الأحد، 27 أبريل، 2008

ما رايكم ان نتعاقد بفلوسنا مع خبراء اجانب لادارة شئون السودان!!!؟

مكتبة هشام هباني ما رايكم ان نتعاقد بفلوسنا مع خبراء اجانب لادارة شئون السودان!!!؟
28-06-2006, 12:58 م المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1200026104&rn=0


--------------------------------------------------------------------------------
مداخلة: #1
العنوان: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 28-06-2006, 12:58 م


لقد عجز ساسة وافندية وتكنوقراط السودان منذ استقلال البلاد وحتى اليوم في ادارة شئون بيتهم الرسمي وعجزوا عن احداث الاستقرار السياسي والتنمية وترقية الحياة العامة لاهل البلاد وبالاضافة لاحلال الامن والطمأنينة في ربوع البلاد..بعد ان صيروا من الفشل صنعةسودانية خالصة..فالساسة الوطنيون رغم حسن النوايا اجهضوا الاستقلال الوطني واحالوه الي احتلال محلي لفئات محلية استغلت السياسة لمصالحها الحزبية اوقعت الوطن كله ضحية لاصطراعات سياسية بغيضة من اجل مصالح حزبية ضيقة تعبر عن جهويات وقبليات وطائفيات اجهضت الخيارات الديموقراطية وعطلت التنمية في البلاد..واحدثت فراغات سرعان ما يتصيدها ويملؤهاالفاشيون العسكريون واعوانهم الانتهازيون المدنيون من التكنوفراط وبعض من المتامرين من رعايا ذات الاحزاب المطاح بهاوهكذا دواليك مستمرة هذه الحلقة الشريرة حتى اليوم ولا يوجد ما يدلل في الافق القريب او البعيد اية مشاريع مستقبلية وطنية جادة اتيةمن رحم هذا الاحباط والقنوط..فالقوى السياسية ذاتها القوى القديمة لم تكلف نفسها حتى الان عناء وضع مجرد مساحيق لزوم التجميل والتمويه لترغيب زبائنها الدائمين وابنائهم واحفادهم القادمين في الاستمرار في ذات الطريق المهلهل القديم!!
واليوم تعبر عن مواتها الحقيقي وفشلها التام بواقعها الفضائحي الجنائزي الكارثي الراهن بعد سبعة عشر عاما من النضال الزائف ضد من سرقوا منها الشرعية التي ائتمنهم عليها الشعب التعيس وهم يفرطون في استرجاعها لاهلهاكامانة والمفرط في الامانة اسوا من الذي سرقها لانه ليس جديرا بتحمل هذه المسئولية وبهذا الشرف الرفيع الذي عمدته دماء الاف الشهداء..واليوم بعد كل الرغاء والثغاء وقد فشلت في استرداد الامانة لاهلها وها هي بلا استحياء تعلن الاستسلام بل الانخراط ذليلة مهزومةفي ركاب الاخر عدو الشعب الظالم الظليم وهذه اكبر شهادة وفاة لها قد حررتها طواعية بنفسها وهو اصدق دليل على وفاتها وفقدانها اهلية البقاء!!
ما دام الامر كذلك والبلاد الان في طريقها للتشظي والاحتلال بسبب هذا الاستهتار السوداني
والذي يتحمل الاوغاد الحاكمون نصيب الاسد فيه وبقية الكارثة تتوزع النسب فيها بمقادير بين بقية الشركاء والمتوالين والمتخاذلين والصامتين!!
عليه اقترح عليكم ايها السودانيون الطيبون اقتراحا عادلا ووسطا ما بين رفض للاحتلال القادم والذي ستضيع فيه سيادتنا وكرامتنا ورفض لحكم محلي حزبي جهوي قبلي قد دمر الوطن وارهق الشعب واخره مئات السنين وهو واقع يكرس المحسوبية والفساد لمصلحة الاحزاب والافراد وتابعيهم باحسان الي يوم الدين علي حساب مصلحة الوطن التعيس!!
واقتراحي واقعي جدا يتمثل في التعاقد رسميا مع رئيس وزراء ومعه اطقم وزارية اجنبية جاهزة بفنييها من الدول الشقيقة والصديقة من الخبرات العالمية والتي مشهود لها بالكفاءة والدربة في ادارة بلدانها بانجاح مشاريع معروفة ومشهورة..يتم التعاقد معهم لادارة دولتنا المهلهلة والمنهوبة لفترة عشر سنوات.. وخاصة في وزارات مثل الطاقة والزراعة والصناعة والتعليم والبحث العلمي والمالية والتجارة والري والطرق والكباري وهي وزارات ترتبط بالتنمية والاعمار..وطالما نمتلك ثروة النفط فبدلا من ضياعها في جيوب السراق والمتنفذين والمحاسيب واللصوص علينا ان ندفع منهااجور هؤلاء الخبراء وهم بالتاكيد سيتقنون المهمة طالما سندفع لهم اجورا عالية وبالتالي نضمن نتائج ملموسة.. وعندها (ولا الوزير من الحزب الفلاني ولا من قبيلة فلان ولا طائفة علان ولا ود اخت الوزير اكل ولا بن عم الوزير وظفوهو بالشي الفلاني ولافلان من حزب الوزير قال ولا ما قال!! يعني وزارة قد تلقي رئيس الوزراء كوبي او ياباني و فيها وزير فلبيني او سويدي ومساعد الوزير من جواتيمالا والسكرتيرة من هاييتي والبواب من مصر الشقيقة وسواق الوزير من السعودية وطباخ الوزير انجليزي والناس ديل كلهم ساكنين في عمارة واحدة وبركبوا بص واحد وما عندهم اي علاقة مع السودانيين خاصة السياسيين وامانحن الشعب السوداني حنكون قاعدين ملوك بس منتظرين الفرج بعد عشرة سنوات...والسياسيين بتاعننا خلوهم بس بره للنقةفي البرلمان اضعوا القرارات السيادية وما فيهم اي زول اتصل بالخبراء ديل بس اسلموا الخبراء القرارات والباقي علي الله والخبراء الاجانب!! يعني الحكاية ببساطة زي مامرات الناس بجيبوا حكام محايدين للكورة من دول اجنبية عشان نضمن نتيجة نزيهة وما فيها اي تلاعب والكورة في السودان زي السياسة,,عشان كده محتاجين لاداريين اجانب محايدين نزيهين والمابنفع بنغيروا وبنجيب غيرو ولا رايكم شنو؟؟


هباني ظاااااطو

--------------------------------------------------------------------------------
مداخلة: #2
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: Sobajo
التاريخ: 28-06-2006, 01:37 م
Parent: #1




--------------------------------------------------------------------------------
مداخلة: #3
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 28-06-2006, 05:32 م
Parent: #2


سوباجو

سلامات وان شاء الله الكلام وقع ليك!!

هباني

--------------------------------------------------------------------------------
مداخلة: #4
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: Abureesh
التاريخ: 28-06-2006, 09:46 م
Parent: #3


Quote: يعني وزارة قد تلقي رئيس الوزراء كوبي او ياباني و فيها وزير فلبيني او سويدي ومساعد الوزير من جواتيمالا والسكرتيرة من هاييتي والبواب من مصر الشقيقة وسواق الوزير من السعودية وطباخ الوزير انجليزي



ود هبانى،
أمانـة ما اتلومت تب.. تنسـى البرازيل بحالهـا.. دى لازم رئيس الوزراء ووزيـر الشبـاب والرياضـة يكون منهـم.
والصينيين، أهلنـا وأحبابنـا.. برضـو سقطـوا سهـوا!!

انا عنـدى إقتـراح تانى..
أنو نحن العاملين مثقفين ديل نمشى الســودان، ومن المطـار، ما نزور قرد.. ولا الرئيس زاتـو.. طوالى على المشـاريـع، وبعـدين نشـوف ود المـرة الحيوقفنـا.. كل زول يخطط لمشـروع هنا قبل ما يمشى، ويرصـد ليـه كل الخطط الماليـة والعمليـة...الخ.. ويقطـع التزكـرة ويطيـر.. ننسى السيـاسـة كلو كلو للعشـرة سنـة القلتهـا دى.. ونعتبـر "الدنيـا جيفـة خليناهـا لكلابهـا" كما قال أهلنا الصوفيـة..

أها... شنـو الراى؟

--------------------------------------------------------------------------------
مداخلة: #5
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: دينا خالد
التاريخ: 28-06-2006, 11:12 م
Parent: #1



المشكله يا هبانى انو الخبراء راقدييييييييييىن عندنا

ال مافى هى الفلوـــــــــــــــــس !!!!!!

--------------------------------------------------------------------------------
مداخلة: #6
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: عثمان عبدالقادر
التاريخ: 29-06-2006, 01:51 ص
Parent: #5


الأخ /هشام
سلام
قال أحدالعرفانيينشغلي بعيوبي هوخيردروبي*** لشهودغيوبي ختماوبداية).
ولكن للأسف الشديدلم ننشغل بعيوبنا بل بما ليس فينا من المآثر والصفات
من مثل( الدود قرقر حبس الدرب )و(بنصطاد السمين مابناكل الرمم)و(سيد القدح البجر)
(وروني العدو وأقعدوا فراجة)ونحن لم نستطع محاسبة نميري الذي تبجح علينا أحدالوصوليين بأنه يجلس في ساحة ودنوباوي ويضع رجله على الأخرى،كما لم نستطع كما ذكرت أنت خلال سبعة عشر عامازحزحة هؤلاء الألفوات عن العبث بمقدراتنا،وفوق هذا وذاك نبذنا ماكان أمام أعيننا من الرجال الذين قل أن يجود الزمان بمثلهم في الشجاعة ونبذ الدنيا وقول الحق ،ياهشام ياأخوي ما تقلب علينا المواجع أنا لولقيت واحد يشتريني رقيق عنده ويوفر لي الهوية والحماية واللقمة لوافقت ،ناهيك عن التعاقد مع أجانب لإدارة هذا البلد البائس المنكوب بنا.
ملاحظة للأخت دينا:


Quote: المشكله يا هبانى انو الخبراء راقدييييييييييىن عندنا

ال مافى هى الفلوـــــــــــــــــس !!!!!!



الخبراء هم من يصنع الفلوس وليس العكس ،فعندما لا يكون هناك مال فهذا يعني أنه لا يوجد خبير حتى وإن تسلح بكل أنواع الشهادات فالسيف أصدق أنباء من الكتب، ودي واحدة من عيوب تعليمنا النظري الذي عجزناعن إصلاحه لأنه أبو وأم هذا الفشل الذي أصبحنا ننقله للأجيال عن طريق الجينات الوراثية.

أبوحمد

--------------------------------------------------------------------------------
مداخلة: #7
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: Sobajo
التاريخ: 29-06-2006, 04:21 ص
Parent: #6






Quote: سلامات وان شاء الله الكلام وقع ليك!!




وقع لي تب يا هباني ...

و ده الكنت بفكر فيه ..!!

في العالم الاول ... لو في اي وزير او زول مسؤول جار عليه الزمن من كبر سن او استقالة ...

و طبعا ده الطبيعي و خلى المنصب بتاعو ...

بتلقى الحكومة بتحاول تستفيد منو برضو ،،، يا اما مستشار او خبير وما الى ذلك ...

لكن البترك الكرسي في العالم الثالث .. يا اما مطارد او منفي او مقتول ...

او متروك على الرف يتفرج و يتمنى متين يحصل الفشل عشان يضحك ...


مع احترامي وودي ظاااااااااااتو ....!!

--------------------------------------------------------------------------------
مداخلة: #8
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 29-06-2006, 07:21 ص
Parent: #7


ابو الريش

سلامات

والله فاتت علي حكاية اهلنا البرازيليين والصينيين دي..يعني لو ادينا وزارة الشباب
والرياضة بس لطاقم خبراء رياضيين فني برازيلي انا متاكد انو بعد العشرة سنوات عندنا راي في كاس العالم ظااطو..واما الصينيين نديهم وزارة العمل او الزراعة..بجد جد السودان حيمشي زي الساعة..وفعلا حنكون سلة غذاء العالم جد جد ...
اما بخصوص مقترح العودة للوطن بالطريقة القلتها دي والله الجماعة الحرامية ديل ما حيصدقوا جيتك طوالي حيجنحوك من اي قرش ولمن توصل المشروع تصل اباطك والنجم وتقول رجعوني هسع امريكا!!


هباني

--------------------------------------------------------------------------------
مداخلة: #9
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: Sobajo
التاريخ: 29-06-2006, 07:24 ص
Parent: #8


Quote: الصينيين نديهم وزارة العمل او الزراعة





قرار : عدد ساعات العمل 20 ساعة في اليوم ...

قرار : زراعة جميع الاراضي الصالحة بمحصول الارز ..!!

--------------------------------------------------------------------------------
مداخلة: #12
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 29-06-2006, 07:46 ص
Parent: #9


سوباجو اخوي

سلامات

انت عارف الخبراء الخواجات بتاعين المعاشات ديل القلت عليهم ديل

ديل هم البنفتش عليهم بخبراتهم العظيمة وعلمهم الغزير..وبنفعونا شديد!!

واما وزارة العمل ولا الزراعة فعلا لو اديناها الصينيين والله تاني السودانيين افارقوا النوم فراق الطريفي لجملو.. وابقوا سهر الجداد ولا نومو...وحنشبع العالم رز وقطن وقمح وده الشغل!!

محبتي

هباني

--------------------------------------------------------------------------------
مداخلة: #11
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 29-06-2006, 07:36 ص
Parent: #6


عثمان اخوي

سلامات

كلامك تب سمح بالحيل ..نحن والعياذ بالله عندنا مرض تضخيم الذات!!
وزي ما قلت ما بنلتفت لعيوينا عشان نقومها ومكابرين ما بنرضي بالملامة والنقد
حتى لو في مصلحتنا..واللولوة عندنا كتيرة والشفافية غايبة وسيد النصيحة اعمل حسابو!!
ولله في خلقه شئون.

محبتي واحترامي

هباني

--------------------------------------------------------------------------------
مداخلة: #10
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 29-06-2006, 07:29 ص
Parent: #5


الاخت دينا

سلامات

وين الخبراء المحليين يا عزيزة دي اوهام ساكت.. حقو نتواضع شوية
السفاح نميري اقام حكومة من التكنوقراط وفي النهاية ودوا البلد في ستين داهية!!
دي اوهام بتاعتنا نحن السودانيين لزوم الفشخرة!!

--------------------------------------------------------------------------------
مداخلة: #13
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: Tragie Mustafa
التاريخ: 29-06-2006, 07:48 ص
Parent: #10




هباني سلام


Quote: ما رايكم ان نتعاقد بفلوسنا مع خبراء اجانب لادارة شئون السودان!!!؟



ياريت يا هباني.

عارف ليه,

اولا:

هؤلاء الخبراء لن يآتونا باجنادتهم الخفيه.

ثانيا:

بعبع القبليه الذي يتمدد في السودان كل يوما وكل واحد عينوه في وظيفه عايز يملأها بقرايبه

واهل قبيلته دي برضوا بنخلص منها.

ثالثا:

التعصب للرأي وهذا ايضا الخواجات ماعندهم دائما يبدون مرونه كبرى في الاخذ و العطاء.

رابعا:

حكاية (ابو العريف) كل واحد فك الخط بيعمل في السودان ابو العريف ,الخواجات تلقى الواحد بروفيسر

وفي تخصص محدد وكاتب قريب ال20 كتاب في مجاله ,وتجيئ تناقشه وفي (تخصصه) تلقاه يسمع بكل ادب

ولا يتهمك بتطاول او جهل وانما يعتقد صادقا انك قد تنبر بصيرته لامور لم ينتبه لها من قبل.

و...و.....الخ.

عشان كده اجدني اتفق معك,ولكن شد حيلك من (ناس ابو العريف ديل).

تراجي.

--------------------------------------------------------------------------------
مداخلة: #14
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 29-06-2006, 08:21 ص
Parent: #13


الاخت تراجي البطلة

سلامات

زي ما قلت يا تراجي ما في واحد بعد ما نتعاقد مع الخبراء ديل اجي اقول لينا ظلمتونا ولا الوزير ده من القبيلة الفلانية ولا من الطائفة او الحزب او الجهةالفلانية.. كلهم اجانب بالتعاقد لخدمة شعب السودان الحيران والغلبان!!
وبعدين الخبراء ديل حيكونوا ساكنين كلهم في عمارة واحدة وبابها واحد ومحروسة بالجيش وبركبوا بص واحد وما عندهم اي اتصال باي بني ادم سوداني,,( يعني من البيت لمدرستو)عشان بكرة ما نسمع الوجيه فلان الفلاني بن فلان اقام مادبة غداء للخبير الاجنبي الفلاني وبعد داك نسمع بالخبير عندو بيت في كافوري ولا كمان عايز اعرس سودانية.!!
ده الكلام الغلط الما عايزنو!!

محبتي واحترامي( مع تحياتي للابناء)

هباني


--------------------------------------------------------------------------------
مداخلة: #15
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 17-07-2006, 04:06 م
Parent: #14





ايضا جزء من حل الازمة العاجلة ان نمنح المواطنة السودانية فورا لخمسة ملايين مزارع صيني وهندي ومصري وتمليكهم اراضي من ( الميري) حتي يزرعونها ونصف منتوجها لهم والنصف الاخر لصالح حكومتنا الموقرة لتطوير الزراعة في بلادنا بهذه الخبرات الوافدة الخلاقة!!

--------------------------------------------------------------------------------
مداخلة: #16
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: wesamm
التاريخ: 17-07-2006, 04:27 م
Parent: #15


والحبوش وزارة السياحة علي ان تديرها امهراويه من اقليم شوا وعاصمته اديس ابابا.

--------------------------------------------------------------------------------
مداخلة: #17
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 17-07-2006, 07:03 م
Parent: #16


ابو العز

سلامات

ده عز الاقتراحات سياحة علي اصولها يعني ( شقر يلام)!!

--------------------------------------------------------------------------------
مداخلة: #18
العنوان: Re: ما رايكم ان نتعاقد بفلوسنا مع خبراء اجانب لادارة شئون السودان!!!؟
الكاتب: هشام هباني
التاريخ: 20-10-2006, 09:07 م
Parent: #17


؟؟؟؟؟؟


--------------------------------------------------------------------------------

ليست هناك تعليقات:

إرسال تعليق