خلا !!!


البيره ام جمل ...
و الشراب اسكوب ...
ما تكب يا على ...
فى كبابى الشوب ...

عبدالماجد

--------------------------------------------------------------------------------
مداخلة: #20
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 03-12-2006, 02:40 ص
Parent: #18


العزيز الدبلوماسي الجميل منان
سلامات

حلوة جدا يا نوري حكاي اليافطة دي!
بس اول مرة اعرف انو في واعظ حلفاوي اسمو حسن طنون!!
لكن والله يا نوري سؤال دايما عالق بالبال بمناسبة العم طنون ... لماذا اشتهر اهلنا الحلفاويين عند السودانيين بضعف الدين......رغم قربهم من مصر والازهر... وبدايات الدعوة الاسلامية للسودان كانت من بوابة مصرعبر منطقة حلفا!!؟ حيث لم اسمع بعالم دين حلفوي ولا فكي حلفاوي... ولا كوز حلفاوي !! يعني موضوع مهم جدا.
محبتي واحتراماتي

هباني

--------------------------------------------------------------------------------
مداخلة: #21
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 03-12-2006, 05:53 ص
Parent: #20


.....................

--------------------------------------------------------------------------------
مداخلة: #22
العنوان: Re: البيرة ام ناقة والشـــراب سكوب!!
الكاتب: willeim andrea
التاريخ: 03-12-2006, 06:11 ص
Parent: #1


شياب عاصين....... وبعدين ده نفخ بطن ساكت .... ورحلات ماكوكيه لبيت الراحه ..... قال ابو ناقه قال .......اسمه ام ناقله.... ..... هسه ناس الحقوق الفكريه يعملوا ليكم مشكله وكده ......... الله يتوب عليكم وعلينا ........ ياحليل ود بلال للديوم بهناك

--------------------------------------------------------------------------------
مداخلة: #23
العنوان: Re: البيرة ام ناقة والشـــراب سكوب!! (Re: هشام هباني)
الكاتب: عبدالله شمس الدين مصطفى
التاريخ: 03-12-2006, 06:27 ص
Parent: #1


و كان من الممتع جداً أن تزور أحد عمال أو موظفى المصنع ساعة الدوام, فيأتيك (بكوز) الخميرة ممتلئ إلى حوافه بالبيرة الساااااقطة الطازجة, و من ال(قيزان) رأساً. زمن يا راجل, كان العالم مسكوناً بالوضوح و الإبانة و الإفصاح, و ما إلتبست المسائل و تداخلت الأشياء إلآ حين (مزج) أولاد الإيه الدين بالدنيا و بالدولة المتبااااينة أصلاً و فروعاً.

ميلة بسيطة.

عادل عثمان, أشتهى ( دقّة) يجرى فيها الكتكوت كما يقول أهلنا, و الذين يقولون أيضاً " تشرب حار, تكتب حار" ألا أعاد الله زمن الجمل يا هبانى, و لو دون بارات, فيكفى إنسان ذاك الزمان ليسكرنا بخمر نخوته, شهامته, رجولته و أصالته

--------------------------------------------------------------------------------
مداخلة: #24
العنوان: Re: Re: البيرة ام ناقة والشـــراب سكوب!! (Re: هشام هباني)
الكاتب: هشام هباني
التاريخ: 03-12-2006, 08:03 ص
Parent: #23


عبد الله شمس الدين

سلامات

انت عارف في القاهرة بالعتبة جوار مطعم الخرطوم في عام98م اكتشفنا بالصدفة ونحن مارقين من المطعم لاول مرة انداية مصرية عرفناهامن الريحة ريحة المريسة الداشرة .. وفعلا بحاسة الشم وحالة الفضول دخلنا المحل قلنا نعرف الحاصل شنو....علي الحرام لقينا الصعايدة بجلاليبهم..قاعدين مفرشين سباتات في الارض وكل زول بكوزو وجركانتو قدامو مليانة (بوظة) وهي المريسة بلونها الترابي !!والمزة بس شغل اندايات السودان فحول بصل مفقشة وجنبها ملاحة الشطة والليمون!!
والصعايدة ديل الغلغوا واقفين لــــــــــــــــــــــط!!
يعني المصريين حيرونا وهسع نحن لا عارفين المريسة دي حقتم ولا حقتنا..بس العاجبني فيهم
بشربوها بالكوووووووووووووووووووووز ظااااااطو ونحن بنشربها بالقرعة!!

--------------------------------------------------------------------------------
مداخلة: #25
العنوان: Re: البيرة ام ناقة والشـــراب سكوب!!
الكاتب: بكري الصايغ
التاريخ: 03-12-2006, 08:12 ص
Parent: #1


الاخ الـحبيـب الـحـبـوب،
هـشـــام هـبـانـي،

رجـعـت لـموضـوعك تانـي ، واقـول، ان صـورة الـجـمل لـم تكـن مـطبوعة فقـط عـلي زجـاجـات البيـرة " ابوجـمـل " وانـما احـتل الـجـمل ايضـآ لة مكانـة فـي صـدر العـملة الـورقيـة " ابـو خـمـسـة وعـشــريـن " قـرشـآ
ومن منا لايعـرف تلك الـعملـة الـورقيـة الـحـمراء والتـي كـانت وقتهـا فـي سـنوات السـبعينيات ولـهـا قيـمـة ومـكانة!!!!!.

كانت هـناك ايضــآ عـملة معـدنيـــة " ابـوعـشــرة " قـروش،وخـمـســة قـروش وتـحـمـل صــورة الـجـمـل.

ثـم لاننـسـي طـابع البـريـد الـمعـروف ومنـذ زمانات انـجليـز وحـتـي عـهـد نـميـري، وكـنا نسـميـها " الـطابعة ابـو خـمسـة قـروش " وعـليـها
صـورة عـربي راكـب جـمل ويحـمـل سـوط فـي يـدة والـجـمل يـركـض مسـرعـآ،
وكانت وزارة الـموصــلات تسـتعـمل صــورة الـطابع شــعارآ لـوزارتـهـا.

كـان هـناك وبالخـرطوم فـي زمانات الـخمسـينيات تـمثال كبيــر للـجنـرال الانجـليـزي غــردون وهــو علي ظـهـر جـمل ،وجـاء عبود وقـرر ازالـة التـمثال والتمـثا الاخــر لـكتشــنـر.

ثـم لاننـسـي ان الانجـليــز اسســوا " ســلاح الـهـجـانة " ومازالت مـصـر تسـتخـدم هـذا الســلاح فـي مـراقبـة حـدودهـا الصـحـراويـة،واغلـب العاملين بهـــذا السـلاح من الســودانيين والـذيـن تـوارثوهـا اب عـن جـد،ومن يـزور منـطقة " الـجبـل الاصــفـر " فـي القاهـرة يجــد انهـا منطقة سـودانية اكثـر ومن ان تكون مصــرية واغلكب العامـليـن فيـها يمتهنـون مـهـنة الهــجــانة.

سـباق الـجـمال فـي السـعـوديـة ودول الخـليـج اصــلآ رياضـة سـودانيـة اشـتهـرت قـديـمآ فـي الـمناطـق العـربية بغـرب السـودان.

اكـبـر ســوق لبيـع الـجـمال فـي مصــر يـديـرة سـودانييـن،وهـي الـمهنـة الـوحـيدة التـي لـم يسـتطع احـدآ من الـمصـرييـن وان فيـها السـودانين.

بعـد البيــرة " ابو الـجـمل " يعتبــر لـحـم الـجـمال من اطـيـب اللحـوم، واغـلي نوع من اللـحوم فـي مصــر هــو " كـبـد الـجـمل ".

لااحـدآ فـي العـالـم ويعـرف، كـيـف يعـرف تـجـار الـجـمال السـيـر بجـمالهـم وطـوال اربعـيـن يـومآ مـهتـديـن بالنجــوم من الغـرب وحــتي سـوق الـجـمال بالقـاهـرة،قاطـعـين " درب الاربعــيـن " بلا وجــل ولاخـوف!!!.

هـناك امثال سـودانيـة ومـرتبطة بالجــمـل:
" الـجـمـل مابشــوف عـوجـة رقبتـو "
" جـمـل الشــيـل "
" الـجـمل شــكروة بـرك "

--------------------------------------------------------------------------------
مداخلة: #26
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 03-12-2006, 10:00 ص
Parent: #25


استاذي العزيز بكري

سلامات
شنو الفضايح دي ..معقولة كل البذاءة دي عندنا يعني سفينة لصحراء ده داخل في
كل الحاجات الذكرتها دي....لا اله الا الله كمان في الطرادة....دي البذاءة ظااطها عديل!!
وبالمناسبة ذكرتني السقف بتاع الزنكي في السودان البسقفوا بيهو المدارس بقولوا ليهو
الجملون !!!!يعني ممكن نسمي السودان مستقبلا جملونية السودان)!
الحمد لله الماكنا حاضرين زمن تسمية الحاجات دي...كان قالوا ليك ده كلو من هباني ده!!

محبتي

هشام

--------------------------------------------------------------------------------
مداخلة: #27
العنوان: Re: البيرة ام ناقة والشـــراب سكوب!!
الكاتب: saif massad ali
التاريخ: 03-12-2006, 10:46 ص
Parent: #26


ود هباني

لو زرت مدينة العزازي سابقا وهي سوق وسط لكل قري الجزيرة وامتداد المناقل

كل الباصات عليها دعاية البيرة ابو جمل في الابواب الخلفيه ( وهي عبارة عن فلة القزازة السدادة بي لغتنا) والله زول شاغل بيها مافي


هذا الجمل اتذكره جيدا في عملتنا الجنيه والان رمز العز والكرامة لدولة الجوار ارتريا

--------------------------------------------------------------------------------
مداخلة: #28
العنوان: Re: البيرة ام ناقة والشـــراب سكوب!!
الكاتب: Sabah Hussein
التاريخ: 03-12-2006, 11:35 ص
Parent: #1


قول البيره دكر الناقه عشـان خاطر النسوان والاطفال

وبعدين اليومين ديل فى حمله شعواء على ود هبانى ولغته.

بتخيل ود هبانى بياكل فى اصابعينو ويفتش فى الكلام الائقه فى الزمن

الما لائق.

--------------------------------------------------------------------------------
مداخلة: #30
العنوان: Re: البيرة ام ناقة والشـــراب سكوب!!
الكاتب: بكري الصايغ
التاريخ: 03-12-2006, 03:38 م
Parent: #1


... فـي إحـصائية قـديـمة صـدرت من وزارة الـثـروة الـحيوانية عـام 1983
ان ثـروة السوان من الابـل وقـطيـع الـجمال والناقات كـان نحـو 3 مليـون و 700 الـف ناقـة، وكلـهـا ممـلوكـة لقبـائل عـربية وقطاع خاص لادخـل للـحكومة بتـربيتهـا اوالتـدخل فـي شـئون اصـحـابهـا.

حـاليـآ، قامـت الانقـاذ وبتوقـيـع اتفاق مـع الامـيـر طـلال بـن عبـد العـزيـز رجـل الاعـمال السـعودي الـمعروف عـالـميآ ،باحتكارة شـراء وتصـديـر الجمال السـودانية،وقـد تـمت هـذة الصـفقـة الـمـريبـة من وراء اتـحـاد مصـدري الـماشـية والذيـن فـوجـئوا بان احـد أشـقاء البـشـيـر هـو الـمسـتفيـد من الصـفقة مع الامـيــر السـعودي!!!!!!.

--------------------------------------------------------------------------------
مداخلة: #31
العنوان: Re: البيرة ام ناقة والشـــراب سكوب!!
الكاتب: بكري الصايغ
التاريخ: 03-12-2006, 03:45 م
Parent: #1


..... ضـحـك الـناس كـثيـرآ،وضـحـكت معـنا الـصـحافـة العـربيـة طـويـلآ، عـنـدما راح البشـــيـر وينســب اسـباب الاقتتـال فـي دارفـور الـي......" نـاقـة "!!!!!!.

--------------------------------------------------------------------------------
مداخلة: #32
العنوان: Re: البيرة ام ناقة والشـــراب سكوب!! (Re: هشام هباني
الكاتب: عبدالله شمس الدين مصطفى
التاريخ: 03-12-2006, 05:40 م
Parent: #1


تحايا فوّاحة, كأريج بيرة أم (ضكر الناقة) كما إقترحت تسميتها إحدى الزميلات," زميلات المنير لا...البنبر".
و على ذكر (إندايات) وسط القاهرة تلك أقول, أن قدماى و رفيق درب قد أخذانى إليها فى أوآخر العام 1980 , بموقعها الكائن آنذاك فى الجهة الجنوبية من سور حديقة الأزبكية, و الناحية الشرقية لتمثال إبراهيم باشا بميدان الأوبرا,أى موقع متاجر الساعات و الأدوات الكهربائية و الإليكترونية الآن. كانت عبارة عن غرفٍ متهالكة, متآكلة الجدران, معتمة أو ذات إضاءة هزيلة أو منعدمة, جلّ روادها من كبار السن, رفقاء السلاح الذين أكلت الحرب أعضاءهم و أحلامهم,خاضوا ثلاث حروب, تجرعوا الهزيمة فى إثنتان منهم و حين إنتصروا فى الثالثة أبت السياسة إلآ أن تقتل نصرهم و تحوّله بقدرة قادر إلى هزيمة عالمية لصاحب الذبيبة الشهيرة, و (الباحث عن ذاته) و مجده فى أشلاء الآخرين. فى حكاويهم الكثير من (الإنسانية) التى تنضح بها وجوههم المتغضّنة بفعل الزمن و الخيبة, منكسرون دائماً, منطوون على أنفسهم المبتورة,يسكنهم الحزن و المرض, و.. النسيان.لا تكاد تسمع أصواتهم و لا صخب البارات المعهود, و إن ضحكوا, و نادراً ما يفعلوا ذلك, تخرج ضحكاتهم فى شكل سعال واهنٍ متقطع, و أخاله أحمر اللون دائماً, كان أكلهم أو " مازتهم" إن صحّ القول هى الطيور الصغيرة التى لا تسمن و لا تغنى عن جوع, صورة صادقة و طازجة خارجة لتوها من أحد أفران نجيب محفوظ الغارقة فى بؤس الواقعية, أو واقعية البؤس.
أحببنا بعضنا ردحاً من الزمان, ثم تفرّقت بنا سبل الحياة و دروبها, لكنهم ما برحوا ذاكرتى, و ما زالوا بها أكثر ضياءًً و نصوعاً, رغم سواد و عتمة مشهدهم الإنسانى ال...... نبيل.
اشجان ياهبانى...أشجان, و قديماً قيل....أن الحديث ذو شجون. دمت يا ودود. محبتى.

--------------------------------------------------------------------------------
مداخلة: #33
العنوان: Re: البيرة ام ناقة والشـــراب سكوب!!
الكاتب: Adel Sameer Tawfiq
التاريخ: 04-12-2006, 03:01 ص
Parent: #1


Quote: كمان في الطرادة....دي البذاءة ظااطها عديل!!


شعار البنك السوداني الفرنسي حتى اليوم هو "سفينة الصحراء" ، نفس الموجود في العملة زمــــــــااان !!
http://www.sudanvoice.com/up/files/Hfx59545.jpg

--------------------------------------------------------------------------------
مداخلة: #36
العنوان: Re: البيرة ام ناقة والشـــراب سكوب!!
الكاتب: Adel Sameer Tawfiq
التاريخ: 04-12-2006, 02:43 م
Parent: #33




--------------------------------------------------------------------------------
مداخلة: #34
العنوان: Re: البيرة ام ناقة والشـــراب سكوب!!
الكاتب: JAD
التاريخ: 04-12-2006, 07:46 ص
Parent: #1


Quote: انها سماحة ما بعدها سماحة في وطن كان الحلال فيه بينا والحرام بينا والناس احرار فمن اراد الحلال عليه ان يذهب الى حلواني العم برعي ومن اراد الحرام ف(بار المحبة) جوار
مرطبات العم برعي!!




صدقت يا رجل ..

صدقت والله ..

إن ما يستحل الآن بذرائع شتى أسوأ مما كان محرماً سابقاً بالدرب العديل ..

ولو رتبت السيئات التي تقترف في سودان اليوم من حيث الحرمة لجاءت البيرة أم جمل في زيل القائمة ..



من معجمي:

الجمل: ذكر الإبل
الناقة: أنثى الإبل
الإبل: اسم جمع يشمل الذكر والأنثى والكبير والصغير منها.
الجمال: لو ذكرت منفردة تقوم مقام كلمة الإبل .
شأنها في ذلك شأن القوم: فإن ذكرت القوم منفردة تعني الرجال والنساء، وتعني الرجال فقط لو ذكرت النساء في المقابل.

فقل اليبرة أم جمل وكفى يا رجل يا طيب ..

فإن أظهرت تحفظاً فقد ألحدت لشيء آخر لا علاقة له بشعار البيرة ..

تحياتي أخي هشام

جاد



--------------------------------------------------------------------------------
مداخلة: #35
العنوان: Re: البيرة ام ناقة والشـــراب سكوب!!
الكاتب: بكري الصايغ
التاريخ: 04-12-2006, 08:35 ص
Parent: #1


.... من مـهـازل القـدر وســخـرياتة ،ان الـجمل السـودانـي وبعـد وصــولـة الـي الســعـوديةاو الـكـويـت بـواســطـة الـمـستوردين، يـجـد من العـناية والاهـــتمام الطـبي والـمعيـشــي اكـثـر مـمـا يـجـدة 80 فـي المائـة من السـودانييـن فـي الـمـملـكة ودول الـخـليـج!!!!!!.

هـناك عادة عـنـدالبـدو فـي السـعوديـة ان مهـــر العروس يكـون إبـلآ وليس نـقـــدآ، وانـة وكـلمـا كـانت العـروس شـــــابة وممـشـــوقة القوام كان وبالـمقابل عـدد الـجمال الـمدفـــوعة مهـــرآ اكـثـر!!!!.

--------------------------------------------------------------------------------
مداخلة: #37
العنوان: Re: البيرة ام ناقة والشـــراب سكوب!!
الكاتب: بكري الصايغ
التاريخ: 04-12-2006, 04:15 م
Parent: #1


.... بعـد ثـورة اكتـوبـر وتحـديـدآ فـي عـام 1965، قـررت الـحكومـة الانتقاليـة برئاسـة سـرالخـتـم الخـليفـة إجـراء الانتخـابات الـرئاسـية فـي كـل انـحـاء البـلاد. وشــرعـت اللـجـنة الـمشــرفة عـلي الانتخـابات فـي تـوزيع الـرموز الانتخـابيـة عـلـي الـمرشـحـيـن، هـناك من طـلب وان يكون شـعارة الـمفتاح، واخـر طـلب شـعار الشـجــرة، ومـرشـح حـزب الامـة اختــار الـحـربة، وعـزالـديـن السـيد فـي الخـرطوم اخـتار لة القطـية شـعارآ لـدائـرتة، واخـتار احـد الـمسـتقليـن والذي لـم يكـن معـروفـآ اصـلآ فـي الـدوائـر السـياسـية ودعايتـة الانتـخـابيـة غـيـر مقنعـة ولاجــذابة ولايـملك تـمويل او دعايـة كـافيـة واسـتلـم شـعار " الـزجـاجـة" ،وكـانت الـمـفـجـاءة انة حـصــل عـلي اصـوات اهلـتة لـدخـول الـبرلـمان.

--------------------------------------------------------------------------------
مداخلة: #38
العنوان: Re: البيرة ام ناقة والشـــراب سكوب!!
الكاتب: Elbagir Osman
التاريخ: 04-12-2006, 06:16 م
Parent: #1


ذكرتم قصة آمال مينا
كمثال للتسامح

ولكن
ألا تذكرون
لقد كان رأس الدولة مسيحيا
بعد الإستقلال

حيث كان الرمز الوطني
سيريسيو أيرو
عضو مجلس السيادة
يكون رأسا للدولة لمدة شهر
من كل خمسة أشهر
حساب الدستور حينها

ولم تنهر السماء على رؤوسنا
أو ينقص ذلك شئ من إسلامنا

الباقر موسى

--------------------------------------------------------------------------------
مداخلة: #39
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 05-12-2006, 10:14 م
Parent: #38


الاعزاء/ بكري, سيف,عادل, جاد,عبد الله,الباقر

بحق نحن نفتقد ذلكم السودان الجميل المتسامح الجميل ما قبل 69 ولم يكن كاملا ومثاليا بل له مثالبه ومشاكله ولكن اذا ما قورن بكل السودانات اللاحقة...فهو حلم نتمني ان يعيده الله علينا.. وفي النهاية هو سودان بناه مواطنون وطنيون افذاذ من اخر اجيال البذل والعطاء..فالمجد لهم!

--------------------------------------------------------------------------------
مداخلة: #40
العنوان: Re: البيرة ام ناقة والشـــراب سكوب!!
الكاتب: محمد عثمان الحاج
التاريخ: 06-12-2006, 02:24 ص
Parent: #39


العزيز ود هباني من الأشياء التي أدهشتني في بداية عهدي بهذه البلاد أنني اكتشفت أن الكديسة في اللغة الدارجية الإنجليزية تحمل دلالة باطنية مماثلة تماما لدلالة صاحبنا أبو سنام في الدارجية السودانية! الاكتشاف حصل لما كانت عندنا كديسة أنثى في المصنع وكان معانا واحد من الجنس الثالث إياه وكان يحب جدا وقت استراحة الغداء أن يحمل الكديسة وهي كديسة ضخمة ويسيرا متمايلا وشعره يصل كتفيه ويقف أمام السيدات اللاتي يتناولن غدائهن ويصيح بأعلى صوته: أوه ماي بوسي! ويكررها عدة مرات باستمتاع شديد في حين يظهر التوتر على وجوه النساء طبعا نسوان البلاد دي ما سمعن بي حاجة اسمها الخجل! وفي النهاية شكت أحداهن من ذلك التصرف وعندها تأكدت أنا من هذا المعنى الخفي ولحسن الحظ أصيب ذلك الشخص باضطراب نفسي وترك العمل متقاعدا.

اختيار الانجليز للكديسة لهذه الرمزية مفهوم لكن الغير مفهوم هو اختيار أسلافنا لهذا الكائن الضخم ذو الشكل المخيف لهذه الرمزية!

--------------------------------------------------------------------------------
مداخلة: #42
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 06-12-2006, 02:46 ص
Parent: #40


ود الحاج

سلامات

Quote: اختيار الانجليز للكديسة لهذه الرمزية مفهوم لكن الغير مفهوم هو اختيار أسلافنا لهذا الكائن الضخم ذو الشكل المخيف لهذه الرمزية!



من كلامك الفوق ده انا ما عارف اهلنا المصريين ناس عادل امام وسمير غانم معقولة تكون فاتت عليهم الحكاية بتاعة الاسم الكديسي ده في معاكسة زميلتهم الفنانة المشهورة(بوسي) والتي يبدو انها مسطحة انجليزيا حتى اليوم!!

غايتو عندي صديقي جعلي حار جد جدا بالسودان وهو من مدمني المسلسلات المصرية ومعجب جدا بالممثلة المصرية النجمة(بوسي) ولذلك كان حظ بنته الكبرى من الاسماء ان سماها(بوسي) علي الممثلة (بوسي) غايتو لو عرف حكاية الكديسة دي...قطع شك سيوئد بنته( بوسي)!!

--------------------------------------------------------------------------------
مداخلة: #43
العنوان: Re: البيرة ام ناقة والشـــراب سكوب!!
الكاتب: نصرالدين بابكر بدرى
التاريخ: 06-12-2006, 04:24 ص
Parent: #42


الرائع هشام سلام

نعرف المريسة والبقنية والحسوة تاريخها عندنا قديم وجزء من تراثنا الذي تغول عليه هؤلاء الزمرة لمحاولة طمسه

تعرف حتى وقت قريب في المناسبات السارة ( الأعراس ) على جيل آبائنا من أهم المراسيم والطقوس تجهيز الحسوة للضيوف وبتكون بكميات مهولة

الآن مازالت المريسة غذاء رئيسي لقبائل كثيرة عندنا

خريمة ( مدرس من المفلهمين طرد التلميذ لأنو لقاهو شارب مريسة وقال ليهو جيب ولي أمرك ، الأبو جا والمدرس حكا ليهو فعلة ولدو
الأبو قال لي المدرس شنو يعني الولد ما يفطر ولا شنو ؟؟؟

ويا حليل زمن المريسة والحسوة والقامزوت - والتكسي


ود البدري

--------------------------------------------------------------------------------
مداخلة: #45
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 06-12-2006, 10:16 م
Parent: #43


نصر الدين العزيز

سلامات


Quote: ( مدرس من المفلهمين طرد التلميذ لأنو لقاهو شارب مريسة وقال ليهو جيب ولي أمرك ، الأبو جا والمدرس حكا ليهو فعلة ولدو
الأبو قال لي المدرس شنو يعني الولد ما يفطر ولا شنو ؟؟؟





الفزق ده كلام صاح ..انت عارف التربالة والزبالة والبنايين عندنا في الحلة لو ما فكو الريق بالبقنيةوالمرارة تب ما بشتغلوا...وقود عديل يعني بنزين...يعني زي ما في امريكا المشروبات المنشطة والتي يستعملها الناس لا كتساب حيوية ونشاط لمزاولة اعمالهم! وهكذا البقنيةوالمريسة تفعل في تلكم الشرائح فعلا منشطا ومنعشا ولا ترتقي لمرتبة الخمر ام الكبائر لانهم بسببها يزاولون عملا حلالا ولا كبائر محرمة!!

هشام

--------------------------------------------------------------------------------
مداخلة: #46
العنوان: Re: البيرة ام ناقة والشـــراب سكوب!!
الكاتب: Elsamani A.Malik
التاريخ: 07-12-2006, 05:41 ص
Parent: #43


Quote: حتى وقت قريب في المناسبات السارة ( الأعراس ) على جيل آبائنا من أهم المراسيم والطقوس تجهيز الحسوة للضيوف وبتكون بكميات مهولة





تعرف با نصر الدين حتي وقت قريب كان أهلنا يحرصون علي إعداد الشراب في مناسبات الزواج فقد حكي لي أحد الأصدقاء أنهم أعدوا الشربوت و البقنية (وحتي عرقي البلح ) في زواج أخيه وقد أصر والده إنو مافي زول من أولاد الحلة يشرب قبل ما يكفو الضيوف !!!!!!!

--------------------------------------------------------------------------------
مداخلة: #44
العنوان: Re: البيرة ام ناقة والشـــراب سكوب!!
الكاتب: Faisal Fadhlallah
التاريخ: 06-12-2006, 06:09 ص
Parent: #42


Quote: لكن الغير مفهوم هو اختيار أسلافنا لهذا الكائن الضخم ذو الشكل المخيف لهذه الرمزية!



في رأي أن الإجابة علي تساؤلكم أعلاه واضحة وضوح الشمس ، فبما أن هذا الكائن الضخم هو من أكثر مخلوقات الله صبراً وتحملا للمشاق فإنّه ممّا لا شك فيه أن اجدادنا القدماء كانوا أكثر حكمة وبالتالي جاء إسمهمهم دقيقاً جداً حيث أن موضوع حديثكم لا شكّ أنّه أيضاً يطابق ماذكر آنفاً. لاداعي للخوض في التفاصيل فكلكم لمّاحون.

تحياتي

--------------------------------------------------------------------------------
مداخلة: #47
العنوان: Re: البيرة ام ناقة والشـــراب سكوب!!
الكاتب: بكري الصايغ
التاريخ: 07-12-2006, 06:28 ص
Parent: #44


..... فـي زمانات السـتينيات،كانت " قعـدة " البيـرة عندها طـقوس ومـراسيم معينـة، معروفة فـي كل انحاء البلاد. فـمثلآ الشراب لايبـدأ عادة الا بعــد السـاعة تسـعة مســاءآ، ويـحـبب الايكون داخـل الـمنازل، ويفضــل ان تتـم " القعدات " فـي الـحدائــق والـمنتزهـات العـامة او الفنادق الكبيـرة، وبعيـدآ عـن الاطفال وتجـمـعات النسـاء. وفـي حفلات الاعراس ينعـزل
الشـــاربـون وبعيـدآ بشــرابهـم عـن تجـمعات الاســـر والاطفال . ولايفضـل الشاربون اصـطحاب اي نوع من اجـهزةالاسـتماع كالراديو مثـلآ، وان تكون كميات السـجائر " روثـمان " كافيـة، ولايتـم تناول وجبــة العشــاءالابعـد الانتهـاء تـمامآ من " الـمزة " والتي كانت وقتهــــا " جبنة بيضــاء، قطـع لـحـوم، زيتون، فول مـدمـس، بطـاطـس محـمر، وطعـيـة". القـواريـر الصرعي!!،يفضـل وان تكـون دائـمآ وتـحـت الـطاولة لافـوقهـــا.
ـ
.. اذا كـانت هنـاك انواع اخري من الكحـوليات القوية مثل " الويسـكـي " او
" العرقـي " او " شـــيري ابـو بنت " فيـجـب تناولـهـا بعـدالبيـرة مع الاهتـمام بتناول الاكـل بصـــورة كافية. كانت بـيرة " ابـوجـمل " هي القاسـم الـمشــترك والشـــراب الاســـاســـي لكـل " قعــدة " وبـدونهـا يصــبـح اي يوم خـميـس مسـيخـــــآ بـلامعــنـي.

ملـوحــظـة: اي عـملية تـوثيـق تحـتاج الـي صــراحـة وامانة في الســرد.

--------------------------------------------------------------------------------
مداخلة: #48
العنوان: Re: البيرة ام ناقة والشـــراب سكوب!!
الكاتب: Adil Osman
التاريخ: 07-12-2006, 07:01 ص
Parent: #1



طابع بريد سودانى سنة 1898 وبه صورة الجمل الشهيرة

--------------------------------------------------------------------------------
مداخلة: #49
العنوان: Re: البيرة ام ناقة والشـــراب سكوب!!
الكاتب: هشام هباني
التاريخ: 07-12-2006, 09:59 ص
Parent: #48


الاستاذان/ بكري وعادل

سلامات

التوثيق مهم لنا كشعب يبدو انه ضعيف الذاكرة وهي نقطة ضعفنا الكبرى التي يستغلها
الانتهازيون لفرض علينا تقبل سياسات الامر الواقع من مشاريع فشلهم المتكررة
كاننا شعب لا يمتلك رصيدا من خبرات وتجارب.. وهو امر قد ينطلي علي اجيال حديثة لم تعايش ذلكم الماضي الجميل ولذلك لا تحمل في مخيلتها محفزا للحنين لذلك الجميل والاستهداء به.. ولكننا هنا كاجيال سبقتهم وعاشت ذلكم الواقع الجميل مهمتنا ان نذكرهم ان في جعبتنا مخزونا رائعا من الصور الوطنية المضيئة والمواقف التي ينبغي ان نبني عليها سياسات الحاضر وامنيات المستقبل كحالة تراكمية موجبة,,, في مثالبها عظات وعبر وفي محاسنها دروس مستفادة.

--------------------------------------------------------------------------------
مداخلة: #50
العنوان: Re: البيرة ام ناقة والشـــراب سكوب!!
الكاتب: adil amin
التاريخ: 08-12-2006, 08:58 ص
Parent: #1


مشكلتك يا ود هباني عامل فيها شفت وانكشفت ساكت
البيرة ابو جمل وليس ام ناقة..عشان تعرف انك مسكين ساكت
وشري
ابومفتاح
ووطنية
ودي الوطنية الصاح
وابوبنت
واتذكر في لاعب في المريخ (ف.ف) سمو بنت الشري لانها بتشبهو
اما العرقي اسكت خليه ساكت ا

هذا البوست برعاية عرقي عشة قصب
ذو قوة ثلاثية للابادة

--------------------------------------------------------------------------------
مداخلة: #51
العنوان: Re: البيرة ام ناقة والشـــراب سكوب!!
الكاتب: بكري الصايغ
التاريخ: 12-12-2006, 05:08 ص
Parent: #1


... اعـيش هـذة الايام قـمة التسامح الديـني واجـوب شـوراع لايبزج الالـمانية وكـييـف الاوكراينية واستمع بالاستعدادت الضـخمة التي تبذلهـاالجهات الرسمية في الـمدينـتيـن لاخراج احتفالات " الـكريسمـاس " وقـدوم العام الجـديد بصـورة فاخـرة ومبـهـجة. ازور الكنائـس وادخلهـا بـ " جـلابيتـي " والعـمة ولااجـد احدآ ويمـانع او يستغرب من وجـودي بهـذا الزي الاسـلامي، واجلـس مع اصـدقائي الالـمان والاوكـراييـن فـي الصـفوف الاولـي وتـمامآ فـي مـواجهة القـس الذي قـص عـلينا قصــة مـيلاد الـمسيـح علية السـلام،وهـي نفس القصة التـي سـمعتها فـي اعـوام السـتينيات عـندما كنت ازور الكنيسةالقبطية بالخرطوم لتهنئة الاخوةالاقباط باعياد الـميلاد وكانت الكنائس وقتهـا تغوص بمئات الـمسلمين الذين
جـاءوا ومثلي للتهنئـة وتقـديـم واجـب الاحـترام للمسيـحين واعيادهـم،وهـي العادات التـي اختفـت تـمامآ الان من السودان بعـد الترحيـل والابعاد القسـري للاخوة الاقباط من بـلادهـم ومصـادرة اموالهـم وعقاراتهـم و... كـنائسـهـم!!!!! ، ولـجـئوا الي كنـداواسـتراليا ونيوزيلند هـربآ من الفاشسـت الاسـلامييـن الـجـدد الذين بذروا نواة التفرقة الـدييـنة وكراهيـة الهلال للصليـب ومعـاداة كـل الديانات بكل انواع الاسلـحة القذرة،وراحـت حـكومة الانقاذ وتحقيـرآ للاقباط واعيـادهـم الدينيـة وتعـدم القبـطي بطـرس في نفس يوم احتفالاتهـم بعـيد مـيلادالـمسيـح عليةالسـلام وتـحـيل احتفالاتهـم الي دموع واوجاع، ولكي تغيظـ الحكومة ايضــآ الـمسيحـييـن غير الاقباط، راحـت وتعدم في نفس يـوم اعـدام بـطـرس ،وتحـكـم عـلي اركـانجـلو بالاعـدام شـنـقآ ويتـم التنفيـذ وعـن عـمـد يـوم احتفالات الـمسـحيين وتـزيدهـم اوجـاعآ فوق اوجـاع!!!. اعـيـش هـذة قـمة افـراحـي مع زملائـي الدينييـن ولادينييـن احتفالات اوروبا بقـدوم اعـــياد الميـلاد ولاالـمس اي تفرقـةاو مظـاهرعـدم
ارتياح من جـهـة ما بـوجـود مـسلميـن او بوذييـن فـي هـذة الاحتفالات الـمسيـحيـة. وسـالت تـري كـيف كان سيـكون حـالي لو رحـت وانا في السـودان
وادخـل احـدي الكنائـس بغـرض تـهنـئة اخـواني الاقبــاط????. هـل كـان مصيـري الاعتقال بتهـمـة الـردة او اي مـسميات التـي اخـترعتـها الانقاذ لتبـرير قـوة اســلامـها????، هـل كان سـيتـم من الوريـد للوريـد ومااكـثـرالـمنظمات التي تقوم بـهاالعـمل،بل وتـحـت حـماية الحـكومة!!!???.
هـل كان وسيصـــدر بـحـقي فـتـــــوي من وزارة الشــئون الـدينية وتطالب بالقصـاص لشـخـصـي النـجـس!!!!????.
اعـتـقـد ان اللة يـحـبنـي وخـصــانـي وان اعـيـش بعيـدآ عـن نظـام عسـكري فاشيســـتي اصــدر فتـوي قبل عـام منع فيـها التهـنئة الـحكوميـة وتهـنئـةالقـصـــر للـمسـيحيين فـي احتفالاتهـم الـدينيــة،وهـــو الـموضـوع والـذي ســـبق وان كتبنا عـنة طـويـــلآ فـي الـمـنـبـر العـام وتـحـديـدآ فـي العـام الـماضــي!!!!!.


--------------------------------------------------------------------------------

ليست هناك تعليقات:

إرسال تعليق