الحل الانسب ....السودان في كرتلة.... وكل زول اياخد حقو

مكتبة هشام هباني الحل الانسب ....السودان في كرتلة.... وكل زول اياخد حقو!!
09-01-2007, 00:30 ص المنتدى العام لسودانيز أون لاين دوت كوم
» http://www.sudaneseonline.com/cgi-bin/sdb/2bb.cgi?seq=msg&board=138&msg=1199607552&rn=0


--------------------------------------------------------------------------------
مداخلة: #1
العنوان: الحل الانسب ....السودان في كرتلة.... وكل زول اياخد حقو!!
الكاتب: هشام هباني
التاريخ: 09-01-2007, 00:30 ص


اخواتي واخواني


سلام عليكم

شكلها الحكاية ماشة مخستكة والكضب كتر والكلام مشاتر والناس خلاص دايرة تطرشق من الغباين !! اها ما دام الناس في البلد معصلجين ومفرنبين ومكجنين بعض وكل زول بقي اتكلم بقبيلتو وجهتو وعايلتو ..لا دين وحدنا ولاجنس وحدنا ولا ايديولوجيا حتوحدنا طيب احسن مقترح للحل النهائي للمشكل بلا حروب ولا نزاعات ولا اتفاقيات انو نحتكم للامم المتحدة وتجي لجان فنية دولية تقسم ال1000000ميل مربع مساحة السودان الرسمية وتوزعها علي 35 مليون نسمة وهي تعداد سكان السودان الحالي و نقعد نشوف الامم المتحدة تقوم تصنع لينا اكبر كرتلة في العالم والنمر الفيها بعدد سكان السودان يعني مثلا ممكن اكون فيها 35 مليون نمرة وكل نمرة فيها قطعة ارض!!
اها تقوم الامم المتحدة تعمل يوم السحب الوطني علي الكرتلة القومية لكل سكان البلد وانت وحظك يوم السحب ممكن تقع ليك ارضك في الجنوب او الوسط او في العتمور او في العوينات او في حفرة النحاس!! وكان محظوظ اقع ليك فيها نفط او ذهب !!وكل زول بعد داك الارض حقتو داير ابيعها لمصر لامريكا اعملها مزارع ...اسواق حرة..ادبخانات...قطاطي ..مزارع دواجن ..سبعة بيوت ..ابو صليب ...هو حر في ارضو!!

شفتو ده اخر الحلول لو الامور خلاص حنفارق بعض فراق الطريفي لسفينة الصحراء بتاعتو
ولا ضرر ولا ضرار!

فتناكم بعافية!

ظااااااطو

--------------------------------------------------------------------------------
مداخلة: #2
العنوان: Re: الحل الانسب ....السودان في كرتلة.... وكل زول اياخد حقو!!
الكاتب: SAMIR IBRAHIM
التاريخ: 09-01-2007, 02:35 ص
Parent: #1


يا حبيبو هشام هباني .... كنت عايز اكتب لي موضوع بي عنوان اسمو .... الخروف انتحر .... والخروف الشقي الحال ... كنت عايز اعمل بيهو حفلة الكترونيه ..واعزم فيها كل الناس البتتسكع في معسكرات اللجوء السياسي .... والاخوان الادمنو النومة في بلكونات فرنسا وشقق القاهره وبيناضلوا باسم السودان ... والناس الفاكرين السودان متر دموريه او متر دبلان وعايزين يعملوه جديد ... والناس العايشين دور الدارويش وكل ما يسمعوا اسم سيدي هناي الواحد يلف فيهم حوالين نفسو زي الكترابة والعجاج البيلف حوالين نفسو ميدان بانت .......

. لكن الخروف تعب من معافرة العيال في البدرون وانتحر ....

اسمح لي اكتب موضعي في بوستك ... وبعد ما عملنا للخروف المكياج ووديناهو الكوافير .... الشقي انتحر ......






--------------------------------------------------------------------------------
مداخلة: #3
العنوان: Re: الحل الانسب ....السودان في كرتلة.... وكل زول اياخد حقو!!
الكاتب: هشام هباني
التاريخ: 09-01-2007, 05:18 ص
Parent: #2


الاخ سمير

سلامات

والله خروفك القيافة ده غايتو لو سلفتنا ليهو
ممكن نرشحو لرئاسة الجمهورية في السودان مادام
التيوس بتحكم والديوك بتحكم..علي الاقل نجرب خروف وكمان قيافة!
ما دام عقلية الراعي والقطيع لا زالت حاكمة
جربنا الراعي ما نفع وجربنا التيس مانفع خلينا نجرب الخروف!!
الود والاحترام

هشام


--------------------------------------------------------------------------------